Matthew 4

A Hanitu i Tonia e Isu

(Markus 1:12-13; Lukas 4:1-13)

a  Na parava tara a Hanu Kiripiripi i rudua e Isu ge lakea na tabeke i ngeki, a hanitu ge tonia vonga. b E Isu i peremu a maki ni kani na parava i ravulu va, a rodo i ravulu va. Lakea i vitolo. A bakovi ni toni e huriki i bele vona, i takia, “Ge ioe a tuna Vure, o taki a kedo nga ri gi mapulo ri gi manga a bret.”

c E Isu i koli, “A ngava ni here puru na Hinere, i ta maea, ‘A bakovi i uka ma ge mahuri na maki ni kani kunana. A bakovi bara i mahuri na tahuna i longototo a ngava lobo na Vure.’”

Muri a hanitu i tulia e Isu, i vakapesi langea na mapana roho na Vure o Ierusalem, d i takia, “Ge ioe a Tuna Vure, o to raga, a vuhuna a ngava ni here puru na Hinere i maea,

‘A Vure bara i rudu e huriki a agelo vona, ri valai ri matakari ioe.
Ri gi bole rike ioe na limane ria,
ma ge padi a vahamu a kedo.’”
e Lakea e Isu i koli mule, i ta maea, “Ni here puru tabu na Hinere, i ta maea,

‘Naha ni tonia e Bakovi Dagi, a Vure vomu.’”
Muri a hanitu i tuli tabua e Isu, ru lakea na mapana lolo dagi tara. I vakasiria vona a tanga lobo na malala, a bagetua ne ria. Lakea a hanitu i takia, “Ioe bara o turume puru, o vasileki nau, bara habi vomu a maki lobo nga.”

10  f Lakea e Isu i takia, “Satan, o ha nau! A ngava ni here puru na Hinere i maea, ‘O kavurikea e Bakovi Dagi, a Vure vomu, o ramai kunana ia.’”

11 Muri a hanitu i ha taroa. I valai ngane e huriki a agelo ri tuhoria.

E Isu i Vakatubu ni Vara

(Markus 1:14-15; Lukas 4:14-15; Ioanes 4:3,43-45)

12  g Na tahuna e Isu i longoa a velengane Ioanes ni ru dili na bavi, i hamule lakea o Galili. 13 I malaga o Nasaret, i vano i made o Kapernaum, a tanga tabukoi na darilomu na malala ne huriki a kabu ne Sebulun e Naptali. 14 Ngane i bele muholi a ngava ni taki polo na propet, e Isaia, i ta maea,

15  h “E huriki ri made na malala ne huriki a Sebulun, e huriki a Naptali,
a dala i pori lakea na dari, na tabeke tara na naru e Iordan,
a robo e Galili, ra i made vona e huriki i uka ma ria a Iuda,
16 e huriki ri made na uvo
ri masia a nipara dagi;
e huriki ri made na maniru na matenga,
a nipara i parai ria.”
17  i Ngane e Isu i vakatubu ni vara maea, “Mu pulo a vilone mua. A harikianga na hunu i tabukoi ge bele.”

E Isu i Gale e Huriki a Murimuri

(Markus 1:16-20; Lukas 5:2-11; Ioanes 1:35-42)

18 Na parava tara, e Isu i lalaho na gagana Darilomu e Galili, i matai e maki tari rua, e Simon (a rana tara e Petrus), turana e tarina e Andreas. Ru ru a vuko, a vuhuna rua a tahodari. 19 Lakea e Isu i gale rua, i ta maea, “Muru valai, muru muri nau. Ga tovo marua ni tuli valai nau e huriki a bakovi, i manga a hini ngane muru lakavu a manu.” 20 Ru malaviriri kunana ru pea a vuko ne rua, ru muri maia.

21 I laho lokovonga, i matai tabu e maki tarina rua, e Iakop e Ioanes. Ru made na aga turane tamane rua, e Sebedi, to hono a vuko. Lakea e Isu i gale rua. 22 Ru malaviriri kunana ru pea e tamane rua na aga, ru ramaia e Isu.

E Isu i Vakamahuri e Huriki Ri Giloa

(Lukas 6:17-19)

23  j Muri e Isu i lakea na maka tanga na tabeke ne Galili, i dili na maka roho na vaponga, i vara e huriki na Velenga Kamumu na harikianga na hunu. I vakamahuri e huriki lobo ri tahoka a gilanga. 24  k A velengana ni longo na tanga lobo na tabeke ne Siria, lakea e huriki ri tuli valai ne Isu e huriki ri giloa na gilanga vilihaliha, e huriki ri tahoka a nimadihi dagi, e huriki i dili ne ria a hanitu, e huriki ri matemate, e huriki a beu. Ri tuli valai vona, i kori ria lobo. 25  l E huriki lobo o Galili, o Dekapolis, o Ierusalem, o Iudea, na tabeke tara ne Iordan, ri muri vona.

Copyright information for `BNP