1 Corinthians 1

Pol a Yesus aqa anjam marsiq laqnu

E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa anjam marsim laqne.” Onaqa e Qotei aqa areqalo di dauryosim agi e Yesus aqa anjam marsim laqnum. O was qu, aqo gago was Sostenes wo anjam endi neŋgreŋyosim niŋgi qa qariŋyonum. Niŋgi Korin qureq dia Qotei qa loueqnub qaji. Kristus Yesus a na niŋgi osiqa Qotei aqa segi kumbra boleq di atej. Osiqa niŋgi aqa segi tamo sqa marsiqa giltŋgej. Niŋgi ti Kristen tamo uŋgasari kalil qure qure kalilq dia gago Tamo Koba Yesus Kristus aqa ñam qa louoqnsib pailyeqnub qaji naŋgi ti Qotei na turtŋgosiqa aqa segi tamo sqa marsiqa niŋgi giltŋgej. Yesus a gago Tamo Koba. A Kristen tamo kalil dego naŋgo Tamo Koba. Gago Abu Qotei wo Tamo Koba Yesus Kristus wo naŋgi aiyel niŋgi qa are tulaŋ boleinjrimqa niŋgi lawo na soqniye.

Pol a Korin naŋgi qa are qaloqnsiq Qotei biŋiyeqnu

Qotei a Kristus Yesus aqa baŋ na niŋgi qa are tulaŋ boleiyosiq gereinjrej. Deqa e bati gaigai niŋgi qa are qaloqnsim ijo Qotei biŋiyeqnum. E Qotei biŋiyeqnum. Di kiyaqa? Kristus aqa anjam iga nami niŋgi merŋgoqnem qaji di nuŋgo are miligiq di siŋgila na waueqnu deqa. Niŋgi Kristus beteryejunub deqa Qotei na niŋgi kumbra bole kalil yoqnqajqa tulaŋ keretŋgej. Nuŋgo anjam maro qa ti nuŋgo powo qa ti kalil Qotei na niŋgi tulaŋ keretŋgej. Deqa niŋgi gago Tamo Koba Yesus Kristus a olo bqajqa tariŋoqnsib unub. Niŋgi Qotei aqa Mondor aqa siŋgila ti unub. Niŋgi aqa siŋgila bei qa truquosaieqnub. Yesus Kristus a na niŋgi siŋgilatŋgoqnqas deqa niŋgi siŋgila na tigelesosib gilsib gilsib diŋo bati itqab. Yimqa gago Tamo Koba Yesus Kristus a olo laŋ qureq na brantimqa bati deqa niŋgi Qotei aqa ŋamgalaq di une saiqoji sqab. Niŋgi Qotei aqa Ŋiri gago Tamo Koba Yesus Kristus a ombla areqalo qujaitosib sqajqa deqa Qotei na niŋgi metŋgej. Kumbra kalil Qotei a nami niŋgi eŋgwajqa marej qaji di a na eŋgwas.

Korin naŋgi anjam bei bei qa ŋiriŋoqnsib pupoeqnub

10 Ariya was qu, e gago Tamo Koba Yesus Kristus aqa ñam na niŋgi siŋgila na endegsi merŋgwai. Niŋgi kalil areqalo qujaitosib anjam qujai maroqniye. Niŋgi anjam bei bei qa ŋiriŋosib pupoaib. Niŋgi areqalo qujai ti sosib koba na geregere soqniye. 11 O was qu, Kloe aqa talq di unub qaji naŋgi na anjam bei endegsib e merbeb, “Korin Kristen naŋgi ŋiri ŋiriŋoqnsib anjam na qoteqnub.” Merbonab quem. 12 O was qu, niŋgi segi segi anjam na qoteqnub qaji nuŋgo utru agiende. Niŋgi qudei mareqnub, “E Pol dauryo qaji tamo.” Niŋgi qudei mareqnub, “E Apolos dauryo qaji tamo.” Niŋgi qudei mareqnub, “E Pita dauryo qaji tamo.” Ariya niŋgi qudei mareqnub, “E Kristus dauryo qaji tamo.” Niŋgi anjam na qoteqnub qaji nuŋgo utru agide. 13 Niŋgi kiyaqa kumbra degyeqnub? Kristus a segi poeleŋosiq tamo gargekobaej kio? E Pol e segi niŋgi qa ŋamburbasq di moiem kio? Niŋgi ijo ñam na yanso eb kio? Di sai. 14 E nuŋgo ambleq di tamo qudei yansnjrosai. Krispus wo Gaius wo naŋgi segi aiyel e na yansnjrem. Deqa e Qotei qa areboleboleibqo. 15 Deqa tamo bei na endegsi marqa keresai, “E Pol aqa ñam na yanso em.” 16 Bole, tamo naŋgi Stefanas aqa talq di unub qaji naŋgi dego e na yansnjrem. Ariya e olo tamo qudei naŋgi yansnjrem kio di e poibosai. 17 Kristus a na e tamo naŋgi yansnjrqa qariŋbosai. E aqa anjam bole palontoqnqajqa deqa e qariŋbej. Deqa e mandam tamo naŋgo powo na Kristus aqa anjam palontosaieqnum. E mandam tamo naŋgo powo na anjam palontem qamu Kristus a ŋamburbasq di moiej di a laŋa moiej qamu.

Kristus a segi Qotei aqa siŋgila ti aqa powo ti unu

18 Tamo naŋgi padalqa gamq di unub qaji naŋgi mareqnub, “Kristus a ŋamburbasq di moiej anjam di nanari anjam.” Ariya iga Qotei na eleŋeqnu qaji iga mareqnum, “Kristus a ŋamburbasq di moiej anjam di Qotei aqa siŋgila ti unu.” 19 Agi Qotei aqa anjam bei nami endegsib neŋgreŋyeb unu, “Tamo naŋgi powo ti qa mareqnub qaji naŋgo powo di e na taqal atetnjrqai. Qalie tamo naŋgo qalie dego e na kobotetnjrqai.” 20 O was qu, tamo naŋgi powo ti qa mareqnub qaji naŋgi qa iga kiersi marqom? Dal anjam qalie tamo naŋgi ti tamo naŋgi anjam na qotqajqa siŋgilaeqnub qaji naŋgi qa ti iga kiersi marqom? Iga endegsi marqom. Qotei na tamo naŋgi mandam endeqa powo ti unub qaji naŋgi olo nanaritnjreqnaqa naŋgi nanari anjam segi maroqnsib laqnub.

21 Qotei aqa segi powo na a endegsi qalieej. Tamo naŋgi mandam endeqa powo ti unub qaji naŋgo powo dena naŋgi Qotei qalieqa keresai. Qotei a degsi qalieosiq deqa a na tamo uŋgasari naŋgi oqajqa gam bei endegsi osornjrej. Anjam iga palonteqnum qaji di tamo naŋgi nanari qa mareqnub. Ariya tamo uŋgasari naŋgi anjam di qusib Qotei qa naŋgo areqalo siŋgilatqab gam dena qujai a na naŋgi oqas. 22 Juda naŋgi Qotei aqa maŋwa unqajqa mareqnub. Grik naŋgi powo oqajqa tulaŋ siŋgilaeqnub. 23 Ariya Kristus a ŋamburbasq di moiej anjam di iga palontsim laqnam Juda naŋgi quoqnsib gisaŋ qa mareqnub. Grik naŋgi dego anjam di quoqnsib nanari qa mareqnub. 24 Ariya tamo uŋgasari Qotei na metnjrej qaji agi Juda ti Grik ti naŋgi qalieonub, Kristus a Qotei aqa siŋgila ti unu. A Qotei aqa powo ti dego unu. 25 Mandam tamo naŋgi mareqnub, “Qotei aqa anjam di nanari anjam.” Di sai. Anjam di Qotei aqa powo ti unu deqa anjam dena mandam tamo naŋgo powo tulaŋ buŋyejunu. Mandam tamo naŋgi mareqnub, “Qotei aqa anjam di siŋgila saiqoji.” Di sai. Anjam di Qotei aqa siŋgila ti unu deqa anjam dena mandam tamo naŋgo siŋgila tulaŋ buŋyejunu.

26 O was qu, niŋgi are qaliye. Qotei na niŋgi metŋgej bati deqa niŋgi gargekoba mandam tamo naŋgo ŋamgalaq di powo ti sosai. Niŋgi gargekoba siŋgila ti ñam ti sosai. 27 Tamo Qotei na giltnjrej qaji naŋgo utru agiende. Tamo naŋgi mandam endeqa powo ti unub qaji naŋgi na olo tamo Qotei na giltnjrej qaji naŋgi nanari qa minjreqnub. Ariya tamo nanari qa minjreqnub qaji naŋgi di Qotei na giltnjrej deqa tamo naŋgi mandam endeqa powo ti unub qaji naŋgi di Qotei na olo jemai enjreqnu. Tamo naŋgi mandam endeqa siŋgila ti unub qaji naŋgi na olo tamo Qotei na giltnjrej qaji naŋgi siŋgila saiqoji qa minjreqnub. Ariya tamo siŋgila saiqoji qa minjreqnub qaji naŋgi di Qotei na giltnjrej deqa tamo naŋgi mandam endeqa siŋgila ti unub qaji naŋgi di Qotei na olo jemai enjreqnu. 28 Tamo naŋgi mandamq endia ñam ti unub qaji naŋgi na olo tamo Qotei na giltnjrej qaji naŋgi ñam saiqoji qa minjroqnsib tamo uge qa minjreqnub. Ariya tamo ñam saiqoji qa minjreqnub qaji naŋgi di Qotei na giltnjrej deqa tamo ñam ti unub qaji naŋgo ñam koba di Qotei na olo aguq ateqnu. 29 Deqa Qotei aqa ŋamgalaq di tamo bei na aqa segi ñam soqtqa keresai. 30 Qotei a segi na niŋgi eleŋosiqa Kristus Yesus aqa baŋq di atej unub. Deqa Kristus aqa wau na iga Qotei aqa areqalo bole ti aqa powo ti unum. Aqa wau na iga tamo bole tiŋtiŋo unum. Aqa wau na iga Qotei aqa segi kumbra boleq di sosim walweleqnum. Aqa wau na Qotei na iga gago uneq dena olo awaigej deqa gago une na iga olo taqatgosai. 31 Deqa iga gago segi ñam soqtqa keresai. Agi Qotei aqa anjam bei nami endegsib neŋgreŋyeb unu, “Tamo bei a ñam bei soqtqa marsimqa a Tamo Koba Qotei aqa ñam segi soqteme.”

Copyright information for `BOJ