Matthew 17

E Isu i Mareli

(Markus 9:2-13; Lukas 9:28-36)

1Muri na parava i polotara e Isu i tuli kunana e Petrus, e Iakop, e Ioanes e tarine Iakop, to sike na lolo dagi. 2 a  Na tahuna to made meli, e Isu i mareli na matane tou. A matana i para manga a haro, a varakia vona i kea manga a nipara. 3E Moses, e Elaisa ru bele vakaturutu, ru ta turane Isu.

4Lakea e Petrus i takia e Isu, i ta maea, “Bakovi Dagi, i kamumu hateka mete valai koea. Ioe bara o ngaru, ga hae a kape ge tolu. Ne vomu tara, ne Moses tara, ne Elaisa tara.”

5 b  Na tahuna i tabana ni ta, a bubu pangapanga i kavitagu tou. A lohona viri i ta valai na bubu, i ta maea, “A Bakovi iea e Tugu, a hategu. A vivi hateka vona. Moto longo mai a nitana.”

6Na tahuna to longoa a ngava iea, to mangenge, to boru ngala barara puru to kavitagu a matane tou. 7Pali e Isu i padoi tou i ta maea, “Moto pesi rike. Naha ni mangenge.” 8Na tahuna to mata rike, i uka ma to masia tara viri. E Isu kunana i pepesi vonga.

9Na tahuna to laho raga na lolo, e Isu i vakuku tou, i ta maea, “Naha ni vakalongoa tara viri vona a maki moto matai, ge vano ge harena na tahuna a Tuna Bakovi ge pesi rike mule na matenga.”

10 c  Lakea a murimuri nga to nanea, “I navai e huriki a mari na vinara ri takia e Elaisa ge valai muga?”

11E Isu i koli i ta maea, “I muholi, a vinara i takia e Elaisa ge valai muga, ge rata karaba a maki lobo. 12 d  A taki matou, e Elaisa i valai pali. Pali i uka ma ri matakilalea. Ri rata virihi ia vona a maki lobo ri ngaru ni ratana. I mavonga kunana, a Tuna Bakovi tara bara i bole a nimadihi na limane ria.” 13 e  Muri to longokilalea a ngava i takia, i taki virihia e Ioanes, a mari ni vahilolo.

E Isu i Kori Mule a Riau

(Markus 9:14-29; Lukas 9:37-42)

14E huriki ala kupo ri davea e Isu. Na tahuna i luve, a bakovi tara i valai, i turume puru na ngalane Isu, 15i ta maea, “Bakovi Dagi, o dodoa e tugu a bakovi! I bole a nimadihi dagi. Na parava vakaroro i turutu, i boru puru. I boru langa na kanono, i boru puru na naru. 16A bole lakea ne huriki a murimuri vomu, pali ri keri ni koria.”

17E Isu i koli, i ta maea, “Na tahuna mona, i uka tara viri ge luhoi torea a Vure. A narone mua i hale hateka. Ge navai? Ga hatenono mavonga ni dava mua, mu gu luhoi tora iau?” Muri i takia a bakovi iea, i ta maea, “O tuli vilia e tumu.” 18Muri e Isu i tahatea a hanitu. I malaviriri kunana, a hanitu i ha tala vona, i tavaga liu.

19 f  Muri e huriki a murimuri ri valai kapiloho ne Isu ri nanea, “I navai mi keri ni lili talea a hanitu iea?”

20 g  I koli, i ta maea, “A vuhuna i uka ma mu luhoi tora hateka a Vure. A taki muholi mua, bara mu tahoka a niluhoi kiroko manga a vutuna mastad, bara mu takia a lolo iea ge vano ge pesi na hini ranga, bara i longototo. I uka tara maki mu gu keria.”

E Isu i Taki Tabu Ge Mate

(Markus 9:30-32; Lukas 9:43-45)

21 h  Na tahuna e huriki a murimuri ri vapopo o Galili e Isu i taki ria, i ta maea, “A Tuna Bakovi i tabukoi bara ni habi na limane huriki a bakovi, 23ri gi rabalakia. Muri na parava i tolu, bara i mahuri mule.” Na tahuna ri longoa a ngava iea, ri dodo hateka.

A Takis na Roho na Vure

24 i  Na tahuna ri bele o Kapernaum, e huriki a bakovi ni bole a 50 toea takis na roho na Vure ri valai ne Petrus, ri nanea, “Ra mari ni tovo ne mua, i kona kilala a takis na roho na Vure, o i uka?”

25E Petrus i koli, i ta maea, “I kona.” Muri e Petrus i lakea na ruma. E Isu i ta muga, i nanea, “Simon o luhoi navai? A hariki ge bole ne rei a takis? Ge bole ne huriki e tuna, o ne huriki ranga?”

26Lakea e Petrus i koli i ta maea, “E huriki ranga bara ri kona.” Lakea e Isu i takia, “I mavonga e huriki e tuna i uka ma ri kona a takis. 27Pali nahea ri gi maruhu e huriki nga. O vano, o lalu a manu na darilomu. A manu o lalu mugea, o pidea a ngavana, o bole talea a kina ge taku. Muri o vano, o kona a takis ne tarua.

Copyright information for `BNP