Luke 4

A Hanitu i Tonia e Isu

(Mateo 4:1-11; Markus 1:12-13)

Muri ne Ioanes i vahiloloa e Isu, e Isu i pe a naru e Iordan, a Hanu Kiripiripi i laho tora turana, i tuli laea na tabeke i ngeki. A hanitu i tonia vonga na parava i ravulu va. Na tahuna iea, e Isu i peremu a maki ni kani, lakea i vitolo.

Lakea a hanitu i takia, i ta maea, “Ge ioe a Tuna Vure, o takia a kedo iea ge mapulo ge manga a bret.”

a Pali e Isu i koli, i ta maea, “A ngava ni here puru na Hinere i maea:

‘A bakovi i uka ma ge mahuri na maki ni kani kunana.’”
Muri a hanitu i tulia ru sike na lolo. I vakasiri malaviriri ia vona a maka tanga lobo na malala. Lakea a hanitu i takia e Isu, i ta maea, “Bara habi lobo vomu a maka tanga nga turana bagetua ne ria, a vuhuna a maka tanga nga ni habi lobo nau, lakea iau bara habi na viri a ngarua. Ioe bara o vasileki nau, bara habi vomu a maka tanga nga.”

b Pali e Isu i koli, i ta maea, “A ngava ni here puru na Hinere i maea, ‘O kavurikea e Bakovi Dagi, a Vure vomu, o ramai kunana ia.’”

Muri a hanitu i tuli tabua e Isu, i vakapesi langea na mapana roho na Vure o Ierusalem, i takia, “Ge ioe a Tuna Vure, o to raga koea, 10  c a vuhuna a ngava ni here puru na Hinere i maea, ‘A Vure bara i rudu e huriki a agelo vona, ri valai ri matakari ioe, ri tagari ioe. 11 Ri gi bole rike ioe na limane ria, ma ge padi a vahamu a kedo.’”

12  d Pali e Isu i koli, i ta maea, “A ngava ni here puru na Hinere i maea, ‘Naha ni tonia e Bakovi Dagi, a Vure vomu.’”

13  e Na tahuna a hanitu i toni loboa e Isu na nitoni legelege lae, muri i vano, ge dava, ge toni tabua muri ma.

E Isu i Vakatubu a Leho Vona

(Mateo 4:12-17; Markus 1:14-15)

14 Muri e Isu i hamule lakea o Galili turana nitora na Hanu Kiripiripi. I rere lae a velengana. 15 I vara ria pololilo na maka roho na vaponga, lakea e huriki ri longoa, ri kavurikea.

E Huriki a Nasaret Ri Marikoi ne Isu

(Mateo 13:53-58; Markus 6:1-6)

16 Muri i lakea o Nasaret, na tanga i koru rike vona. Na Parava Nimalo, i lakea na roho na vaponga, i manga a naro i rata vakaroro. I pesi rike i gi. 17 Lakea ni habi vona a puhu na hinere ne Isaia a propet. I vevea, i puruvisia a tabekena tara, i gia, i ta maea,

18  f “A Hanune Bakovi Dagi i made turagu,
a vuhuna i vulaki iau
ga vakalongo a Velenga Kamumu ne huriki a matasia.
I rudu iau ga vakalongo e huriki ni ru dili na bavi, ne ria ri gi matukapaga.
I rudu iau ga vakamatapara e huriki a kepa.
I rudu iau ga rata e huriki ni rata hale, ri gi matukapaga.
19 I rudu iau ga pukatala a ngava ne huriki vona a parava i bele pali,
ne Bakovi Dagi ge korimule e huriki a ngate vona.”
20 E Isu i gi lobo pali, muri i pilua a puhu na hinere, i habi mulea na vora, i made puru. E huriki lobo na roho na vaponga ri vido vona na tahuna i taki ria. 21 I ta maea, “A tabekena Hinere nga i bele muholi mona, na tahuna mu longo iau a gia.”

22  g E huriki lobo ri kavurikea, ri turutu vona a maka ngava kamumu i taki. Ri vanana, “Ra bakovi iea, e tune Iosep kunana?”

23 Lakea e Isu i taki ria i ta maea, “Muholi hateka, muri ma bara mu takia nau tara ngava hosi i nangi maea: ‘Ioe a bakovi ni korimule e huriki, o korimule ioe ke!’ Muri bara mu ta maea, ‘Mi longo ioe o rata a maka nivakasiri o Kapernaum. Pali ngane o rata koea na tanga vomu a maka maki nga.’

24  h “A taki muholi mua, a propet, e huriki a bakovi a ngatavine na tanga vona i uka ma ri matakilalea. 25  i I muholi, hosi na tahuna e Elaisa i laho na malala, i kupo e huriki a havuri ri made o Israel. A vala i uka ma i boru na pida i tolu a keva i polotara, lakea a pago i bele, i ratapilea a tanga. 26  j Pali a Vure i uka ma i rudua e Elaisa ge lakea mai e huriki a havuri o Israel. I lakea kunana ne Sarepat, a havuri na tanga e Sidon. Ra havuri iea i uka ma ia a Iuda. 27  k I mavonga, i kupo e huriki a bakovi a ngatavine o Israel ri tahoka a gilanga a patala hosi na tahuna e Elisa, a propet, i laho koea na malala. Pali e Elisa i uka ma i vakamatapado ria. I vakamatapado kunanea e Naman a bakovi o Siria. Re Naman, i uka ma ia a Iuda.”

28 Na tahuna e huriki pololilo na roho na vaponga ri longoa a ngavane Isu, i madihi a hatene ria. 29 Ri pesi rike, ri tono talea na tanga. Ra tanga ne ria i pesi langa na kupona. Ri bole lakea na dahana kupona ta ri gi kope ragea na gali. 30 Pali e Isu i laho polopolo na kurukurune ria, i vano.

E Isu i Lili Tala a Hanitu

(Markus 1:21-28)

31 Muri e Isu i puru o Kapernaum, a tanga tara na tabeke ne Galili. Na maka Parava Nimalo i vano i vara e huriki. 32  l Ri turutu vona a vinara vona, a vuhuna a ngavana i tahoka a nitora. 33 Na tahuna i vavara, a bakovi tara i dili vona a hanitu, i made vonga pololilo na roho na vaponga. A bakovi iea i mangenge, i gale dagi, i ta maea, 34 “Isu o Nasaret, a ra o ngarua ne mia? I navai, o valai go ratapile mia? A lohoka vomu ioe e rei muholi. Ioe a Bakovi Malamala na Vure.”

35 Lakea e Isu i taki tora ia i ta maea, “Naha ni ta! O pagitala vona.” Muri a hanitu i voro purua a bakovi iea na matane huriki a bakovi a ngatavine, lakea i pagitala vona, i uka ma i ratapilea.

36 E huriki a bakovi a ngatavine ri turutu, ri vanana, ri ta maea, “A ngava navai a ngavana bakovi iea? I tahoka a rana, i tahoka a nitora. I taki kunana e huriki a hanitu, ri longototo kunana, ri pagitala!” 37 A velengana maki i ratea ni vakalongo lae na tanga lobo na tabeke nga.

E Isu i Vakamahuri e Lahuane Simon

(Mateo 8:14-17; Markus 1:29-34)

38 E Isu i pea a roho na vaponga i lakea na ruma ne Simon. E lahuane Simon ngatavine i giloa, i rongo hateka a kulina, lakea ri nanea e Isu ge koria. 39 I valai tabukoi na dahana ngatavine, i takia a gilanga ge malaharuri vona. Muri i pesi rike a ngatavine, i vakatubu ni gutu a maki ni kani ne ria.

E Isu i Vakamahuri e Huriki ala Kupo

(Mateo 8:16-17; Markus 1:32-34)

40 Na malunga liu ni tuli valai ne Isu e huriki ri tahoka a gilanga legelege, lakea i ru langa ne ria lobo a limana, i vakamahuri ria lobo. 41  m I lili tala e huriki a hanitu ne huriki ala kupo. Na tahuna ri ha tala, ri gale dagi, ri ta maea, “Ioe a Tuna Vure.” Pali e Isu i tahate ria, nahea ri gi ta, a vuhuna ri lohoka vona ia e Kristo.

42 Na hatelanga e Isu i pea a tanga, i lakea na robo i ngeki. Pali e huriki a bakovi a ngatavine na tanga iea ri valai maia, ta ri gi toni ni takia nahea ge pe ria. 43 Pali i taki ria i ta maea, “Iau ga vara taro na Velenga Kamumu na harikianga na Vure na maka tanga ranga, a vuhuna a Vure i rudu iau a valai ga rata mavonga.”

44  n Lakea i laho lae o Iudea, i vara pololilo na maka roho na vaponga na tanga takutaku.

Copyright information for `BNP