1 Corinthians 13

Kumbra tulaŋ boledamu di agi qalaqalaiyo kumbra. E meŋ bulyosiy qure utru segi segi naŋgo anjam kio laŋ aŋgro naŋgo anjam kio maroqnqai ariya e qalaqalaiyo kumbra dauryqasai di ijo anjam maro di bolesai. Ijo anjam maro di laŋa noul bulosim qatroŋkobaqas. Osim gruma bul laŋa anjam atqas. E Qotei aqa medabu osiy anjam palontoqnqai kio e Qotei aqa uli anjam kalil qalieosiy utru babteleŋqai kio e qalie koba ti sqai kio e Qotei qa ijo areqalo tulaŋ siŋgilatosiy deqa mana kobaquja minjitqa a ijo anjam dauryosim tigelosim sawa beiq gilqas kio ariya e qalaqalaiyo kumbra dauryqasai di ijo kumbra kalil di Qotei aqa ŋamgalaq di kumbra bolesai. E ijo iŋgi iŋgi kalil eleŋosiy tamo iŋgi iŋgi saiqoji unub qaji naŋgi jeisiy enjrqai kio e ijo segi jejamu osiy jeu tamo naŋgo baŋq di atitqa naŋgi na osib ŋamyuo na koitqab kio ariya e qalaqalaiyo kumbra dauryqasai di ijo kumbra kalil dena e yala aqaryaibqa keresai.

Tamo naŋgi qalaqalaiyo kumbra dauryqab di naŋgi naŋgo was naŋgi qa urur minjiŋ oqoqnqasai. Naŋgi lawo na tamo kalil naŋgi kumbra bole enjroqnqab. Naŋgo was bei a iŋgi iŋgi koba ti soqnim naŋgi a qa are ugeinjrqasai. Naŋgi naŋgo segi ñam soqtoqnqasai dego. Tamo naŋgi qalaqalaiyo kumbra dauryqab di naŋgi diqoqnsib sqasai. Naŋgi naŋgo segi jejamu qa are qaloqnqasai dego. Naŋgi qalaqalaiyo kumbra dauryqab di naŋgi urur ŋiriŋoqnqasai. Naŋgo was bei na naŋgi kumbra uge bei enjrimqa naŋgi deqa are qalsib a olo kambatqasai. Tamo naŋgi qalaqalaiyo kumbra dauryqab di naŋgi kumbra uge qa areboleboleinjrqasai. Naŋgi kumbra bole qa segi areboleboleinjroqnqas. Tamo naŋgi qalaqalaiyo kumbra dauryqab di naŋgi gulube kalil qoboiyoqnqab. Osib naŋgi gaigai Qotei qa naŋgo areqalo siŋgilatoqnsib a mondoŋ olo bqas deqa tariŋoqnqab. Osib naŋgi gulube kalil qa siŋgila na tigelesqab.

Qalaqalaiyo kumbra di koboqa keresai. Qotei na tamo qudei naŋgi wau enjreqnu deqa naŋgi aqa medabu oqnsib aqa anjam geregere palonteqnub. Ariya wau di koboqas. Qotei na tamo qudei naŋgo meŋ bulyetnjreqnu deqa naŋgi qure utru segi segi naŋgo anjam mareleŋeqnub. Kumbra di dego koboqas. Qotei na tamo qudei naŋgi qalie koba enjreqnaqa naŋgi anjam bole mareqnub. Qalie di dego koboqas. Iga qalie ti unum. Ariya gago qalie di oto oto deqa iga truquigeqnu. Iga Qotei aqa medabu oqnsim anjam palonteqnum. Anjam di dego oto oto deqa iga truquigeqnu. 10 Ariya mondoŋ Kristus a olo bosim iŋgi iŋgi kalil keretimqa bati deqa qalie ti anjam ti iga truquigeqnu qaji di torei koboqas. 11 Nami e aŋgro kiñala sosimqa e aŋgro kiñilala naŋgo powo ti areqalo ti osim anjam maroqnem. Ariya bunuqna e tamo kobaqujaosimqa e aŋgro kiñilala naŋgo kumbra di uratem. 12 Dego kere bini iga Qotei aqa kumbra geregere qalieosaiunum. Gago qalie di oto oto deqa iga truquigeqnu. Iga ya qolbiq di gago ulatamu geregere unqa keresai dego kere iga Qotei aqa kumbra geregere qalieosaiunum. Ariya mondoŋ iga Qotei aqa areq bosim aqa ulatamu unsimqa bati deqa iga a qa geregere qalieqom. A iga qa geregere qalieeqnu dego kere iga kamba a qa geregere qalieqom. 13 Iga Qotei qa gago areqalo siŋgilateqnum kumbra di a gaigai sqas. Qotei na iga oqajqa deqa iga tariŋoqnsim unum kumbra di dego gaigai sqas. Qalaqalaiyo kumbra di dego gaigai sqas. Ariya qalaqalaiyo kumbra di tulaŋ bolequja. Qalaqalaiyo kumbra dena kumbra kalil tulaŋ buŋnjrejunu.

Copyright information for `BOJ