Revelation of John 13

A Livoa Muga

a Muri a masia tara livoa i pagitala na dari. A mapana i polorua. A pelengana i ravulu, i tabuli ne ria a tama hariki i ravulu. Ni here na maka gina takutaku a maka rana. A pelegona rana nga ri ta hale na Vure. b A livoa iea i mata manga a pusi dagi tara ni gale a lepad. A vahana i manga a vahana bea. A ngavana i manga a ngavana laion. A mata dagi i habi a nitora dagi vona, i habia a gula hariki vona, a nitora ni matakari. c A gina tara i mata manga i tahoka a harena bainat i mate vona, pali ni vakamahuri pali, a harena bainat i mavu pali. E huriki lobo na malala ri turutu vona, ri ramaia e Livoa iea. Ri kavurikea a Mata Dagi, a vuhuna i habi ne Livoa a nitora. Ri kavurike tabua e Livoa, ri ta maea, “I uka tara viri i manga a Livoa iea. E rei i kara ni vaubi turana?”

d A Vure i mata taroa e Livoa, i bibi rike mulea, i harogia a Vure. Ni habi a nitora vona ge matakari e huriki na keva i ravulu va a polona i rua (42). Lakea i harogia a Vure, i harogia a rana, i harogia a murina a Vure i made vona, i harogi e huriki ri made na hunu. e A Vure i mata taroa, i vaubi turana e huriki a tara na Vure, i mulangi. I habi a nitora vona ge matakari e huriki lobo na malala, e huriki a kabu lobo, a kuli lobo, a maka tabele lobo, a maka robo lobo na malala. f E huriki lobo na malala bara ri kavurikea e Livoa. Pali e huriki a rane ria ni here dili muga na nidoko na malala na buk na nimahuri na Sipsip, i uka ma ri gi kavurikea.
(13:8)A nita Grik i uka ma i kavakava hateka, ge tabuli vai a ngava e ‘muga na nidoko na malala.’ A pelegona tara bara i maea: “E huriki lobo na malala ri gi kavurikea, re huriki a rane ria i uka ma ni here dili na buk na nimahuri na Sipsip, ra ni rabalaki hosi, muga na nidoko na malala.” I manga i maea, a Vure i lohoka muga na nidoko na malala ge rudu vilia e Tuna ge mate na murine hita. O masia ne 1 Petrus 1:19-20.


E rei a viri i ngaru ni longokilala, ge longo kamumu, ge luhoi kado:

10  h E huriki ni gi lakavu,
bara ni lakavu ria.
E huriki ni gi rabalaki na bainat,
bara ri mate na bainat.
I mavonga, e huriki a tara na Vure ri gi hatenono, ri gi luhoi torea a Vure.

A Ruana Livoa

11 Muri a matai tabua tara livoa, i pagitala valai na malala. A pelengana i rua, i manga a tuna sipsip. A nitana i manga a nitana Mata Dagi. 12 I tahoka a nitora manga e Livoa muga, i matakari na rana. I rata e huriki lobo na malala ri kavurikea e Livoa muga, ra viri ni padi a gina, pali i mahuri mule. 13  i A ruana livoa i rata a maka nivakasiri dagi. A nivakasiri tara i ratea, i vakaboru na hunu a kanono, na matana e huriki a bakovi a ngatavine. 14 Ni mata taro ge rata a maka nivakasiri na murina Livoa muga, lakea i tami e huriki lobo na malala, i taki ria ri gi kau a hanuna Livoa iea, ne vona ni togoa e Livoa, a harena bainat i tabuli na gina, pali i uka ma i mate, i mahuri. 15 Ni mata taro ge ratea a hanuna Livoa iea ge mahuri, ge ta, ge vakuku ni gi rabalaki e huriki ri koi ni kavurike a hanune Livoa iea. 16  j A ruana Livoa i vakuku e huriki lobo, e huriki a bakovi dagi, e huriki a bakovi tavula, e huriki ri tahoka a mahala, e huriki a matasia, e huriki a vora, e huriki i uka ma ria a vora, e huriki lobo ni gi ru a kilakila na limana kanene ria, o na dumene ria. 17 A kilakila iea, a rane Livoa muga, o a namba na rana. E rei a viri i uka kilakila, i uka ma ge kona a maki, i uka ma ge habi a maki ni gi kona. 18 Mu luhoi kamumu. A viri i tahoka a lohokanga dagi ge luhoi kado a namba ne Livoa. A namba vona a namba na bakovi tara, ra 666.

Copyright information for `BNP