Romans 2

A Vure Ge Pelekado Kamumu e Huriki

a I uka ma i kamumu o pelekado a narone huriki ranga, a vuhuna na tahuna o pelekado ria, o pelekado mule ioe. Ioe tara o rata a maka naro hale manga ria. Si lohoka vona a vilona Vure i malamala kunana na tahuna i pelekado e huriki ri rata a naro hale nga. I mavonga, naha ni luhoi a Vure i uka ma ge pelekado ioe, a vuhuna ioe tara o rata a naro hale manga ria. b Naha ni luhoi i kamumu go tabana ni rata a naro hale, a vuhuna a Vure a mari ni rata kamumu hateka e huriki, a mari ni hatenono hateka. Naha ni luhoi mavonga. A Vure i rata kamumu ioe, a vuhuna i ngaru go pulo a vilomu. A Vure bara i vakamadihi hateka ioe, a vuhuna o putu ngingi, i uka ma o pulo a vilomu. Bara i habi a nimadihi vomu muri ma na tahuna a rongova vona ge bele kavakava, ge pelekado e huriki lobo na naro i taku kunana. c A Vure ge habi a mapa ne huriki lobo, i muri mai a narone ria. E huriki ri ramai a naro kamumu, ri toni a bulune ria ni ratea a Vure ge vivi hateka ne ria, ri toni a bulune ria ni bole a nimahuri vakaroro, a Vure ge habi a nimahuri vakaroro ne ria. d Pali e huriki ri luhoi mule ria kunana, ri marikoi ni longototoa a ngava muholi, ri longototo kunana ni rata a naro hale, a rongova na Vure bara i vakamadihi hateka ria. Bara i habi a nimadihi dagi ne huriki ri rata vakaroro a rabu hale, bara ri loho gori lae. Bara i bele taro ne huriki a Iuda, muri bara i bele ne huriki i uka ma ria a Iuda. 10 Pali bara i vakabagetu, i kavurike, i habi a nivalemu ne huriki ri rata vakaroro a naro kamumu. Ne huriki a Iuda taro, muri ne huriki i uka ma ria a Iuda. 11 Ge rata mavonga, a vuhuna e huriki a Iuda, e huriki i uka ma ria a Iuda, a Vure ge pelekado e huriki lobo na naro i taku kunana.

A Vure Ge Pelekado e Huriki Lobo

12 E huriki i uka ma ria a Iuda, i uka ma ri lohoka na maka Vinara a Vure i habi ne Moses. Pali na tahuna ri rata a naro hale, bara ri vurua, pali a Vinara i uka ma ge pelekado ria. E huriki a Iuda ri lohoka na Vinara a Vure i habi ne Moses. Na tahuna ri rata a naro hale, ria ranga bara ri vurua, a vuhuna a Vure bara i pelekado ria na Vinara ne Moses. 13 I kamumu a Vure i rata mavonga, a vuhuna a viri i malamala na matana Vure i uka ma ia a viri i lohoka kunana na Vinara na Vure. A viri i malamala na matana Vure a viri i longototo vakaroro a Vinara lobo a Vure i habi ne Moses. 14  e E huriki i uka ma ria a Iuda, i uka ma ri lohoka na Vinara. Pali na tahuna ri ramai a vilo kamumu na Vinara, i vakasiri manga a Vinara iea i tabuli pololilo na niluhoi ne ria pali. 15 Ri vakasiri ri lohoka na hatene ria a ngava na Vinara. A lohokanga ne ria na naro kamumu, a naro hale, i vakalongo ria maea, “a naro iea i hale” o “a naro iea i kamumu.” 16 Bara i bele mavonga na tahuna a Vure i habia ne Isu Kristo a leho ni pelekado a niluhoi kapiloho, a naro kapiloho ne huriki lobo. A ngava iea, a vakalongo ne huriki na tahuna a vakalongo ria na Velenga Kamumu.

E Huriki a Iuda

17 Ngane ga taki mua e huriki a Iuda. Mu bibi rike mule mua, mu ta maea, “Iau a Iuda.” Mu taki ta a Vure ge korimule mua a vuhuna mu lohoka vona a Vinara a Vure i habi ne Moses. Mu bibi rike mule mua, ta i mua a ngate na Vure. 18 Mu lohoka vona a ningaru na Vure, a naro kamumu mu gu ramaia, a vuhuna ni tovo mua na vinara. 19 Mu luhoi ta mu gu vakasiri a dala na Vure ne huriki i uka ma ria a Iuda, i manga a viri i vakasiri a dala na kepa. Mu pahaluhoi ta mua a nipara ne huriki ri made na uvo. 20  f Mu lohoka na ngava muholi ni here puru, ra Vinara, lakea mu pahaluhoi ta mua a mari ni tovo, mu gu tovo e huriki i uka ma ria a Iuda. Mu ngaru ni tovo ria, a vuhuna mu luhoi ta ri manga e huriki a koma kiroko, e huriki a manga. 21  g Mu paki ni tovo e huriki ranga, pali mu koi ni tovo mule mua. Mu vara e huriki nahea ri gi panaho, pali mua a panaho. 22 Mu vara e huriki nahea ri gi mole, pali mua mu mole. I mata marango. Mu marikoi vona a maka nitamina vure, pali i navai mu panaho a maki na roho na vure ne ria? 23 Mu bibi rike mule mua, mu ta maea, “Mi lohoka na Vinara na Vure.” Pali i mata hale na tahuna mu longotaro a vinara vona. Mu rata mavonga, mu biua a Vure. 24  h I manga a ngava ni here puru na Hinere,

“E huriki i uka ma ria a Iuda ri matai a narone mua, lakea ri biua a Vure.”

A Ngava ni Pala a Kuli

25 A bakovi ni pala a kulina, lakea i ramai lobo a Vinara na Vure, a hini ni pala a kulina vona bara i koria. Pali a bakovi ni pala a kulina, pali i longotaro a Vinara na Vure, i manga tabu a bakovi i uka ma ni pala a kulina. 26  i I mavonga, e rei a viri i uka ma a Iuda, i uka ma ni pala a kulina, pali i longototo a Vinara lobo na Vure, a Vure bara i gale ia a viri vona, i manga ni pala a kulina pali. 27 Lakea e huriki i uka ma ni pala a kuline ria, pali ri ramai a Vinara na Vure, bara ri pelekado mua, bara ri taki mua mu rare, ra mua e huriki ni pala a kuline mua, mu lohoka na Vinara na Vure, pali mu longotaro. 28 A Iuda muholi i uka ma a viri ni pala a kulina kunana. A naro ni pala a kuli i uka ma ge ratea a Vure ge ngaru a viri. 29  j A Vinara ne Moses i uka ma ge pulo a hatena viri. A Vure i ngaru a viri na tahuna a Hanu Kiripiripi i pulo a hatena viri. A viri maea, a Iuda muholi. A bakovi maea, i uka ma i ngaru e huriki a bakovi ri gi kavurikea. I ngaru a Vure kunana ge kavurikea.

Copyright information for `BNP