Numbers 17

E BAKOVI DAGI Kunana i Vulakia e Aron

E BAKOVI DAGI i takia e Moses, “O taki e huriki a Israel ri gi habi vomu a kodo ge ravulu a polona i rua (12), ge bole a murina a maka kabu ne Israel. O here puru a rana gare na kodo ne ria takutaku. Ne huriki a hamone Levi, o herea a rane Aron na kodo. Muri o ru a maka kodo nga pololilo na Kape na Vaponga tabukoi na Tava na Ngava Dagi, na tabeke a tagui bala mua vona. A tuvu bara i gaga rike na kodo na viri a vulakia. Bara ri masia a kodo iea, ri lohoka vona, a vulakia pali a bakovi ge leho manga a prister. Na naro iea kunana, iau bara tangokapi a ngavane huriki a Israel, i uka ma ri gi ta barangungu mai ioe, i manga a hini ngane ri rata.

E Moses i habia ne huriki a Israel a nita iea, lakea e huriki a matakari takutaku ri habi a kodo ne Moses. A kabu i taku i tahoka a kodo i taku. A kodo lobo i ravulu a polona i rua. A kodo i vona a rane Aron ni ru turana a kodo ne huriki a kabu. Muri e Moses i bole a maka kodo i ru tabukoi na Tava na Ngava Dagi na matane BAKOVI DAGI pololilo na kape.

a Na parava muri e Moses i dili na kape. I masia a kodo i vona a rane Aron, a kodo ne huriki a Levi, i tuvu i tahoka a vuana i vakabele a kanena kai a almon, ri rara pali. E Moses i bole a maka kodo ri tabuli na matane BAKOVI DAGI, i kaloho tala i vakasiri e huriki a Israel. Ri matai pali, muri i valai e huriki a matakari ri bole mule a maka kodo ne ria.

10 E BAKOVI DAGI i takia e Moses i ta maea, “A kodo i tahoka a rane Aron o bole mule lakea na kape o ru tabukoia na Tava na Ngava Dagi, ge a kilakila ge rata e huriki a bakovi a ngatavine na tagenga ri gi luhoi kamumu. Ra naro iea bara i vakalobo a nita barangungu ne ria, i uka ma ri gi tapuhaki tabu ne nau.” 11 Lakea e Moses i ramai a ngava e BAKOVI DAGI i vakukua vona.

12 Muri e huriki a Israel ri takia e Moses, “Ngane bara mi bole a nimadihi. 13 E rei a viri i lakea tabukoi na Mailo ne BAKOVI DAGI, bara i mate. Na naro iea kunana bara mi mate.”

Copyright information for `BNP