1 Thessalonians 5

Yesus a olo bqajqa bati di tamo bei a qaliesai deqa niŋgi ŋam atsib soqniye

O was qu, Yesus a bati gembu bqas di tamo bei a qaliesai. Deqa iga anjam bei neŋgreŋyosim niŋgi qa qariŋyqa keresai. Niŋgi segi qalie, Tamo Koba Yesus bqajqa bati di bajiŋ tamo bul brantqas. Bajiŋ tamo naŋgi qolo beqnub dego kere Yesus bqajqa bati di lumu bosim tamo naŋgi pruqtnjrqas. Tamo uŋgasari naŋgi endegsib maroqnqab, “Bini bati bole. Iga bole unum.” Degsib maroqnibqa gulube kobaquja naŋgoq di brantoqujatqas. Uŋa aŋgrotqa osim jaqatiŋ eqnu dego kere. Gulube di naŋgi gotraŋyqa keresai. Ariya was qu, niŋgi ambruq di sosai deqa bati di bqas dena niŋgi pruqtŋgwasai. Bajiŋ tamo naŋgi boqnsib tamo naŋgi pruqtnjreqnub dego kere bati di bqas dena niŋgi pruqtŋgwasai. Niŋgi kalil puloŋ aqa aŋgro. Niŋgi suwaŋ aqa aŋgro. Iga qolo qaji tamo sai. Iga ambru qaji tamo sai dego. Deqa iga tamo naŋgi ŋereŋo ani naŋgi bul sqasai. Iga ŋam atoqnsim areqalo bole ti sqom. Iga qalie, tamo naŋgi ŋereŋeqnub qaji naŋgi qolo ŋereŋeqnub. Tamo naŋgi ya uysib nanarieqnub qaji naŋgi qolo ya uyeqnub. Ariya iga suwaŋ qaji tamo unum deqa iga areqalo bole ti sqom. Sosim iga Qotei qa gago areqalo siŋgilatoqnsim tamo naŋgi qalaqalainjroqnqom. Gago kumbra di iga siŋgilatosim qoto qa gara jugo bul jigsim tigelesqom. Osim iga mondoŋ Qotei na laŋ qureq joqsim oqwajqa deqa tariŋoqnqom. Gago kumbra di dego iga siŋgilatosim qoto qa gate tatal bul atsim tigelesosim ŋam atoqnqom. Qotei na iga aqa minjiŋ turqajqa deqa giltgosai. Gago Tamo Koba Yesus Kristus a na iga oqajqa deqa marsiq giltgej. 10 Yesus a iga qa moiej deqa iga ŋambile sqom kio iga moiqom kio di uŋgum. Iga Yesus koba na ŋambile gaigai sqom. 11 Deqa niŋgi segi segi Qotei aqa tamo uŋgasari naŋgi anjam bole minjroqnsib dena naŋgo are siŋgilatetnjroqniye. Agi bini niŋgi degyeqnub.

Qotei na niŋgi siŋgilatŋgoqnimqa niŋgi kumbra bole bole yoqniye

12 Ariya was qu, iga niŋgi endegsi merŋgwom. Niŋgi nuŋgo Kristen gate naŋgo sorgomq di soqniye. Tamo Koba Yesus a na naŋgi gate ateleŋej deqa naŋgi niŋgi aqaryaiŋgwajqa wauoqnsib Qotei aqa anjam niŋgi merŋgoqnsib nuŋgo kumbra tingitetŋgeqnub. 13 Naŋgi wau di yeqnub deqa niŋgi naŋgi qa are boleiŋgoqnim naŋgi qalaqalainjroqniye. Osib niŋgi kalil koba na are qujaitosib soqniye.

14 O was qu, iga na nuŋgo are tigeltetŋgimqa niŋgi na tamo naŋgi wauqajqa asginjreqnu qaji naŋgo kumbra olo tingi-tetnjroqniye. Osib tamo naŋgi ulaeqnub qaji naŋgo are siŋgila-tetnjroqniye. Osib tamo siŋgila saiqoji unub qaji naŋgi olo aqaryainjroqniye. Osib tamo kalil naŋgi lawo na geregereinjroq-niye.

15 Ariya tamo qudei naŋgi na niŋgi kumbra uge eŋgibqa niŋgi na kamba olo naŋgi kumbra uge enjraib. Niŋgi gaigai siŋgilaoqnsib Qotei aqa tamo uŋgasari naŋgi ti tamo uŋgasari kalil naŋgi ti kumbra bole bole enjroqniye.

16 Osib niŋgi gaigai areboleboleiŋgim soqniye. 17 Sosib gaigai pailyoqniye. 18 Kumbra kie nuŋgoq di brantoqnim, di uŋgum, niŋgi olo Qotei biŋiyoqniye. Qotei aqa areqalo agiende. Niŋgi Kristus Yesus beteryejunub deqa niŋgi kumbra degyoqniye.

19 Qotei aqa Mondor na niŋgi kumbra bei yqa are tigeltetŋgimqa niŋgi na olo getentaib. Niŋgi kumbra di yiye. 20 Qotei aqa medabu o qaji tamo naŋgi na anjam merŋgoqnibqa niŋgi naŋgi qa olo are ugeiŋgaiq. 21 Anjam kalil niŋgi queqnub qaji di niŋgi geregere quoqnsib tenemtoqnsib pegiyoqniye. Osib kumbra kalil dego pegiyoqnsib kumbra bole segi siŋgilatosib ojesoqniye. 22 Osib kumbra uge kalil uratoqniye.

23 Qotei a are lawo qa utru. A na nuŋgo areqalo tigeltetŋgimqa niŋgi nuŋgo segi jejamu osib a yekritosib aqa segi kumbra boleq di sosib dauryoqniye. Qotei a na nuŋgo mondor ti nuŋgo qunuŋ ti nuŋgo jejamu ti kalil taqatesoqnimqa niŋgi so bole sqab. Sosib mondoŋ gago Tamo Koba Yesus Kristus a olo bqas bati deqa niŋgi torei une saiqoji sqab. 24 Qotei agi niŋgi metŋgej qaji a na niŋgi aqaryaiŋgimqa kumbra kalil di nuŋgoq di brantqas. Di kiyaqa? Anjam kalil Qotei a mareqnu qaji di a olo dauryeqnu.

25 O was qu, niŋgi iga qa pailyoqniye.

26 Niŋgi na nuŋgo Kristen was kalil naŋgi segi segi kundoqnjriye. Kumbra di agi Qotei aqa tamo uŋgasari naŋgi yeqnub.

27 E Tamo Koba Yesus aqa ñam na niŋgi siŋgila na endegsi merŋgwai. Niŋgi na Qotei aqa tamo uŋgasari kalil naŋgi koroinjrsib ijo anjam neŋgreŋyonum qaji endi sisiyabqa naŋgi quqwab.

28 Gago Tamo Koba Yesus Kristus a niŋgi qa are boleiyeme.

Copyright information for `BOJ