1 Corinthians 4

Tamo Koba Qotei a segi na aqa wau tamo naŋgi peginjreqnu

O was qu, aqo Apolos wo Kristus aqa wau tamo. Iga Qotei aqa uli anjam taqatejunum. Niŋgi iga qa degsib are qaliye. Niŋgi qalie. Tamo bei na tamo bei aqa wau taqatqas di a na aqa medabu geregere dauryqas. Deqa niŋgi na kio anjam pegiyo tamo qudei naŋgi na kio ijo kumbra tenemtosib e pegibqab di e deqa yala are qalqasai. E segi dego ijo kumbra tenemtosaieqnum. Bole, e ijo kumbra uge bei qa poibosai. Ariya e endegsi marqa keresai, “E tamo tiŋtiŋo.” E degsi marqa keresai. Tamo Koba Qotei a segi na e pegibqas. Di aqa wau. Qotei na tamo naŋgo une qa peginjrqa bati brantosaiunu deqa niŋgi na tamo qudei naŋgi une ti qa minjraib. Niŋgi mati tariŋesoqnibqa mondoŋ Tamo Koba Yesus a bosimqa a segi na iŋgi iŋgi kalil ambruq di uliejunub qaji di suwaŋoq di atqas. Osim tamo kalil naŋgo areqalo dego boleq atqas. Yim bati deqa Qotei a gago segi segi kumbra geregere pegiyosim mergwas.

Korin naŋgi naŋgo segi ñam soqteqnub

O was qu, aqo Apolos wo gago kumbra qa agi e na niŋgi merŋgonum. Niŋgi gago kumbra deqa are qalsib Qotei aqa anjam neŋgreŋq di unu qaji di niŋgi geregere dauryosib olo gotraŋyaib deqa niŋgi merŋgonum. Deqa was qu, niŋgi diqoqnsib tamo qudei naŋgo ñam soqtetnjroqnsib olo tamo qudei naŋgo ñam aguq atoqnaib. Tamo yai na niŋgi tamo kokba atqo unub? Iŋgi bei kie nuŋgoq di unu di Qotei na niŋgi eŋgosai? Nuŋgo iŋgi iŋgi kalil agi Qotei na niŋgi eŋgej. Deqa niŋgi kiyaqa nuŋgo segi ñam olo soqtosib nuŋgo segi siŋgila na iŋgi iŋgi kalil di ejunub degsib are qaleqnub?

Od, niŋgi endegsib are qaleqnub, “Iga iŋgi iŋgi kalil kere na unum. Iga ñoro koba ejunum. Deqa iga na Pol wo Apolos wo naŋgi aiyel buŋnjrsimqa iga segi mandor kokba bul tigelejunum.” O was qu, niŋgi degsib are qalaib. Niŋgi mandor kokba bul tigelejunub qamu e niŋgi qa tulaŋ areboleboleibqo qamu. Osim aqo Apolos wo dego niŋgi beterŋgosim niŋgi koba na mandor kokba bul tigelejunum qamu. E endegsi are qalonum. Iga Yesus aqa anjam maro tamo unum deqa Qotei na gago ñam tulaŋ aguq atej unu. Deqa iga tonto tamo bulonum. Tonto tamo naŋgi agi anjam pegiyo tamo naŋgi na une ti qa minjroqnsib tamo kalil ti laŋ aŋgro naŋgi ti naŋgo ŋamgalaq dia naŋgi ñumoqnsib moiotnjreqnub. O was qu, iga tamo naŋgi di bul. 10 Iga Kristus aqa ñam osi laqnum deqa iga nanari tamo bul unum. Ariya niŋgi Kristus aqa kumbra qa tulaŋ qalie unub. Iga siŋgila saiqoji unum. Ariya niŋgi siŋgila ti unub. Iga ñam saiqoji unum. Ariya niŋgi ñam ti unub. 11 Iga nami mam ti ya qar ti soqnem agi bini unum. Iga gara bolesai dego. Tamo qudei naŋgi na iga ugeugeigeqnub. Iga tal saiqoji. 12 Iga ŋes ti gago segi baŋ na ti wauoqnsim unum. Tamo qudei naŋgi na iga misiliŋgeqnub. Ariya iga kamba naŋgi qa olo pailyeqnum. Tamo qudei naŋgi na iga ugeugeigeqnab iga na kamba naŋgi ugeugeinjrosaieqnum. Iga medabu getentosim gulube di qoboiyeqnum. 13 Tamo qudei naŋgi na iga yomuigeqnab iga na kamba olo naŋgi anjam bole minjreqnum. Iga tamo uge bulonum. Iga tamo uŋgasari kalil naŋgo ŋamgalaq dia iŋgi tulaŋ jigat bulosim unum. Iga nami degsi soqnem agi bini unum.

Pol a na Korin naŋgi minjrej, “Niŋgi ijo kumbra dauryiye.”

14 O was qu, niŋgi ijo anjam endi sisiyosib jemaiŋgwajqa e deqa neŋgreŋyosai. E nuŋgo areqalo tingitetŋgwajqa deqa osim anjam endi neŋgreŋyonum. Niŋgi ijo aŋgro bole. E niŋgi tulaŋ qalaqalaiŋgeqnum. 15 Tamo 10,000 naŋgi na Kristus aqa kumbra niŋgi osorŋgoqnqab di uŋgum. Niŋgi abu gargekoba sai. Agi e segi qujai nuŋgo abu. E qujai namo Kristus Yesus aqa anjam niŋgi merŋgonam qusib are bulyeb. Dena e nuŋgo abuem. 16 Deqa e niŋgi endegsi merŋgwai. Niŋgi ijo kumbra kalil unoqnsib dauryoqniye. 17 Utru deqa e Timoti qariŋyonumqa a niŋgi qa bqas. E nami Tamo Koba Yesus aqa anjam Timoti minjnam a are bulyosiqa siŋgilaej. Deqa a ijo aŋgro bole. E na a tulaŋ qalaqalaiyeqnum. A Tamo Koba Qotei aqa wau geregere taqateqnu. A niŋgi qa bosim ijo kumbra qa niŋgi saiŋgim niŋgi quqwab. Ijo kumbra agiende. E Kristus beteryejunum. Ijo kumbra di e na sawa sawa kalilq dia Kristen tamo uŋgasari naŋgi osornjreqnam naŋgi dauryeqnub.

18 Ariya niŋgi qudei are qaleqnub, e niŋgi qa bqasai. Osib deqa niŋgi diqoqnsib laqnub. 19 O was qu, niŋgi degaib. Tamo Koba Qotei na merbimqa e niŋgi qa urur boqujatqai. Tamo naŋgi diqoqnsib laqnub qaji naŋgo anjam quqwajqa e deqa bqasai. Naŋgo siŋgila qabe na eqnub di unqajqa bqai. 20 Di kiyaqa? Qotei a gago Mandor Koba sosiq iga taqatgeqnu di a laŋa anjam maro na iga taqatgosaieqnu. A aqa siŋgila kobaquja na iga taqatgeqnu. 21 Nuŋgo areqalo kie? E niŋgi qa bosiy ŋiriŋtŋgsiy tingitŋgwai kio e bosiy niŋgi qalaqalaiŋgosiy lawo na gereiŋgwai kio? Niŋgi segi mariye.

Copyright information for `BOJ