Luke 21

A Nihabi na Havuri

(Markus 12:41-44)

E Isu i mata lakea, i matai e huriki a bakovi na mahala ri habi a nihabi pololilo na roho na Vure. Muri i masia a havuri matasia i ru puru a toea i rua. a Na tahuna i masia, i ta maea, “A taki muholi mua, a havuri matasia iea i habi dagi hateka ne huriki a bakovi na mahala nga. E huriki a bakovi na mahala ri habi kunana a maki ri uka leho vona. Pali ra ngatavine matasia iea i habi lobo a maki i tahoka.”

A Roho na Vure Bara Ni Ratapile

(Mateo 24:1-2; Markus 13:1-2)

E huriki a murimuri ranga ri masia a roho na Vure, ri bibi rikea na hini ni vakabagetu kamumu na kedo kamumu, na mahala e huriki ri habi na Vure.

Pali e Isu i taki ria i ta maea,
b “Ra maki nga mu matai, ra roho na Vure, i uka tara kedo ge tabuli langa vona tara kedo tara. A kedo lobo bara ni ubi puka puru.”

A Nimadihi i Kupo Bara Ri Luve

(Mateo 24:3-14; Markus 13:3-13)

Muri ri nanea e Isu ri ta maea, “Mari ni tovo, garika ge bele a maki nga? Ge mata navai a kilakila vona, si gi matakilaka vona a maki nga ge bele?”

E Isu i koli i ta maea, “Mu matadoko vona e huriki ri gi tami mua. A bakovi ala kupo bara ri valai na ragu, ri tatami maea, ‘Iau e Kristo,’ o bara ri ta maea, ‘A parava i valai pali!’ Naha ni longo mai ria. Na tahuna mu longo a velengana vaubinga dagi, naha ni mangenge, a vuhuna a maki nga bara ri bele taro. Pali a nilobona parava i tabana.”

10 Muri i taki ria i ta maea, “A tanga ranga bara ri vaubi turana tanga ranga. E huriki a tara na hariki ranga bara ri vaubi turana tara na hariki ranga. 11 A maka vuruke dagi, a gilanga dagi, a pago dagi bara ri bele. A maka nivakasiri dagi bara ri bele na hunu, ri vaka­mangenge e huriki.

12 “Pali muga, bara ni lakavu mua ni ratapile mua a vuhuna mu muri mai iau. Bara ni pelekado mua na roho na vaponga, ni ru dili mua na bavi. Bara ni lakavu mua, ni vakapesi mua na matane huriki a hariki a matakari, a vuhuna mu ramai iau. 13 Na tahuna mu pesi na matana e huriki a hariki, bara mu vakalongo ria ne nau. 14  c Naha ni lohopae vona a ngava bara mu taki ria vona, 15  d a vuhuna iau ga habi a lohokanga ne mua, bara mu taki kamumu ria, lakea e huriki a pile ne mua bara ri keri ni gege, bara ri keri ni pulo a ngavane mua. 16  e E huriki e tamane mua, e kinane mua, e tukane mua, e tarine mua, a kabune mua, a turane mua bara ri habi mua na limane huriki a pile ne mua. Bara ri rabalaki ranga ne mua. 17 E huriki lobo bara ri marikoi ne mua a vuhuna mu muri nau. 18 Pali i uka tara vune mua ge velu. 19 Mu pesi tata na niluhoi ne mua, bara mu bole a nimahuri.

E Ierusalem Bara Ni Ratapile

(Mateo 24:15-21; Markus 13:14-19)

20 “Na tahuna mu matai e huriki a tara na nugumaheto ri pesi halui e Ierusalem, ngane bara mu lohoka vona a tanga i popote bara ni ratapile. 21 Na parava iea e huriki ri made o Iudea ri gi ha, ri gi kapiloho na lolo. E huriki ri made o Ierusalem ri gi ha tala. E huriki ri made polovavo na tanga, nahea ri gi dili, 22  f a vuhuna i bele muholi ngane a ngava ne huriki a propet hosi, ri here puru na hinere, a Vure ge koli a maka rabu hale. 23 E huriki a ngatavine ri singou, e huriki a ngatavine ri vakaruru, bara ri marego hateka na parava iea! A nimadihi dagi bara i bele o Israel. A Vure ge tahate e huriki a bakovi a ngatavine na tahuna iea. 24  g E huriki a pile bara ri valai ri rabalaki ria. E huriki i uka ma ri mate, bara ni bole basi, ri made viliha na tanga lobo na malala. E huriki a bakovi i uka ma ria a Iuda bara ri ratapilea e Ierusalem, ge harena na tahuna a parava ne ria i lobo.

A Tuna Bakovi Bara i Hamule Valai

(Mateo 24:29-31; Markus 13:24-27)

25  h “Na tahuna iea, a maka nivakasiri bara ri bele na haro, na keva, na hada. Koea na malala e huriki bara ri mangenge ri vuru viliha lae na tahuna ri longo a nangina bokona dari i rere hateka. 26 E huriki a bakovi bara ri mangenge hateka, bara i vurea a matane ria. Bara ri loho lege lae na a ra maki ge bele na malala, a vuhuna a maka nitora polomeli na hunu bara ni polu. 27  i Ngane ri gi masia a Tuna Bakovi i valai na bubu, i valai turana nitora a nipara dagi. 28 Na tahuna a maka maki nga ri vakatubu ni bele, mu pesi rike, mu mata rike, a vuhuna a parava a Vure ge korimule mua i tabukoi pali!”

A Kai a Balele

(Mateo 24:32-35; Markus 13:28-31)

29 Muri e Isu i takia ne ria a nita vaka­kika iea, “Mu masia a kai a balele turana maka kai ranga. 30 Na tahuna i tahoka a totona a rahana, i lubu a pagana, bara mu pasimata vona a tahuna na haro i tabu­koi. 31 I mavonga kunana na tahuna mu matai a maki nga ri bebele, ngane bara mu lohoka vona a harikianga na Vure i tabukoi.

32 “A taki muholi mua, e huriki a bakovi a ngatavine na tahuna iea i uka ma ri gi mate ma, a maka maki nga ri gi bele taro. 33 A malala a hunu bara ru lobo, pali a nitagu i uka ma ge lobo.

Mu Matadoko na Parava Lobo

34 “Mu matadoko, nahea mu gu luhoi lege­lege na nimade koea na malala. Nahea mu gu ninu mu gu manga manga, mu gu rata a maka naro hale, ma ge vaka­pae mua a maka rabu nga. Bara mu turutu na tahuna a parava iea i bele vakaturutu, i lakavu mua i manga a hoa i lakavua a kadirovo. 35 A parava iea ge bele ne huriki lobo ri made na malala. 36 Mu matadoko na parava vakaroro. Mu vasileki bara mu tahoka a nitora ni pologege vona a rabu hale nga, ra ri gi bele, bara mu pesi na matana Tuna Bakovi.”

37 Na parava lobo e Isu i vara e huriki na roho na Vure. Na rodo bara i pe a tanga, i pagitala i vano i mahita na lolo e Oliva. 38 Na hatelanga tabu, e huriki lobo bara ri vuho lakea na roho na Vure, ri gi longoa e Isu i vara vonga.

Copyright information for `BNP