d9:6Jop 3:21; Jer 8:3
e9:7Jol 2:4
f9:8Jol 1:6
g9:9Jol 2:5
k9:20Sng 115:4-7; 135:15-18; Dan 5:23; Kap 16:9,11

Revelation of John 9

A Limana Agelo i Vaki a Tavure

a Muri a limana agelo i vakia a tavure vona, lakea a masia a hada i mapasi tala na hunu, i puru na malala. Ni habi vona a ki na lovo i marangeo. b I talea a logo na lovo i marangeo, lakea a pokona kanono dagi i poko tala vona, i ratea a hini i katoki, i kavitagua a haro. Muri a kabuna koa ri pagitala vona a pokona kanono iea, ri puru valai na malala. Ni habi ne ria a nitora ni tura e huriki, i manga a maka kira. c Ni taki ria nahea ri gi ratapile a varili, a maka hurumade, a maka kai. Ri gi ratapile kunana e huriki a bakovi a ngatavine ri uka kilakila na Vure ge tabuli na dumene ria. Ni taki ria ri gi vakamadihi hale e huriki nga na keva i lima, pali i uka ma ri gi rabalaki ria. Ri vakamadihi ria na nimadihi na kira i tura a viri. d Na tahuna iea, e huriki bara ri ngaru ni mate, pali bara ri keri. Ri gi matakana a dala na nimate, pali bara ri keri ni mate.

e A maka koa nga, ri mata manga a hos ni kisi na vabinga. Ri kube a maki i mata manga a tama hariki ni rata na gol. A matane ria i manga a bakovi. f A vune ria i ola, i manga a vuna ngatavine. A ngine ria i manga a ngina laion. g Ri rodo na ngalane ria a maki manga a galeu ni rata na aen. A nangina karapane ria i manga a nangina a maka hos i kupo hateka ri lalu a karis, ri nunu lakea na vabinga. 10 A kuna ria i manga a kuna kira, i tahoka a nitora ni habi a nimadihi ne huriki a bakovi a ngatavine na keva i lima. 11 A hariki ne ria, a agelo na lovo i marangeo. A rana a hariki iea na nita Hibru, e Abadon. Na nita Grik, ni gale Apolion.
(9:11)A pelegona ngava i rua nga, ‘A Mari ni Ratapile e Huriki’.


12 A mugana vuranga i lobo. A vuranga i rua ru tabana.

A Polotarana Agelo

13 Muri a polotarana agelo i vakia a tavure vona, lakea a longo a lohona viri i pagitala na tupina i va na dede na nihabi ni rata na gol, ra i tabuli na ngalana Vure.

14 A lohona viri iea i takia a polotarana agelo, ra i nugu a tavure, i ta maea, “O puga a agelo ala va, ra ni kolo tabukoi na naru dagi e Iupretis.” 15 Lakea i vano, i puga a agelo i va nga, ra ni kolo puru hosi, ri gi davea a pida, a keva, a parava, a aua iea. E huriki a bakovi a ngatavine na malala ni kalipida na tete i tolu. Lakea e huriki a agelo nga, ri gi vano, ri gi rabalakia a tete i taku. 16 E huriki a nugumaheto ra ri rike na hos ri ala 200 milion. A longo ni gi tala ria. 17 A matai na vuregu, a maka hos nga, turana e huriki ri rike ne ria ri mata maea: ri rodo a galeu na ngalane ria, ni kalu ri vururu manga a kanono, ri goma goma manga a hunu,
(9:17)Ri goma goma manga a kedo a sapaia, ra i manga a hunu.
ri ngango ngango manga a viku. A gina maka hos nga ri mata manga a gina laion. I pagitala na ngutune ria a pokona kanono, a viku.
18 Ri rabalaki e huriki a bakovi a ngatavine ala kupo
(9:18)⅓ i manga ni ru na tete i tolu e huriki a bakovi a ngatavine, lakea a tete tara i mate
na maki hale i tolu: a kanono, a pokona kanono, a viku. A maki i tolu nga, to pagitala na ngutune ria,
19 a vuhuna a nitora na maka hos nga, i tabuli na ngutune ria, na kune ria. A kune ria i manga a mata, ri kara mate e huriki.

20  k E huriki a bakovi a ngatavine, ra i uka ma ri mate na maki hale i tolu nga, i uka ma ri pulo a vilone ria, i uka ma ri lobo ni vasileki na hanitu, a nitamina vure ni rata na gol, a silva, a brans, a kedo, a kai. A maka nitamina vure nga ri keri ni matai, ri keri ni longo, ri keri ni laho. 21 E huriki nga, ri rabalaki a viri, ri rata a muto, ri mole, ri panaho, i uka ma ri pulo a vilone ria, ri gi ngalahere na maka naro hale nga.

Copyright information for `BNP