a7:1Jer 49:36; Dan 7:2
b7:3Ese 9:4,6; Kap 9:4
c7:4Ese 9:4; Kap 14:1,3
f7:14Dan 12:1; Mat 24:21
g7:16Ais 49:10
h7:17Sng 23:2; Ais 25:8; Kap 21:4

Revelation of John 7

E Huriki a Israel ala 144,000 Ri Bole a Kilakila

a Muri a masia a agelo i va ri pesi na harena malala i va, ri kapi kari a vilu na malala i va, nahea ri gi ngalu a malala, a dari, a maka kai. Muri a masia a agelo tara i valai na nirikena haro. I nugua a kilakila na Vure Mahuri, i gale tala dagi, i taki a agelo i va, ra ni habi ne ria a nitora ni ratapile a malala a dari, b i ta maea, “Mu dava. Naha ni rata hale ma a malala, a dari, a maka kai. Mi gi ru taro a kilakila na Vure ne teu na dumene huriki a vora vona.” c Muri a longo ri ala riva e huriki ni ru a kilakila ne ria. Ri ala 144,000, ri valai na kabu lobo ne Israel.

Ri ala 12,000 ri valai na kabu ne Iuda ni ru a kilakila ne ria.
Ri ala 12,000 ri valai na kabu ne Reuben.
Ri ala 12,000 ri valai na kabu ne Gad.
Ri ala 12,000 ri valai na kabu ne Aser.
Ri ala 12,000 ri valai na kabu ne Naptali.
Ri ala 12,000 ri valai na kabu ne Manase.
Ri ala 12,000 ri valai na kabu ne Simeon.
Ri ala 12,000 ri valai na kabu ne Levi.
Ri ala 12,000 ri valai na kabu ne Isakar.
Ri ala 12,000 ri valai na kabu ne Sebulun.
Ri ala 12,000 ri valai na kabu ne Iosep.
Ri ala 12,000 ri valai na kabu ne Bensamin.

A Tara Dagi na Tanga Lobo na Malala

Muri a matai a tara dagi hateka, ni keri ni gi! Ri valai na robo lobo na malala, na kabu lobo na malala, na kuli lobo na malala, na tabele lobo na malala. Ri pesi na ngalana gula hariki, na ngalana Tuna Sipsip. Ri rodo a varakia ola keakea, ri nugu a pagana niu. 10  d Ria lobo ri gale dagi, ri ta maea,

“A Vure ne hita, ra i made na gula hariki, i korimule hita!
A Tuna Sipsip tara, i korimule hita!”
11 E huriki a agelo lobo ri pesi haluia a gula hariki, e huriki a nupesi, a maki mahuri i va. Ri tabuli puru na matane ria, na ngalana gula hariki, ri kavurikea a Vure, 12  e ri ta maea,

“I muholi!
A Vure ne hita i bagetu kamumu hateka!
I tahoka a nipara dagi hateka!
I tahoka a lohokanga lobo!
Si gi kavurike vakaroro ia! Si gi togo vakaroro ia!
I tahoka a nitora lobo! I tuhaka hateka!
I muholi!”
13 Muri tara ne huriki a nupesi i nana iau, “Re huriki nga ri rodo a varakia ola keakea, ria e rei? Ri valai vai?”

14  f Lakea a koli a ta maea, “Bakovi dagi ioe o lohoka ne ria.”

Muri i taki iau, i ta maea, “Ri pagitala valai na tahuna maregoa dagi. Ri loi a varakia ne ria na darana Tuna Sipsip, lakea ri kea mahaha.

15 “I mavonga ri pesi na ngalana gula hariki na Vure.
Na haro, na rodo ri kavurike ia kunana.
A viri i made na gula hariki ge made turane ria, ge matakari ria.
16  g I uka ma ri gi vitolo tabu. I uka ma ri gi marohu tabu.
A haro i uka ma ge kani ria.
I uka ma ri gi kakarongo tabu,
17  h a vuhuna a Tuna Sipsip, ra i pesi na ngalana gula hariki, ge matakari ria manga a matakari na sipsip.
Ge tuli ria, ri gi lakea na naru bele, ra naru na nimahuri.
A Vure ge ravunu na matane ria a luhane ria, i uka ma ri gi tangi tabu.”
Copyright information for `BNP