a10:4Dan 12:4,9
c10:7Amo 3:7
d10:9Ese 2:8–3:3

Revelation of John 10

A Agelo Turana a Buk Kiroko

Muri a matai tabu tara agelo hateka i puru valai na hunu. A bubu i kavitagua. A kuriki i pesi haluia a gina. A matana i para manga a haro. A vahana ru para manga a kanono. I nugua a raukea ni veve na limana a kanena. A vahana a kanena i vakapesi langea na dari. A vahana a maurina i vakapesia na malala. I gale tala dagi hateka, i manga a laion i roro, lakea a kururu i polorua ri koli. a Na tahuna a kururu i polorua nga ri koli, ta ga here puru a ngava ri taki, pali a longo tabu a lohona viri tara i ta valai na hunu, i ta maea, “Naha ni here a ngava na kururu i polorua nga. O ruhulolo kunana.” b Muri a agelo, ra i pesi na dari a vahana tara, na malala a vahana tara, i toto rike na hunu a limana a kanena, i kaba na rana Viri i mahuri vakaroro, ra viri i ratarike a hunu, a maka maki lobo pololilo vona, turana malala, a maka maki i tabuli vona, turana dari, a maka maki i tabuli pololilo vona. I kaba, i taki i uka tabu ni dava, c a vuhuna na tahuna a poloruana agelo ge vaki a tavure vona, a niluhoi kapiloho na Vure ge bele muholi. Ge bele manga kunana a Velenga Kamumu a Vure i vakalongo ne huriki a vora vona, re huriki a propet.

Muri a longo tabua a lohona viri, ra a longo muga, i ta valai na hunu, i ta maea, “O vano, o bolea a raukea ni veve puru pali, ra i tabuli na limana agelo i pesi langa na dari, a malala.” d Lakea a vano maia a agelo, a takia ge habia nau a raukea. Lakea i taki iau, i ta maea, “O bolea, o kania. Bara i ratea a tamudimu ge madihi, pali bara i namika na ngavamu, i manga a ame.” 10 A bolea a raukea na limana agelo, a kania. I namika manga a ame, pali na tahuna a kani loboa, i madihi a tamudigu. 11 Muri ni taki iau, “O ta propet tabu, o vakalongo e huriki vona a Vure ge rata navai na kabu i kupo, a robo i kupo, e huriki ri ta na tabele legelege, a hariki i kupo.”

Copyright information for `BNP