Luke 20

E Rei i Habi a Nitora ne Isu

(Mateo 21:23-27; Markus 11:27-33)

Na parava tara, na tahuna e Isu i tovo e huriki na Velenga Kamumu pololilo na roho na Vure, e huriki a prister dagi, a mari na vinara, e huriki a bakovi dagi ri valai ne Isu. Lakea ri nanea, “O vakalongo mia, o bole vai a nitora o rata a maki nga? E rei i taki ioe go rata a maki nga?”

E Isu i koli i ta maea, “Ga nana taro mua vona tara ninana. Mu vakalongo iau, ra hilova ne Ioanes, i valai na Vure, o i valai na bakovi tavula kunana?”

Ri vahehe, ri ta maea, “Bara si takia a leho vona i valai na Vure, bara i nana, ‘Pali i navai i uka ma mu luhoi tora ia?’ Pali hita bara si taki a hilova ne Ioanes a niluhoi na bakovi kunana, e huriki bara ri padimate hita na kedo, a vuhuna ri luhoia e Ioanes a propet.” Lakea ri koli mule ri takia, ta i uka ma ri lohoka vona a hilova ne Ioanes i valai ne rei.

Lakea e Isu i ta rike, i ta maea, “Pali iau tara, i uka ma ga vakalongo mua vona e rei i habi a nitora nau ni rata a maki nga.”

A Nivakakika na Hania

(Mateo 21:33-46; Markus 12:1-12)

a Muri e Isu i taki ria vona tara nita vakakika tabu, i ta maea, “A bakovi tara i varoa a hania na vain, i habia ne huriki a bakovi ranga ri gi leho taro vona. Muri i vano i havai, i made tabaka na robo tara. 10 I tabukoi ngane a keva ni mirio a vain, lakea i rudua a vora vona i lakea ne huriki a bakovi ni leho ge bole ranga kanena vain. Pali ri ubia a vora, ri tono mulea i laho a vahana a limana i hamule. 11 Muri i rudu tabua tara vora. Pali ri ubi tabua, ri rata halea, ri tono mulea i laho a limana a vahana i hamule. 12 A tahona hania i rudu tabua tara vora. I mavonga ia, ri ubi pilea, ri voro talea.

13 “Lakea a tahona hania na vain i nana mulea i ta maea, ‘A ra ga ratea ngane? Ga rudua e tugu a bakovi a hategu. Bara ri togo ia.’

14 “Pali na tahuna e huriki a bakovi ni leho ri masia e tuna, ri vata, ri ta maea, ‘A bakovi iea bara i bole a murine tamana. Si rabalakia, si bolea a hania na vain na tahuna e tamana i mate.’ 15 Lakea ri vuroki talea e tuna, ri rabalakia.

“Mu luhoi navia a tahona hania, ge rata navai ria ngane?
16 Bara i valai, i rabalaki e huriki a bakovi nga, i bole mulea a hania na vain, i habi polo tabua ne huriki a bakovi ranga.” Na tahuna ri longoa a nivakakika iea ri ta maea, “A Vure, nahea ge rata mavonga!” 17 Lakea e Isu i matanono ria i ta maea, “Pali a ngava ni here puru na Hinere i ta maea,

‘Ra kedo e huriki a mari ni hae a ruma ri marikoi vona,
ngane i bele a vuhu kedo ni hae a ruma vona.’
18  b “E huriki ri boru langa na kedo iea bara ri bole a vuranga. Na tahuna a kedo iea bara i boru, i tahoa tara bakovi, bara i ubi momoa.”

19 Ngane e huriki a mari na vinara turana e huriki a prister dagi i padi ria a mana vona e Isu i taki virihi ria, lakea ri ngaru ni lakavu malaviriria. Pali ri mangenge ne huriki a bakovi a ngatavine.

A Takis ne Kaiser

(Mateo 22:15-22; Markus 12:13-17)

20  c Lakea ri rudu e huriki ranga ri gi tamilalu ni muri ne Isu, ri gi kasisi, ri gi matanonoa ge rata ranga ngava hale, bara ri taki tala ne Pilato. 21 E huriki a kasisi nga ri nanea, “Mari ni tovo, mi lohoka vomu, ioe o ta muholi, o vara e huriki na maki muholi. O rata a naro i palupulupu ne huriki lobo. O vara kunana na naro na Vure i muri mai a ngava muholi. 22 A vinara i taki si gi habi a takis ne Kaiser, o i uka?”

23 Pali e Isu i lohoka vona a taminga ne ria, lakea i taki ria i ta maea, 24 “Mu vakasiria nau tara moni. A hanune rei, a rane rei i tabuli vona?”

Ri ta maea ria, “A hanune Kaiser, a rane Kaiser i tabuli vona.”

25 Lakea e Isu i taki ria i ta maea, “Mu habi ne Kaiser a maki ne Kaiser. Mu habi na Vure a maki na Vure.”

26 Ri keri ni padi virihia na ngava vona na matane huriki a bakovi a ngatavine. Ri ngapa ri vulai kunana.

E Huriki a Sadusi

(Mateo 22:23-33; Markus 12:18-27)

27 Muri e huriki a Sadusi ri valai ne Isu. Re huriki nga ri taki ta a viri i mate i uka ma ge pesi rike mule tabu. 28  d Ri nanea, “Mari ni tovo, e Moses i here puru i taki a bakovi i mate, i pe purua e girihina, pali i uka e tune rua, e tarina bara i parangi tabu a havuri vona, ge vakabelea a hamona. 29 I tahoka e tarina mai ala polorua. A tabua i parangi, muri i mate. Pali i uka ma i vakabele e tuna. 30 A pahamuri tabua i parangi tabu vona a havuri vona. Muri ia tara i mate, i uka tabu e tuna. 31 A tolune ria i parangi tabu vona, pali ia tara i mate. Re maki tarina mai lobo nga to parangi lobo vona. Muri to mate, i uka ma to vakabele e tune tou. 32 Muri i mate a ngatavine. 33 Muri ma, na tahuna e huriki ri pesi rike mule na ni mate, ra ngatavine iea ge girihine rei muholi? Tou lobo to parangi vona.”

34 Lakea e Isu i koli, i ta maea, “Koea na malala e huriki ri parangi. 35 Pali muri ma, e huriki a bakovi a ngatavine a Vure ge taki ria ri kamumu, ri gi mahuri mule na nimate, i uka ma ri gi vaparangi, 36 a vuhuna ri manga a agelo, i uka ma ri gi mate tabu. Ria e huriki e tuna Vure, a vuhuna ri mahuri mule na nimate. 37  e E Moses tara i vakasiri hita vona e huriki ri mate, bara ri mahuri mule tabu. Na tahuna i here puru a nuverei na kai kiroko i nono, i takia e Bakovi Dagi ia ‘A Vure ne Abraham, a Vure ne Isak, a Vure ne Iakop.’ 38 I uka ma ia a Vure ne huriki ri mate. Ia a Vure ne huriki ri mahuri, a vuhuna e huriki lobo ri mahuri na matana.”

39 Lakea e huriki a mari na vinara ri ta maea, “Mari ni tovo, a nikoli vomu i kamumu.” 40 Muri ri mangenge ni nana tabua.

E Kristo Ia e Tune Rei

(Mateo 22:1-2; Markus 12:35-37)

41 Muri e Isu i nana ria i ta maea, “I navai ni taki e Kristo ia e Tune Davit? 42  f Na maka Linge, e Davit i here maea,

‘E Bakovi Dagi i takia e Bakovi Dagi nau,
“O made na limagu a kanegu,
43 ge harena na tahuna ga ratapile e huriki a pile vomu,
ri gi vora tavula vomu.” ’
44 “E Davit i galea a viri iea a Bakovi Dagi vona. Pali i navai tabu ge ia e tune Davit?”

E Isu i Biu e Huriki a Mari na Vinara

(Mateo 23:1-36; Markus 12:38-40; Lukas 11:37-54)

45 Muri i taki e huriki a murimuri vona na matane huriki lobo, i ta maea, 46 “Mu matadoko na narone huriki a mari na vinara. Ri vakaholi, ri ngaru ri gi bagetu keke. Ri ngaru e huriki ri gi tagui kamumu ria na mada. Ri ngaru ni made mugamuga na roho na vaponga, ri ngaru ni made mugamuga na habu. 47 Ri rata a nivasileki olaola, e huriki ri gi luhoi ta ria a bakovi kamumu hateka, pali ri panaho a ruma, a malala ne huriki a havuri. Re huriki nga, a Vure bara i habi a nimadihi dagi ne ria na tahuna i pelekado a narone ria.”

Copyright information for `BNP