Revelation of John 17

A Ngatavine a Ngoi e Babilon

a Muri a agelo tara, a turane huriki a agelo ala polorua, ra ri guru tala a tavila i polorua, i valai, i taki iau, “O valai, ga vakasiri ioe vona a Vure ge vakamadihi navai a ngoi dagi, ra i made langa na naru i kupo.
(17:1)E Babilon i tahoka a naru i kupo.
c E huriki a hariki na malala ri rata hateka a naro na molenga turana. Ngane ri manga, i manga a viri i ninu a naru vagole, i manga.” d Lakea a Hanuna Vure i bele tora nau, a agelo i kaloho iau, miri lakea na tabeke i ngeki. A masia vonga a ngatavine i made langa na livoa vururu. Ni here vona a maka rana ri ta hale na Vure. A livoa iea, a mapana i polorua, a pelengana i ravulu. e A ngatavine i rodoa a varakia kuakua, vururu. I bagetu vona a maki ni rata na gol, a kedo mata kamumu, a meki. I nugu a kikei ni rata na gol, i vonu vona a naru katoki, ra i manga a kanena naro katoki vona ni mole. A rana ni here na dumena matana, i tahoka a pelegona kapiloho. Ni here maea,

“A tanga dagi e Babilon.
E kinane huriki a ngoi,
a kinana maka naro katoki na malala.”
f A masia a ngatavine iea, i ninu pali a darane huriki a tara na Vure, a dara ne huriki ri mate a vuhuna ri vakalongo e huriki ne Isu. I ninu a darane ria, i manga.

Na tahuna a masia, a turutu.
g Pali a agelo i taki iau, i ta maea, “I navai o turutu? Ga taki ioe vona a pelegona kapiloho na ngatavine iea, turana livoa i rike vona, i tahoka a mapana i polorua, a pelengana i ravulu. h Ra livoa o masia, hosi i made, pali ngane i uka. Ngane i popote ge sike valai na lovo i marangeo, ni gi ratapile. E huriki ri made na malala, re huriki, a rane ria i uka ma ni here dili na buk na nimahuri muga na nidoko na malala, bara ri masia a livoa iea, ri ngapa, a vuhuna i muga i made, pali ngane i uka ma i tabuli, pali muri ma bara i bele tabu.

“Mu luhoi kamumu. A mapana livoa i polorua ri manga a lolo i polorua, ra i made ne ria a ngatavine iea. 10 A maka mapana livoa iea, ri manga tabu a hariki ala polorua. A hariki ala lima ri mate pali. Tara i made ngane. Pali a viri tara i uka ma i bele ma. Na tahuna i bele, i uka ma ge made tabaka.

11 “Pali a livoa, ra i made muga, pali ngane i uka ma i tabuli, i manga a polotoluna hariki. Ia e turane huriki a hariki ala polorua. Pali bara ni ratapile.

12  i “A pelengana livoa i ravulu o matai pali, ri manga a hariki i ravulu. I uka ma ri bole ma a nitora. Muri ma bara ri bole a nitora ni matakari, manga a hariki. Bara ri matakari turana e Livoa na parava popote kunana. 13 E huriki a hariki nga ri tahoka a ningaru i taku kunana. Bara ri habi na livoa a nitora ne ria ni matakari. 14 Bara ri vaubi na Tuna Sipsip, lakea a Tuna Sipsip bara i ratapile ria, a vuhuna ia a Bakovi Dagi ne huriki a bakovi dagi. Ia a Hariki ne huriki a hariki. I gale e huriki ri laho turana, i vulaki ria, ri rata a maki lobo i taki ria ri gi rata.”

15 Muri a agelo i ta maea, “A maka naru o masia a ngoi i made langa ne ria, ri manga e huriki a bakovi a ngatavine na robo lobo, na tabele lobo na malala. 16  j Pali a livoa, ra o masia baroko, turana pelengana, bara ri marikoi a ngoi iea. A livoa tara, ge marikoi vona. Bara ri ratapilea, ri kali tala a varakia vona, ge bobo. Bara ri kani a bobona, ri gutua na kanono ge lobo. 17 Ri gi rata mavonga, a vuhuna a Vure i habi a niluhoi ne ria ri gi rata mavonga, ri gi ratea a ningaru na Vure, ri gi tahoka a ningaru i taku kunana, ri gi habi na livoa a nitora ne ria ni matakari, ge matakari, ge vano ge harena na tahuna a nitana Vure i bele muholi.

18 “Pali a ngatavine, ra o masia baroko, i manga a tanga dagi i matakari e huriki a hariki na malala.”

Copyright information for `BNP