1 Corinthians 15

Kristus a moisiq olo subq na tigelej

1Ariya was qu, Yesus aqa anjam bole e nami palontosim niŋgi merŋgoqnem qaji di bini e olo pulutsiy niŋgi merŋgwai. Anjam di niŋgi nami qusib dauryeb. Deqa e qalieonum, bini niŋgi anjam di siŋgila na ojsib tigelejunub. 2Anjam e nami palontosim niŋgi merŋgoqnem qaji di niŋgi olo torei siŋgila na ojesoqniye. Ojesqab di Qotei a niŋgi oqas. Niŋgi nami Yesus qa nuŋgo areqalo siŋgilateb. Ariya niŋgi laŋa babaŋ na siŋgilatqab di Qotei a niŋgi oqasai.

3Anjam bole e nami palontosim niŋgi merŋgoqnem qaji di e Yesus aqa baŋq dena em. Anjam di tulaŋ kobaquja. Anjam agiende. Kristus a gago une qa moiej. Anjam di agi neŋgreŋq di unu. 4A moinaqa subq ateb. Bati qalub koboonaqa a olo subq na tigelej. Anjam di dego neŋgreŋq di unu. 5Ariya a subq na tigelosiqa Pita aqaq di brantonaq unej. Osiqa aqa aŋgro 12-pela naŋgoq di dego brantonaq uneb. 6Osiqa bunuqna bati qujai qa a Kristen tamo 500 naŋgoq di dego brantonaq uneb. Naŋgi gargekoba bini unub. Ariya naŋgi qudei moreŋeb. 7Ariya bunuqna a Jems aqaq di brantonaq unej. Osiqa aqa anjam maro tamo kalil dego naŋgoq di brantonaq uneb.

8Ariya olo bunuqna a e qa dego brantonaq unem. Uŋa bei a bati grotosim aqa aŋgro ŋambabtougetqas dego kere Kristus a bunuqna e qa brantonaq unem. 9E degsi maronum. Di kiyaqa? E nami Qotei aqa tamo uŋgasari naŋgi ugeugeinjroqnem. Deqa tamo naŋgi e Yesus aqa anjam maro tamo bolesai degsib merbqab di kere. Di kiyaqa? Ijo ñam tulaŋ aguq aiejunu deqa. Yesus aqa anjam maro tamo kalil naŋgi na e buŋbejunub. 10Ariya Qotei a e qa are boleiyej deqa bini e aqa anjam maro tamo unum. A e qa are boleiyej aqa kumbra di laŋa uloŋosai. E aqa kumbra di osim siŋgila na waukobaoqnsim Qotei aqa anjam maro tamo kalil naŋgi tulaŋ buŋnjreqnum. Ariya e ijo segi siŋgila na wau di yosaieqnum. Qotei a e qa are boleiyej deqa a na e siŋgila ebeqnaqa e wau di yeqnum. 11E na kio tamo qudei naŋgi na kio wau di yeqnum di uŋgum. Yesus a moisiq olo subq na tigelej anjam di iga kalil palonteqnam niŋgi quoqnsib nuŋgo areqaloq di siŋgilateqnub.

Tamo uŋgasari moreŋo qaji naŋgi olo subq na tigelqab

12Kristus a moinaqa Qotei na olo subq na tigeltej anjam di iga gaigai palontosim laqnum. Ariya kiyaqa niŋgi qudei mareqnub, “Tamo moreŋeb qaji naŋgi olo subq na tigelqasai”? 13Tamo moreŋeb qaji naŋgi olo subq na tigelqasai anjam di bole qamu Qotei na Kristus dego subq na tigeltosai qamu. 14Qotei na Kristus subq na tigeltosai qamu anjam iga palonteqnum qaji di bolesai qamu nuŋgo areqalo Kristus qa siŋgilateqnub qaji di laŋa uloŋej qamu. 15Qotei na tamo moreŋeb qaji naŋgi olo subq na tigeltnjrqasai anjam di bole qamu Qotei na Kristus dego subq na tigeltosai qamu iga Qotei aqa kumbra kalil gisaŋ qa mareqnum qamu. Agi iga mareqnum, Qotei a Kristus subq na tigeltej. 16Od, Qotei na tamo moreŋeb qaji naŋgi olo subq na tigeltnjrqasai anjam di bole qamu Qotei na Kristus dego subq na tigeltosai qamu. 17Qotei na Kristus subq na tigeltosai qamu nuŋgo areqalo Kristus qa siŋgilateqnub qaji dena niŋgi aqaryaiŋgwa keresai qamu niŋgi nuŋgo uneq di unub qamu. 18Deqa tamo naŋgi Kristus qa naŋgo areqalo siŋgilatosib nami moreŋeb qaji naŋgi torei padaleb qamu. 19Iga subq na olo tigelqasai anjam di bole qamu Kristus a na iga mandam qa iŋgi iŋgi segi qa segi aqaryaigo qamu iga tamo tulaŋ ugedamu sosim tamo uŋgasari kalil mandamq endi unub qaji naŋgi buŋnjronum qamu.

20Ariya iga degsi sqasai. Kristus a moinaqa Qotei na a olo subq na tigeltej. A tamo kalil nami moreŋeb qaji naŋgi qa namoosiq subq na tigelej. 21Niŋgi qalie, tamo qujai Adam a une atej deqa a moio qa utru. Dego kere Kristus a subq na tigelo qa utru. 22Adam aqa leŋ kalil naŋgi moreŋeqnub. Dego kere Kristus aqa tamo kalil naŋgi olo ŋambile oqab. 23Ariya iga gago segi segi bati dauryosim subq na olo tigelosim ŋambile oqom. Namoqna Kristus a subq na tigelej. Ariya mondoŋ Kristus a olo laŋ qureq na bamqa bati deqa iga aqa segi tamo uŋgasari iga dego subq na olo tigelqom.

24Bati deqa iŋgi iŋgi kalil koboqas. Mandor kokba ti mondor uge uge ti gate kokba ti naŋgo siŋgila ti kalil di Kristus na kobotetnjrqas. Osim a na iŋgi iŋgi kalil olo eleŋosim aqa Abu Qotei aqa baŋq di uratqas. Yim Qotei a segi Mandor Koba tigelosim iŋgi iŋgi kalil taqatesqas. 25Kristus a degyqas. Di kiyaqa? A Mandor Koba sosim gilsim gilsim diŋo bati brantimqa Qotei na aqa jeu tamo kalil naŋgi eleŋosim aqa sorgomq di atim a na naŋgi taqatnjresqas. 26Osim bati deqa a na aqa jeu tamo kalil naŋgi di kobotnjrsim ariya a na moio dego kobotqas. 27Agi Qotei aqa anjam bei nami endegsib neŋgreŋyeb unu, “Qotei na iŋgi iŋgi kalil eleŋosiqa Kristus aqa sorgomq di atej.” O was qu, Qotei a segi na iŋgi iŋgi kalil di eleŋosiqa Kristus aqa sorgomq di atej. Qotei aqa anjam degsib neŋgreŋyeb unu. Deqa iga qalieonum, Qotei a segi Kristus aqa sorgomq di sqasai. 28Ariya mondoŋ Qotei na iŋgi iŋgi kalil di olo eleŋosim Kristus aqa sorgomq di atim soqnim Qotei aqa Ŋiri a kamba dego Qotei aqa sorgomq di sqas. Soqnim Qotei na iŋgi iŋgi kalil di tulaŋ buŋnjrsimqa a segi naŋgo Mandor Koba sosim naŋgi bati gaigai taqatnjroqnqas.

29Tamo qudei naŋgi tamo nami moreŋeb qaji naŋgi qa olo are qaloqnsib yanso eqnub. Ariya tamo moreŋeb qaji naŋgi olo subq na tigelqasai anjam di bole qamu naŋgi kiyaqa naŋgi qa yanso eqnub? 30Iga Kristus aqa anjam mare mare laqnsim tamo uŋgasari naŋgi endegsi minjreqnum, “Tamo moreŋeb qaji naŋgi olo subq na tigelqab.” Iga wau di yeqnum deqa tamo gargekoba naŋgi iga qa ŋiriŋoqnsib bati gaigai iga padaltqa laqnub. Ariya tamo moreŋeb qaji naŋgi olo subq na tigelqasai anjam di bole qamu iga kiyaqa Kristus aqa wau di ojoqnsim laqnum? 31O was qu, e bole maronum, e bati gaigai moiqa laqnum. Niŋgi ti e ti gago Tamo Koba Kristus Yesus beteryejunum deqa e niŋgi qa tulaŋ areboleboleibeqnu. Deqa e anjam endi ulitosai. E niŋgi merŋgonum. 32E mandam tamo naŋgo areqalo dauryosim Efesus qureq dia wagme juwaŋ naŋgi ti qotoqnem qamu kumbra dena e kiersim aqaryaibqas? Tamo moreŋeb qaji naŋgi olo subq na tigelqasai anjam di bole qamu iga endegsi maronum qamu, “Iga nebe moiqom kio deqa uŋgum, iga alaŋoqnsim gago segi jejamu qa areboleboleigoqnim iŋgi ti ya ti uyoqnqom.” Degsi maronum qamu.

33O was qu, tamo qudei naŋgi na niŋgi gisaŋgaib deqa niŋgi geregere ŋam atsib soqniye. Anjam bei unu di niŋgi qalie. Anjam agiende, “Iga tamo uge naŋgi ti laqnqom di naŋgi na gago areqalo ugetetgibqa iga kumbra bole uratosim naŋgi daurnjrqom.” Anjam degsi unu. 34Deqa niŋgi nanari kumbra uratosib areqalo bole ti sosib olo une yoqnaib. Niŋgi quiye. Nuŋgo ambleq di tamo qudei naŋgi Qotei qalieosaiunub. Niŋgi deqa jemaiŋgwajqa deqa e anjam di niŋgi merŋgonum.

Tamo moreŋo qaji naŋgo jejamu kiero osib olo tigelqab?

35Ariya was qu, tamo bei na e endegsi nenembqas, “Tamo moreŋeb qaji naŋgi kiersib olo subq na tigelqab? Naŋgi jejamu kiero osib olo tigelqab?” 36O was qu, tamo di a nanariosiq deqa degsi nenembqo. Niŋgi qalie. Wit bunuj breiyibqa mandamq aisim a laŋa mandamq di sqas. Ariya wit moio breiyib di a olo ŋambile sosim qoqitosim oqwas. 37Wit kio kurgus kio qoqitosiq geitqo qaji di otorosim olo yagwasai. Aqa gei moio segi yagim dena oqwas. 38Tamo bei na wit yago kio kurgus yago kio yagimqa a olo qoqitosim oqimqa Qotei aqa segi areqalo na naŋgi tanu segi segi enjrqas. Naŋgo tanu di uno segi segi. 39Tamo ti wagme ti qebari ti qe ti naŋgo jejamu dego uno segi segi. 40Laŋ qaji iŋgi iŋgi naŋgo uno bei. Mandam qaji iŋgi iŋgi naŋgo uno bei. Laŋ qaji iŋgi iŋgi naŋgo wala bei. Mandam qaji iŋgi iŋgi naŋgo wala bei. 41Seŋ ti bai ti bongar ti naŋgo riaŋ segi segi. Bongar kalil naŋgi dego naŋgo riaŋ segi segi.

42Dego kere tamo naŋgi moreŋonub naŋgo jejamu subq atonub qaji di qusaqas. Ariya tamo naŋgi subq na tigelqab qaji naŋgo jejamu olo qusaqasai. Naŋgi ŋambile gaigai sqab. 43Tamo naŋgi moreŋonub naŋgo jejamu subq atonub qaji di jejamu uge. Ariya tamo naŋgi subq na tigelqab qaji naŋgo jejamu di tulaŋ boledamu. Tamo naŋgi moreŋonub naŋgo jejamu subq atonub qaji di siŋgila saiqoji. Ariya tamo naŋgi subq na tigelqab qaji naŋgo jejamu di siŋgila ti sqas. 44Tamo naŋgi moreŋonub naŋgo jejamu subq atonub qaji di mandam qaji jejamu. Ariya tamo naŋgi subq na tigelqab qaji naŋgo jejamu di laŋ qaji jejamu.

Iga bini mandam qaji jejamu ti unum. Deqa iga qalieonum, mondoŋ gago laŋ qaji jejamu dego brantqas.
45Agi Qotei aqa anjam bei nami endegsib neŋgreŋyeb unu, “Adam namij a mandam qaji ŋambile osi soqnej.” Ariya Adam bunuj a bunuqna bosiqa a segi Mondor ti sosiqa tamo uŋgasari naŋgi laŋ qaji ŋambile enjrej. Adam bunuj di Kristus. 46Ŋambile Mondor na iga egej qaji di nami brantosai. Mandam qaji ŋambile di nami brantej. Ariya ŋambile Mondor na iga egej qaji di bunuqna brantej. 47Qotei na Adam namij a mandam na gereiyej. Deqa Adam a mandam qaji tamo. Ariya Adam bunuj a laŋ qureq na bej. 48Adam a mandam qaji tamo deqa aqa leŋ kalil naŋgi dego mandam qaji tamo. Ariya Kristus a laŋ qaji tamo deqa aqa tamo kalil naŋgi dego laŋ qaji tamo unub. 49Adam a mandam qaji tamo soqnej dego kere bini iga dego a bulosim mandam qaji tamo unum. Ariya Kristus a laŋ qaji tamo deqa mondoŋ iga dego a bulosim laŋ qaji tamo sqom.

50O was qu, e na niŋgi endegsi merŋgwai. Qotei na mandam qaji tamo naŋgi oqa keresai. Deqa a naŋgo Mandor Koba sosim naŋgi taqatnjrqa keresai dego. Gago jejamu moisim qusaqas qaji di ŋambile gaigai sqa keresai. 51Deqa e na uli anjam bei niŋgi endegsi merŋgwai. Iga kalil moiqasai. Ariya iga kalil jejamu bulyosim jejamu bunuj oqom. 52Qotei na gul bunu geteŋ qaji di anjamimqa tamo nami moreŋeb qaji naŋgi olo subq na tigelqab. Deqa naŋgo jejamu olo bunu qusaqasai. Ariya iga tamo moiosai qaji iga dego jejamu bulyosim olo jejamu bunuj oqom. O was qu, kumbra di urur brantoqujatqas. 53Gago jejamu ugeqas qaji endi iga uratosim olo jejamu bei ugeqasai qaji di oqom. Gago jejamu moiqas qaji endi iga uratosim olo jejamu bei moiqasai qaji di oqom. 54Bole, gago jejamu ugeqas qaji endi iga uratosim olo jejamu bei ugeqasai qaji di oqom. Gago jejamu moiqas qaji endi iga uratosim olo jejamu bei moiqasai qaji di oqom. Yim bati deqa Qotei aqa anjam bei nami neŋgreŋyeb qaji di aqa damu brantqas. Qotei aqa anjam agiende, “Qotei a tulaŋ siŋgilaosiq deqa a qoto buŋyosiq moio kobotej. 55O Moio, ni gaigai siŋgilaoqnsim tamo naŋgi qoto itnjreqnum. Ariya ino siŋgila di qabi unu? A koboej. O Moio, ni gaigai tamo naŋgi qaja na ñumeqnum. Ariya ino qaja di qabi unu? A koboej.”

56O was qu, moio aqa qaja agi une. Une aqa siŋgila agi Qotei aqa dal anjam. 57Ariya Qotei na gago Tamo Koba Yesus Kristus aqa siŋgila na iga siŋgilatgeqnu deqa iga qoto buŋyoqnsim tigelejunum. Deqa iga Qotei tulaŋ biŋiyeqnum.

58Deqa ijo was bole, niŋgi siŋgila na soqniye. Sosib niŋgi Tamo Koba Yesus qa waukobaoqniye. Niŋgi wau di urataib. Niŋgi qalie, niŋgi Tamo Koba Yesus aqa wau ojeqnub di uloŋqa keresai. Deqa niŋgi gaigai Tamo Koba Yesus aqa wau siŋgila na yoqniye.

Copyright information for `BOJ