Mark 7

A Maki Kabakaba, a Maki Katoki

(Mateo 15:1-20)

E huriki a Pariseo turana e huriki a mari na vinara o Ierusalem, ri vano, ri vapopo turane Isu. a Ri matai e huriki a murimuri vona ri kani, i uka ma ri vahilolo taro a limane ria. (E huriki a Pariseo, e huriki a Iuda, ri muri mai a vilo hosi ne huriki e tubune ria, ri loi taro a limane ria, muri ri kani. b Na tahuna ri hamule na maket, bara ri loi taro a limane ria, muri ri kani. A vilo ranga ne tubune ria ri muri mai, ra ni vahilolo a kikei, a tavila, a ulo).

Lakea e huriki a Pariseo turana e huriki a mari na vinara, ri nanea e Isu, “Re huriki a murimuri vomu, i navai i uka ma ri muri mai a narone huriki e tubune hita hosi, i uka ma ri loi a limane ria muga ni kani?”

c Lakea e Isu i koli ria, i ta maea, “Mua e huriki a ngava naru. I muholi a nitane Isaia a propet na tahuna i taki mua hosi, i here puru maea,

‘Re huriki nga, ri taki ta ri togo iau,
pali i uka ma ri ngaru muholi iau na hatene ria.
Ri kavurike tavula iau.
Ri tovo e huriki na vinara tavula na bakovi, ri takia ta a vinara na Vure.’”
Muri e Isu i ta maea tabu, “Mu longotaroa a vinara na Vure, mu ramai a maka vilone huriki e tubune mua. Mu moro hateka ni marikoi na vinara na Vure, mu gu muri mai kunana a vilo hosi! 10  d E Moses hosi i here maea, ‘Mu togo e kinane mua, e tamane mua.’ I here maea tabu, ‘E rei a viri i harogi e tamana e kinana ni gi rabalaki.’

11 “Pali mu taki a bakovi ge taki e tamana e kinana, ge ta maea, ‘A maki ta ga habi marua, a ru here pali ge ne vona a Vure.’ 12 Lakea mu hehea nahea ge kori e tamana rua e kinana. 13 Na naro iea kunana, a vilo hosi ne mua, ra mu tovo polo ne huriki, i ratea a nitana Vure a maki tavula. I kupo a maka maki mu rata mavonga.”

14 E Isu i gale valai tabu e huriki, i taki ria, “Mua lobo, mu talangaki valai, mu longokilalea a nitagu. 15  e I uka tara maki ge dili na viri ge ratea ge katoki na matana Vure. A maki i rata a viri ge katoki, a maki i pagitala valai na hatena.”

17 I pe e huriki, i dili na ruma, lakea e huriki a murimuri vona ri ramaia, ri nanea vona a nivakakika iea. 18 Lakea e Isu i taki ria, “Ra mua, i uka ma mu longokilala ma? Ra maki ni kani i uka ma i ratea a viri ge katoki na matana Vure, 19 a vuhuna i uka ma i dili na hatena, i dili kunana na kavutuna, muri i pagitala na kakaina.”

Na ngava iea kunana, e Isu i vakalongo e huriki vona a maki ni kani lobo i kamumu ni kani.

20 I ta lokovonga liu, i ta maea, “A maki i pagitala na bakovi, i manga a maki i taki, a maki i rata, i ratea i katoki na matana Vure. 21 A maki i pagitala na hatena viri, a niluhoi hale, a molenga, a panahoa, a nivarabalaki, a molenga na parangia, 22 a ningutu na maki na viri tara, a nitepu ne huriki lobo, a pusinga, a molenga viliha manga a ligo, a nimasigoro na maki na viri, a nipadimomo, a nigigi tora, a nivarata manga manga tavula. 23 A maka naro hale nga ri pagitala na hatena viri, ri ratea i katoki na matana Vure.”

A Ngatavine o Ponesia

(Mateo 15:21-28)

24 Muri e Isu i malaga, i lakea na tabeke ne Tair rua e Sidon. I dili na ruma tara. I koi vona tara viri ge lohoka vona, pali ia, i uka hini ge kapiloho vona. 25 A ngatavine tara, e tuna ngatavine i dili vona a hanitu, i longo ta e Isu i bele. Lakea i valai malaviriri, i turume tabukoi ne Isu. 26 Ra ngatavine iea, i uka ma a Iuda. Ni poda o Siroponesia. I nana torea e Isu ge lili vurokia a hanitu i dili ne tuna. 27 Lakea e Isu i takia, “E huriki a koma ri gi kani taro. I uka ma i kamumu ni gi bole a maki ni kani ne huriki a koma, ni gi voro lakea na ligo.”

28 Pali a ngatavine i koli, i ta maea, “Bakovi Dagi o ta muholi. Pali a ligo ranga ri kani poi a momona maki i boru puru na dede ne huriki a koma.”

29 Muri e Isu i takia a ngatavine, “O koli kamumu. Pali o hamule. A hanitu i pea pali e tumu.”

30 I hamule na tanga, i masia e tuna ngatavine i mahita na kiri, i pagitala pali vona a hanitu.

A Bakovi Vou

(Mateo 15:29-31)

31 E Isu i malaga na tabeke ne Tair, i laho polo ne Sidon, i lokovonga liu na tabeke ne Dekapolis,
(7:31)A ngava e ‘Dekapolis’ i manga i maea, ‘A Tanga i Ravulu.’
i pagitala na Darilomu e Galili.
32 Na tahuna e Isu i bele vonga, ni tuli valai vona a bakovi i vou, i ngavarubu. Ri taki torea e Isu ge ru langa a limana vona, ge vakamahuria. 33 Lakea e Isu i tuli here lakea na gaga basi ne huriki, i ru dili a kukulimana na tulina bakovi. Muri i kalupe taho a kukulimana i nugua a tabelena bakovi. 34 I mata rike na hunu, i taravango i ta maea, “Epata!” I manga i maea, “Ge mapaga.”

35 I uka ma i tabaka, i kamumu a tulina, i longo a hini, i vakatubu ni ta kavakava. 36  g Lakea e Isu i taki tora ria, nahea ri gi vakalongoa tara viri. I taki tora ria nahea ri gi vakalongo lae. Pali ri vano ria, ri vakalongo lae.

37  h Ri turutu hateka, lakea ri ta maea, “A maki lobo i rata kamumu. I rata e huriki ri vou ri longo, i rata e huriki ri ngavarubu ri ta.”

Copyright information for `BNP