Matthew 21

E Isu i Dili o Ierusalem

(Markus 11:1-11; Lukas 19:28-40; Ioanes 12:12-19)

Ri bele tabukoi o Ierusalem ngane, na tanga tara ni gale e Betpage, na dahana lolo e Oliva. Lakea e Isu i rudu a murimuri vona ala rua, i taki rua, “Muru muga lakea na tanga na ngalane marua. Na tahuna muru bele, bara muru masia a donki ni kolotata turana tuna. Muru puga rua, muru lalu valai nau. A viri tara ge nana marua, muru takia e Bakovi Dagi i tahoka a leho ne rua, lakea bara i vakaru valai malaviriri kunana.”

A maki iea i bele, ge bele muholi a ngavana propet hosi, i ta maea,

a  “Mu vakalongo e huriki ri made o Sion, mu ta maea,
‘Mu masia! A hariki ne mua i valai ngane.
A bakovi madoru. I rike na donki,
i rike na tuna donki.’”
Lakea ru vano, ru ramai a ngavane Isu. Ru lalu valai a donki turana tuna. Ru vulala langa na bitone rua a varakia ne rua, lakea e Isu i made langa. E huriki ala kupo ri vulala na dala a varakia ne ria. E huriki ranga ri paku a rahana kai ri vahata na dala. b E huriki ri muga, e huriki ri muri ri vivi vona, ri magulu taku, ri ta maea,

“Si gi kavurikea a hamone Davit!
A Vure ge vakabagetua a viri i valai na rane Bakovi Dagi!
Si gi kavurikea a Vure Meli Liu!”
10 Na tahuna ri dili o Ierusalem, e huriki lobo na tanga iea ri talulu maia, ri vanana, “E rei a bakovi iea?”

11 Lakea e huriki ri laho turana ri koli, ri ta maea, “Ra bakovi iea e Isu, a propet i valai o Nasaret, na tabeke ne Galili.”

E Isu i Lili Tala e Huriki na Roho na Vure

(Markus 11:15-19; Lukas 19:45-48; Ioanes 2:13-22)

12 Ngane e Isu i dili na roho na Vure o Ierusalem, i lili tala e huriki ri vakona, ri vahabi a maki. I pulo ngalatudu a dede ne huriki ri vangoli a moni, e huriki ri vahabi a balu. 13  c I taki ria, i ta maea, “A ngava ni here puru i ta maea, ‘A roho nau bara ni gale a roho na nivasileki,’ pali mua mu ratea a hini ri haniu vona e huriki a panaho.”

14 Muri e huriki a kepa, a vaha hale ri vali vona pololilo na roho na Vure, i vakamahuri ria lobo. 15 Pali e huriki a prister dagi, a mari na vinara na lotu, i madihi a hatene ria na tahuna ri matai a maka maki ni turutu vona e Isu i rata, ri longo e huriki a koma pololilo na roho na Vure ri gale tala, ri ta maea, “Si gi kavurikea a hamone Davit!”

16  d Lakea ri nanea e Isu, “A ngava i taki e huriki a koma kiroko, o longo?”

I koli i ta maea, “A longo. Pali mua, a ngava ni here hosi na Hinere, mu longoa o i uka? Ni here maea:

‘E huriki a koma kiroko, a koma ri ruru, o rata ria ri kavurike ioe.’”
17 Muri i pe ria, i lakea o Betani, i mahita vonga.

A Kai a Pik i Malai

(Markus 11:12-14,20-24)

18 Na hatelanga e Isu i laho hamule o Ierusalem. I vitolo. 19 I masia a kai a pik na dahana dala. I lokovonga maia, pali i uka kanena. A pagana kunana. Lakea i takia a kai, i ta maea, “I uka ma go vua tabu!” Malaviriri kunana, a kai i malai.

20 Na tahuna e huriki a murimuri ri masia, ri turutu, ri nana, “Ra kai a pik iea, i malai malaviriri navai?”

21  e E Isu i koli, i ta maea, “I muholi hateka, e rei a viri i luhoi tora, i uka ma i loho ruarua, ia tara bara i takia a kai ge malai. A maki kiroko nga. Bara i rata tabu a maka maki dagi. Bara i takia a lolo iea, ‘O malaga rike, o to na utu.’ bara i longototo. 22  f Mua bara mu luhoi tora, bara ni habi ne mua a maki mu vasileki vona.”

E Rei i Habi a Nitora ne Isu?

(Markus 11:27-33; Lukas 20:1-8)

23 Muri e Isu i dili na roho na Vure, i vara e huriki. E huriki a prister dagi, a bakovi dagi ri valai vona, ri nanea, “O bole vai a nitora o rata a maki nga? E rei i taki ioe go rata a maki nga?”

24 E Isu i koli, i ta maea, “Ga nana taro mua. Mua bara mu koli visia a ninana iea, bara taki mua vona e rei a viri i habi nau a nitora ni rata a maki nga. 25 A ninana nau i maea, ra hilova ne Ioanes, i valai na Vure, o i valai na bakovi tavula kunana?”

Ri vata, ri ta maea, “Bara si takia a leho vona i valai na Vure, bara i nana, ‘Pali i navai i uka ma mu luhoi tora ia?’
26  g Pali bara si takia i valai na bakovi kunana, bara si mangenge ne huriki, a vuhuna ri luhoia e Ioanes a propet.”

27 Lakea ri ta maea, “I uka ma mi lohoka vona.”

Muri e Isu i ta maea, “Iau tara, i uka ma ga taki mua vona e rei a viri i habia nau a nitora ni rata a maki nga.”

A Nivakakika na Koma ala Rua

28 Muri e Isu i taki e huriki a prister dagi, e huriki a bakovi dagi nga, i ta maea, “Mu luhoi navai? A bakovi tara i tahoka e tuna bakovi ala rua. I takia a tabua i ta maea, ‘Tugu, mona o vano o leho na hania na vain.’

29 “A tabua i koli, i ta maea, ‘A koi.’ Pali muri i dodo, i pulo a niluhoi vona, i vano, i leho.

30 “Muri e tamane rua i takia a pahamuri tabua ge leho na hania. A koma i koli, i ta maea, ‘Bakovi dagi, bara vano.’ Pali i uka ma i vano ge leho.

31 “E rei ne rua i muri mai a ngavane tamane rua?” Ri koli, ri ta maea, “A tabua.”

Lakea e Isu i taki ria, “A taki muholi mua, e huriki a bakovi ni bole a takis, e huriki a ngoi bara ri dili muga ne mua na harikianga na Vure.
32  h A ta maea, a vuhuna e Ioanes i valai i vakasiri mua vona a naro malamala, pali i uka ma mu longo maia. Pali e huriki a bakovi ni bole a takis, e huriki a ngoi ri longo maia. Pali mua, na tahuna mu matai e huriki nga ri longo maia, i uka ma mu pulo a vilone mua mu gu longo maia.”

A Nivakakika na Vora Hale

(Markus 12:1-12; Lukas 20:9-1)

33  i  “Mu longo tabu tara nivakakika: A tahona malala tara i varoa a hania na vain vona. I tura haluia na nure. I kelia a lovo, i kisia a tabeke ni paha bebe a vain vona. I haea a roho tagari. Muri i habia a hania ne huriki a bakovi ranga ri gi leho taro vona, i vano i havai na robo basi ia. 34 I tabukoi ngane a keva ni mirio a vain, lakea i rudu e huriki a vora vona, ri gi bole ne huriki a mari ni leho a kanena vain.

35 “Pali ri lakavu e huriki a vora vona. Ri ubia tara, ri rabalakia tara, ri padimatea na kedo tara. 36 Muri i rudu tabu e huriki a vora ranga, ri ala kupo popote ne huriki muga. Pali e huriki a bakovi na leho ri ratapile tabu ria. 37 Ngane a tahona malala i rudua e tuna. I luhoi maea, ‘Bara ri togoa e tugu.’

38  j  “Pali na tahuna ri masia e tuna, ri vata, ri ta maea, ‘A bakovi iea bara i bole a murine tamana. Si gi rabalakia, si gi bolea a hania na vain na tahuna e tamana i mate.’ 39  k Lakea ri lakavua, ri voro talea na hania na vain, ri bimatea.

40 “Mu luhoi navai? A tahona hania na vain, ge rata navai e huriki a bakovi na leho nga na tahuna i hamule valai?”

41 Ri koli ri ta maea, “Bara i rabalaki e huriki a bakovi hale nga. Muri bara i habia ne huriki a bakovi na leho ranga a hania na vain vona. Pali na tahuna na nimirio, bara ri habi mule na tahona malala ranga kanena vain.”

42  l Lakea e Isu i taki ria, i ta maea, “A ngava ni here puru na Hinere, i maea,

‘Ra kedo e huriki a mari ni hae a ruma ri marikoi vona,
ngane i bele a vuhu kedo ni hae a ruma vona.
A rabu iea, e Bakovi Dagi i ratea,
i mata kamumu hateka na matane hita.’
“Ra mua, mu longo pali a ngava iea, o i uka?
43 I mavonga a taki mua, a harikianga na Vure bara ni bole hamule ne mua, bara ni habi ne huriki ri rata a maki a Vure i ngaru na harikianga vona. 44 E rei a viri i boru langa na kedo iea bara i bole a vuranga. Na tahuna a kedo iea ge boru tahoa a viri, bara i ubi momoa.”

45 Na tahuna e huriki a prister dagi, e huriki a Pariseo ri longoa a nivakakika iea, i padi ria a mana vona e Isu i taki virihi ria. 46 Lakea ri matakana a dala ri gi lakavua. Pali ri mangenge a vuhuna e huriki ri takia e Isu a propet.

Copyright information for `BNP