Numbers 25

E Pinias i Vakalobo a Rongova na Vure

Na tahuna e huriki a Israel ri made na maloku ne Sitim, lakea e huriki a bakovi o Israel ri tubu ni rata a narona molenga turane huriki a ngatavine o Moab. Re huriki a ngatavine nga ri gale e huriki a bakovi o Israel ri gi rata a nihabi i lakea na maka vure ne ria, ri lokovonga ne huriki a Moab ri kani turane ria, ri turume na ngalana vure ne ria. Lakea e huriki a Israel ri rihi a vure e Bal o Peor, lakea e BAKOVI DAGI i tahate ria.

Muri e BAKOVI DAGI i takia e Moses, i ta maea, “O turari lobo e huriki a matakari ne mua e huriki a Israel, ra ri rata a naro hale, o vakatavore ria, o rabalaki ria na matane BAKOVI DAGI na haro. Bara mu rata mavonga ge lobo a rongova nau ne huriki a Israel.”

Lakea e Moses i taki e huriki a mari ni pelekado ne Israel i ta maea, “Mua takutaku mu rabalaki lobo e huriki na kabu ne mua ra ri rihi e Bal o Peor.”

Na tahuna e Moses turane huriki a bakovi a ngatavine ri tangi tabukoi na matana Kape na Vaponga, ri masia tara bakovi o Israel i bolea tara ngatavine o Midian i dili turana na kape vona. Na tahuna e Pinias, e tune Eleasar e tubune Aron a prister, i matai rua, i pe e huriki a bakovi a ngatavine, i vano i bole a maheto vona, i muri mai rua i dili na kape na bakovi iea, i paditata rua na maheto ru mate. Muri i lobo a gilanga dagi, ra i ratapile e huriki a Israel. E huriki ala 24,000 ri mate.

10 Lakea e BAKOVI DAGI i takia e Moses i ta maea, 11 “E Pinias, e tune Eleasar e tubune Aron a prister, i vakalobo liu a rongova nau ne huriki a Israel, i rabalaki rua pali, ngane a uka a rongova ne ria. I bage ne huriki a Israel, i manga iau a bage ne ria. I mavonga i uka ma ga vakalobo liu ria. 12 I mavonga o takia e Pinias, ngane iau a rata a ngava dagi na nivalemu turana. 13 A ngava dagi iea ne vona e huriki a hamona, ri gi leho vakaroro manga a prister nau, a vuhuna e Pinias i bage ne huriki a Israel, i ramai a narona Vure vona. A naro e Pinias i ratea i kavitagu e huriki a Israel.

14 A bakovi o Israel e Pinias i rabalakia turana a ngatavine o Midian, a rana e Simri. E Simri e tune Salu, a hamone Simion, ia a gare na kabu vona. 15 A ngatavine o Midian, a rana e Kosbi e tune Sur, a gare ne Midian.

16 Muri e BAKOVI DAGI i takia e Moses i ta maea, 17 “Mu vano mu rata tuhare e huriki a Midian mu rabalaki ria, 18 a vuhuna ri vakamarego mua na tahuna ri tami mua na narone kurabane ria, e Kosbi, e tuna ngatavine na bakovi dagi tara o Midian. Ra ngatavine iea, ni rabalaki na tahuna a gilanga dagi i bele, a vuhuna a maka naro i bele o Peor.”

Copyright information for `BNP