1 Peter 5

O Kristen gate, niŋgi na Qotei aqa tamo uŋgasari naŋgi geregere taqatnjroqniye

O Kristen gate, e niŋgi anjam endegsi merŋgwai. E dego Kristen gate deqa Kristus a ijo ŋamgalaq dia jaqatiŋ osiq moinaq e unem. Mondoŋ Kristus a olo siŋgila ti ñam koba ti brantimqa bati deqa Qotei na laŋ qure qa iŋgi bole bole e ti niŋgi ti egwas. Deqa Kristen gate, niŋgi wau endegyoqniye. Qotei aqa tamo uŋgasari naŋgi kaja du du bul deqa a na naŋgi joqsiqa nuŋgo baŋq di atej unub. Deqa niŋgi na naŋgi geregere taqatnjroqniye. Qotei na niŋgi wau di eŋgej deqa niŋgi are bole na wau di yoqniye. Tamo qudei naŋgi siŋgila na niŋgi waiŋgibqa niŋgi deqa wau di yaib. Niŋgi silali qa osib wau di yaib. Niŋgi are bole na wau di yoqniye. Niŋgi na Qotei aqa tamo uŋgasari naŋgi siŋgila na taqatnjraib. Qotei na naŋgi joqsiqa nuŋgo baŋq di atej unub deqa niŋgi kumbra bole na naŋgi taqatnjriye. Yimqa naŋgi nuŋgo kumbra di unsib niŋgi daurŋgwab. Niŋgi kumbra degyibqa mondoŋ kaja naŋgo Mandor Koba Yesus a laŋ qureq na olo brantimqa bati deqa niŋgi awai tulaŋ boledamu oqab. Awai di ugeqa keresai. Gaigai sqas.

Iga gago segi jejamu osim Qotei aqa baŋq di atqom

O aŋgro wala, niŋgi Kristen gate naŋgo sorgomq di soqniye. Sosib niŋgi kalil nuŋgo segi ñam aguq atoqnsib Qotei aqa tamo uŋgasari naŋgo sorgomq di soqniye. Agi Qotei aqa anjam bei nami endegsib neŋgreŋyeb unu, “Tamo naŋgi naŋgo segi ñam soqteqnub qaji naŋgi Qotei na olo jeutnjreqnu. Ariya tamo naŋgi naŋgo segi ñam aguq ateqnub qaji naŋgi qa Qotei a olo are boleiyoqnsiq gereinjreqnu.” Deqa niŋgi nuŋgo segi ñam aguq atoqnsib Qotei agi siŋgila ti unu qaji aqa sorgomq di soqniye. Yimqa bati a nami giltej qaji di brantimqa a na nuŋgo ñam olo soqtetŋgwas. Qotei a gaigai niŋgi qa are qaleqnu. Deqa niŋgi gulube ti sosibqa nuŋgo gulube kalil di niŋgi osi giloqnsib Qotei aqa baŋq di uratoqniye.

Niŋgi nuŋgo segi walwel geregere taqatosib ŋam atsib soqniye. Bauŋ juwaŋ naŋgi tulaŋ leleŋoqnsib tamo ñumoqnsib uyeqnub dego kere nuŋgo jeu tamo Satan a na gaigai tamo uŋgasari naŋgi padaltnjrqajqa ŋamosiq laqnu. Ariya niŋgi Kristus qa nuŋgo areqalo siŋgilatoqnsib Satan gotraŋyoqniye. Niŋgi qalie, niŋgi jaqatiŋ eqnub dego kere Qotei aqa tamo uŋgasari sawa sawa kalilq di unub qaji naŋgi dego jaqatiŋ eqnub. 10 Qotei a bati gaigai iga qa are tulaŋ boleiyeqnu. A Kristus Yesus aqa ñam na niŋgi metŋgej deqa mondoŋ niŋgi Kristus ombla aqa riaŋ ti so bole gaigai sqab. Deqa niŋgi mandamq endia sokiñala jaqatiŋ oqnsib koboamqa Qotei a na niŋgi olo boletŋgsim siŋgilatŋgimqa niŋgi gaigai siŋgila na tigelesqab. 11 Qotei a bati gaigai siŋgila koba ti sqas. Bole.

Anjam mutu qudei

12 Anjam truquyala endi Sailas na e aqaryaibosiqa neŋgreŋyosiq niŋgi qa qariŋyqo. E qalieonum, Sailas a gago Kristen was bole. O was qu, Qotei a niŋgi qa are tulaŋ boleiyeqnu. E segi qalieo-num, Qotei a bati gaigai aqa kumbra di niŋgi osorŋgeqnu. E aqa kumbra deqa osim anjam endi neŋgreŋyonum. Deqa ijo anjam endena e na nuŋgo are tigeltetŋgitqa niŋgi siŋgila na tigelesoqniye.

13 Kristen was qu Babilon qureq dia Qotei qa loueqnub qaji naŋgi na niŋgi kaiyeiŋgonub. Agi naŋgi ti niŋgi ti Qotei na giltŋgej. Ariya Mak a dego niŋgi kaiyeiŋgwo. Mak a ijo aŋgro bul. 14 Niŋgi na nuŋgo Kristen was kalil naŋgi segi segi kundoqnjriye. Osib kumbra dena niŋgi na naŋgi tulaŋ qalaqalainjroqniye.

Niŋgi kalil Kristus beteryejunub deqa niŋgi lawo na soqniye.

Copyright information for `BOJ