1 Corinthians 9

Pol a Yesus aqa wau ojeqnu dena a silali osaieqnu

Niŋgi ijo kumbra uniye. E kumbra kie yqa are sqas e yqai. Qotei na e qariŋbej deqa e aqa anjam marsim laqnum. E ijo segi ŋamdamu na gago Tamo Koba Yesus unem. E nuŋgo ambleq di Tamo Koba Yesus aqa wau ojem dena niŋgi are bulyosib Kristen tamo branteb. Niŋgi ijo kumbra deqa qaliesai kio? Tamo qudei naŋgi mareqnub, “Pol a Yesus aqa anjam maro tamo bolesai.” Naŋgi degsib mareqnub di uŋgum. Niŋgi segi e qa qalie. E nami Tamo Koba Yesus aqa anjam niŋgi merŋgeqnam qusib are bulyeb. Dena niŋgi qalieeb, e Tamo Koba Yesus aqa anjam maro tamo bole.

Tamo qudei naŋgi ijo kumbra laŋa tenemteqnub deqa e na kamba olo naŋgi endegsi nenemnjreqnum, “Iga Yesus aqa wau ojeqnum dena iga awai osim gago segi iŋgi ti ya ti uyqa kere e? Iga uŋa oqa are soqnim Kristen uŋa osim laqnqa kere e? Agi Tamo Koba Yesus aqa wau tamo qudei naŋgi ti aqa was naŋgi ti Pita ombla na uŋa oqnsib laqnub. Aqo Barnabas wo segi gago baŋ na wauoqnsim dena silali oqnqom e? Yesus aqa wau tamo qudei naŋgi degyqasai e?” O was qu, qoto tamo naŋgi qoteqnub dena naŋgi awai eqnub. Naŋgi naŋgo segi silali wau ojosaieqnub. Tamo naŋgi iŋgi yageqnub dena naŋgi iŋgi meli olo oqnsib uyeqnub. Tamo naŋgi kaja naŋgi taqatnjreqnub dena naŋgi muŋgum qaq olo oqnsib uyeqnub.

E mandam tamo naŋgo areqalo dauryosim deqa anjam di merŋgosai. Anjam di agi Qotei aqa dal anjamq di dego unu. Agi Moses a nami dal anjam bei endegsi neŋgreŋyej, “Bulmakau naŋgi rais paraparaiyoqnsib aqa sau taqal atoqnsib naŋgi aqa damu olo uyqa yoqnib niŋgi na naŋgi saidnjraib.” O was qu, Qotei a bulmakau naŋgi qa are qalsiq anjam di marej kio? Sai. 10 A iga qa osiqa anjam di marej. Od, Moses a iga qa osiqa anjam di neŋgreŋyej. Di kiyaqa? Tamo bei a iŋgi yagwas di iŋgi meliamqa a osim uyqas. Tamo bei a rais ñoqoryosim damu segitqas di a dego damu osim uyqas. Naŋgi nami qalieeb, naŋgi iŋgi di osib uyqab. Utru deqa naŋgi wau di yeqnub. 11 O was qu, iga Qotei aqa anjam qa niŋgi aqaryaiŋgoqnem. Di nuŋgo qunuŋ qa. Ariya niŋgi na kamba jejamu qa iŋgi iŋgi qa olo iga aqaryaigwajqa merŋgwom di iga une yonum e? Iga nuŋgo are miligiq di iŋgi yagobulem. Iŋgi di meliqo deqa niŋgi na olo otorosib egwajqa merŋgwom di iga une yonum e? Sai. 12 Yesus aqa wau tamo qudei naŋgi Qotei aqa anjam qa niŋgi aqaryaiŋgeqnub deqa niŋgi na naŋgi odnjreqnabqa naŋgi nuŋgoq dena awai olo eqnub. Ariya iga nami nuŋgo ambleq di wau utru atsim wauoqnem. Deqa niŋgi na iga dego odgib iga nuŋgoq dena awai oqom di kere.

Ariya iga na Kristus aqa anjam bole getentaim deqa iga nuŋgoq dena awai oqa uratem. Osim dena iga gulube gargekoba qoboiyoqnem.
13 Atra tamo naŋgi atra tal miligiq di wauoqnsib dena naŋgi iŋgi iŋgi oqnsib uyeqnub. Tamo naŋgi atra bijal taqateqnub qaji naŋgi dego atra bijalq dena atraiyqa wagme oqnsib uyeqnub. Niŋgi di qaliesai kio? 14 Dego kere Tamo Koba Yesus a endegsi marej, “Tamo naŋgi Qotei aqa anjam bole mareqnub qaji naŋgi dena awai oqnsib naŋgo segi iŋgi awaiyoqnsib uyoqnqab.”

15 Ariya e nuŋgoq dena awai oqa uratem. E nuŋgoq dena awai oqajqa are qalsim anjam endi neŋgreŋyosai. Tamo Koba Qotei a na e merbej, “Ni wau dena awai oqa kere.” Ariya e uratem. Degsi soqnim e moiqai. E ijo kumbra deqa tulaŋ areboleboleibeqnu. Deqa tamo bei na ijo kumbra di olo getentaiq. 16 E Yesus aqa anjam bole marsim laqnum ijo wau deqa e ijo segi ñam soqtqa keresai. Qotei na e wau ebej deqa e wau di yoqnqai. E uratqa keresai. Uratqai di Qotei na e gulube ebqas. 17 E ijo segi areqalo na Yesus aqa anjam marsim laqnum qamu e dena awai eqnum qamu. Ariya e ijo segi areqalo na wau di yosaieqnum. Qotei na wau ebej deqa e wau di yoqnsim laqnum. 18 Deqa e awai kie oqai? Ijo awai agiende. E Yesus aqa anjam bole maroqnsiy dena silali oqnqasai. Ijo awai bole agide. Bole, e silali oqa kere. Ariya e oqa uratem. E tamo uŋgasari naŋgi Qotei aqa anjam qa laŋa aqaryainjroqnqai. Ijo awai bole agide.

Pol a tamo uŋgasari kalil naŋgo wau tamo

19 E kumbra bei yqa are sqas e yqai. E tamo bei aqa sorgomq di sosai. Ariya e ijo segi areqalo na tamo kalil naŋgo sorgomq di sosim naŋgi qa wauoqnsim dena e na tamo gargekoba naŋgi are bulyetnjreqnam naŋgi Kristus aqaq beqnub. 20 Deqa e Juda naŋgo sorgomq di sosimqa e naŋgo kumbra dauryoqnsim dena e na naŋgi are bulyetnjreqnam naŋgi Kristus aqaq beqnub. Tamo naŋgi Moses aqa dal anjam aqa sorgomq di unub qaji naŋgi dego e na oqajqa deqa e naŋgo kumbra dauryoqnsim dal anjam aqa sorgomq di sobulejunum. Bole, e segi dal anjam aqa sorgomq di sosai. Ariya e naŋgo kumbra di dauryoqnsiy dena e na naŋgi are bulyetnjroqnit naŋgi Kristus aqaq bqajqa deqa are qalsim dal anjam aqa sorgomq di sobulejunum. 21 Tamo naŋgi Moses aqa dal anjam saiqoji unub qaji naŋgi dego e na oqajqa deqa e naŋgo kumbra dauryoqnsim dal anjam saiqoji sobulejunum. Bole, e Qotei aqa dal anjam ti unum. Agi e Kristus aqa dal anjam aqa sorgomq di unum. Ariya e naŋgo kumbra di dauryoqnsiy dena e na naŋgi are bulyetnjroqnit naŋgi Kristus aqaq bqajqa deqa are qalsim dal anjam saiqoji sobulejunum. 22 Tamo naŋgi siŋgila saiqoji unub qaji naŋgi dego e na oqajqa deqa e naŋgo kumbra dauryoqnsim siŋgila saiqoji sobulosim dena e na naŋgi are bulyetnjreqnam naŋgi Kristus aqaq beqnub. O was qu, e tamo kalil naŋgo sorgomq di sosim naŋgo kumbra dauryeqnum. Di kiyaqa? E na naŋgi qudei are bulyetnjroqnit naŋgi Kristus aqaq bqajqa deqa. 23 E kumbra kalil yeqnum qaji di e Yesus aqa anjam bole di siŋgilatqa marsim deqa yeqnum. Yimqa mondoŋ anjam bole di aqa awai Tamo Koba Yesus na e ebqas. Agi tamo kalil Yesus aqa anjam bole deqa naŋgo areqalo siŋgilateqnub qaji naŋgi awai di oqab.

Iga laŋ qaji awai oqajqa deqa gurgurqom

24 E mandam tamo naŋgo alaŋ qa merŋgwai. Tamo naŋgi gurguroqnsib bubuŋeqnub di naŋgi awai oqajqa. Ariya tamo qujai a segi na naŋgi kalil buŋnjrsimqa awai oqas. Dego kere niŋgi awai oqa marsib siŋgila na gurguroqniye. 25 Tamo gurgureqnub qaji naŋgi awai oqa marsib deqa gurgur qalieqa osib mati naŋgo segi jejamu siŋgilateqnub. Yim gurgur batiamqa naŋgi siŋgila na gurgurqab. Ariya naŋgo awai di mandam qaji awai. Deqa naŋgo awai di koboqas. Ariya laŋ qaji awai iga oqa mareqnum qaji di koboqasai. Di gaigai sqas. 26 Deqa e ururoqnsim laŋa laŋa ŋam atosaieqnum. E awai bole di koqyoqnsim urureqnum. E qoto tamo bul unum deqa e laŋa laŋa ijo baŋ waiyosaieqnum. E tamo qalqajqa deqa ijo baŋ tiŋsim geregere waiyeqnum. 27 Osim dena e na ijo segi jejamu qaloqnsim siŋgilateqnum. Yim ijo jejamu a ijo areqalo dauryqajqa deqa. E na tamo uŋgasari naŋgi Yesus aqa anjam bole minjre minjre laqnum. Ariya bunuqna e segi awai bole osaiaim deqa e na ijo segi jejamu qaloqnsim siŋgilateqnum.

Copyright information for `BOJ