Numbers 18

A Leho ne Huriki a Prister, a Levi

E BAKOVI DAGI i takia e Aron, “Na tahuna ioe, turana e huriki a Levi, e huriki e tumu, i uka ma mu rata kamumu a leho na Mailo nau, bara mu tahoka a maregoa mu bole a vuranga vona. Pali ioe turane huriki e tumu mu rata a naro hale na leho na prister, bara mu bole a maregoa vona. O bole e huriki a bakovi na kabu vomu e Levi, ri gi leho turamu ri gi tuhori ioe, na tahuna ioe turane huriki e tumu mu leho na kape na Ngava Dagi. Ri gi rata a maka leho o habi ne ria, a maka leho ne ria na kape. Pali nahea ri gi padoi a maka maki ri tabuli na Tabeke Nitaba o ri tabuli na dede. Ria ri gi padoi a maki nga, ioe turane ria bara mu mate. E huriki a Levi kunana ri gi leho turamu ri gi rata muholi a leho pololilo na Kape na Vaponga. E huriki a mosi i uka ma ri gi valai tabukoi vomu.

“Ioe turane huriki e tumu bakovi kunana mu leho pololilo na Tabeke Nitaba na dede, lakea i uka ma ge madihi a hategu ne mua e huriki a Israel, i uka ma ga rata hale mua tabu. Mu longo, iau kunana a vulaki e huriki na kabu vomu, e Levi, na kurukurune huriki a Israel, a habi tavula ria vomu turane huriki e tumu bakovi. Re huriki nga, ria bakovi nau kunana, ri gi rata a leho pololilo na Kape na Vaponga. Pali ioe turane huriki e tumu bakovi kunana mu rata a maka leho na prister pololilo na Tabeke Nitaba. A leho na prister a habi tavulea ne mua. Ra leho na dede, a leho na tabeke ni taba, a leho ne mua. A bakovi tara i uka ma a vulakia i valai ge ratea a leho iea, ni gi rabalaki.”

A Kinani ne Huriki a Prister

E BAKOVI DAGI i takia e Aron i ta maea, “Iau kunana a ru ioe a prister go matakari a nihabi malamala e huriki a Israel ri habi nau. A habi a maki ni taba lobo vomu turane huriki a hamomu. Ra naro iea ni gi rata vakaroro. A maka nihabi a taba hateka, naha ni gutu na dede, o bole, ra nihabi na vit, a nihabi na naro hale, a nihabi na rarenga. A maka maki e huriki ri habi nau ge a nihabi, a habi vomu turane huriki e tumu. 10 Mu kani a nihabi nga a taba. E huriki a bakovi ri gi kani, ri gi luhoi ra maki nga a maki malamala.

11 “Mu bole a maka nihabi ranga, e huriki a Israel ranga ri habi nau, ra nihabi na nitabari. A maki ni kani nga a habi vomu ne huriki e tumu na parava vakaroro. E huriki na kabu vomu ri matapado pali na matagu, ri gi kani a kania nga.

12 “Iau bara habi tabu ne mua a maki ri moro muga na hania na oliv, na vain, na vit na pida takutaku. 13 Ra maki ri moro muga muga, ne vone mua kunana. E huriki a bakovi a ngatavine na kabu vomu ri matapado na matagu, ri gi bole ri gi kani. 14  a A maka maki e huriki a Israel ri habi nau a ta kari ria vona, i uka ma ri gi kona mule, ne vone mua kunana.

15 “E huriki a tabua ne huriki a Israel, a maka tabua na sipsip a bulmakau, ra ri habi ne BAKOVI DAGI, a habi vomu. Ri gi kona mule e huriki a tabua ne ria, turana maka tabua na livoa i uka ma ri matapado na matagu. 16 E huriki a Israel ri gi kona mule e huriki e tune ria ri tahoka a keva i taku na silva sekel i lima, i ramai a nimavana sekel na kape na tahuna iea.

17 “Pali i uka ma ri gi kona mule a tabua na bulmakau, a sipsip a meme, a vuhuna ni taba ria. Mu rabalaki ria, mu voro tamali na dede a darane ria, mu gutu na dede a vine ria, ge a nihabi. Na tahuna a burongi a mangina a nihabi nga, bara ngarua. 18 A bobona nihabi nga, ne vone mua kunana, i manga a siana, a pona a kanena, a maka nihabi na nitabari ranga. 19 Ra maka nihabi e huriki a Israel ri habi nau, ngane a habi vomu turane huriki e tumu na parava vakaroro. A ngava muholi iea a ratea turamu turana e huriki a hamomu, ge tabuli vakaroro na matagu.”

20 Lakea e BAKOVI DAGI i takia e Aron i ta maea, “Naha ni bole ranga tabekena malala ne Israel, ge ne vone huriki e tune mua. A vuhuna, a maki mu bala vona, bara mu bole nau, iau e BAKOVI DAGI.

E BAKOVI DAGI i Matakari e Huriki a Levi

21  b “Na tahuna e huriki a Israel ri bole valai nau a naguna maki ni kani i ravulu, bara habia ne huriki a Levi a naguna i taku. Ra naguna iea i manga a mapane ria ri rata a leho ni matakari a Kape na Vaponga. 22 Na parava vakaroro muri ma, e huriki a Israel nahea ri gi valai tabukoi na Kape na Vaponga, ma ri gi tahoka a ngava, bara ri mate. 23 Pali e huriki a Levi kunana ri gi matakaria a Kape na Vaponga. E rei a viri i putu puru a vinara na kape, e huriki a Levi kunana bara ri bole a nimadihi vona. Ra vinara iea ge tabuli vakaroro. E huriki a hamomu ranga ri gi ramaia. E huriki a Levi ri uka malala, a kabu ranga na Israel ri tahoka. 24 Na tahuna e huriki ri ru kadolu a maki na naguna i ravulu, ri habia nau a naguna i taku ge a nihabi nau, a habi poloa ne huriki a Levi. Na naro iea kunana a taki ria vona pali, i uka ma ri gi bole a tabekena malala pololilo ne Israel.”

25 E BAKOVI DAGI i takia e Moses, 26 “O taki e huriki a Levi o ta maea, ‘E huriki a Israel ri gi ru na naguna ge ravulu a maki ni kani, a naguna ge taku ri gi habia ne mua. Mu bolea a naguna iea mu ru tabu na naguna ge ravulu, muri mu habia ne BAKOVI DAGI a naguna ge taku. 27 E BAKOVI DAGI ge masia a nihabi iea ge manga a nihabi na vit karaba, a vain karaba, e huriki ri habi vona. 28 Mu rata mavonga, mua ranga bara mu habi a nihabi ne BAKOVI DAGI. Ra tabekena ne BAKOVI DAGI, muri mu habia ne Aron. 29 Mu veru kamumu a maka maki ni kani mu bole, mu vulaki tala a maki i kamumu hateka ge ne vona e BAKOVI DAGI.’

30 “O taki e huriki a Levi o ta maea, ‘Na tahuna mu habi lobo a maki ni kani kamumu ne BAKOVI DAGI, mu kani a kalavana i tababana, i manga e huriki a Israel ri kani a kalavana vit a vain, muri na nihabi i ratea ne BAKOVI DAGI. 31 Ra maki ni kani nga, i manga a mapa ne mua mu rata a leho pololilo na Kape na Vaponga. I mavonga mua, turane huriki a kabu ne mua, mu vano mu kani a kalavana maki ni kani na hini lobo. 32 Mu habi muga a maki ni kani kamumu, bara mu uka ngava. Pali i uka ma mu habi muga, mu kani, bara mu vakahale a nihabi ni taba ne huriki a Israel. Ngane mu tahoka a ngava, bara mu mate.’”

Copyright information for `BNP