1 Timothy 3

Tamo bei a Kristen naŋgo gate sqa marsimqa a kumbra tiŋtiŋ segi dauryoqnem

Ijo anjam endi bole. Deqa ni que. Tamo bei a Kristen naŋgo gate sqajqa marqas di a wau bole yqa marqo. Deqa ni unime. Tamo bei a Kristen naŋgo gate sqajqa marsimqa a kumbra tiŋtiŋ segi dauryoqnem. Yim tamo naŋgi aqa jejamuq di une bei unqasai. Tamo di a uŋa aiyeltaiq. A uŋa qujai segi esoqnem. Osim aqa segi so geregere taqatosim areqalo bole ti sosim kumbra bole bole yoqnem. Tamo laŋaj naŋgi aqa meq boqnibqa oqnsim geregereinjroqnem. A Qotei aqa anjam palontqajqa wau geregere poiyim anjam palontoqnem. A ya uyoqnsim nanarioqnaiq. A urur minjiŋ oqim qotoqnaiq. A lawo soqnem. A silali koba ti sqajqa are qaloqnaiq. A na aqa uŋa ti aqa aŋgro naŋgi ti geregere taqatnjreme. Yim aqa aŋgro naŋgi aqa anjam geregere quoqnsib dauryoqnqab. Tamo bei na aqa segi uŋa ti aqa aŋgro naŋgi ti geregere taqatnjrqasai di a na Kristen naŋgi dego geregere taqatnjrqa keresai. Deqa a Kristen naŋgo gate sqa keresai. Kristen tamo bunuj a gate ataim. A gate sqas di a diqosim marqas, “E tamo bolequja.” Yim Qotei na nami Satan ŋolawotej dego kere tamo di dego ŋolawotqas. Tamo bei a tamo uŋgasari Qotei qaliesai qaji naŋgo ŋamgalaq di ñam bole ti sqas di ni unsim a gate ate. A ñam bole ti sqasai di a gate sqa keresai. Di kiyaqa? Tamo qudei naŋgi a qa anjam uge marib gam dena Satan na a ugeugeiyqas.

Kristen naŋgo wau tamo naŋgi areqalo bole ti sosib wauoqnebe

Kristen naŋgo wau tamo naŋgi dego areqalo bole ti sosib wauoqnebe. Naŋgi medabu aiyeltaib. Naŋgi ya uysib nanarioqnaib. Naŋgi na tamo naŋgo silali yainjrqajqa are koba qalaib. Naŋgi Qotei aqa ŋamgalaq di une saiqoji soqnebe. Sosib anjam bole Qotei na nami iga osorgej qaji di siŋgila na ojesoqnebe. Agi iga Qotei qa gago areqalo siŋgilateqnum qaji iga anjam bole di osorgej. 10 O Timoti, ni Kristen naŋgo wau tamo naŋgo wau geregere peleiye. Naŋgi wau bole yibqa ni di unsim naŋgi wau tamo ate. 11 Naŋgo uŋgasari naŋgi dego ni na minjrim naŋgi areqalo bole ti sosib kumbra bole bole yoqnebe. Naŋgi yomu anjam maroqnaib. Naŋgi naŋgo segi so geregere taqatosib wau kalil Qotei na naŋgi enjrej qaji di geregere ojoqnebe. 12 Kristen naŋgo wau tamo naŋgi uŋa aiyeltaib. Naŋgi uŋa qujai segi esoqneb. Sosib naŋgo uŋgasari naŋgi ti naŋgo aŋgro naŋgi ti geregere taqatnjroqnebe. 13 Kristen naŋgo wau tamo naŋgi wau bole yoqnqab di naŋgi ñam bole ti sqab. Sosib naŋgi Kristus Yesus qa naŋgo areqalo siŋgilatoqnqab. Osib deqa naŋgi Yesus aqa anjam mare mare laqajqa ulaoqnqasai.

Qotei aqa kumbra nami uliesoqnej qaji di tulaŋ kobaquja

14 O Timoti, e ni qa urur bosiy numqajqa are koba unu. Ariya e are qalonum, e mati anjam endi neŋgreŋyosiy ni qa qariŋyqai. 15 Deqa e ni qa urur bosaiotqa ijo anjam neŋgreŋyonum qaji endi ni sisiyosim kumbra bole kalil Qotei na Kristen naŋgi dauryqa are qaleqnu qaji di ni qalieqam. Kristen naŋgo utru agiende. Naŋgi Qotei ŋambile gaigai unu qaji aqa segi tamo uŋgasari unub deqa naŋgi tal aqa ai bul tigelesosib Qotei aqa anjam bole siŋgila na ojejunub. 16 Iga bole qalieonum, Qotei aqa kumbra nami ulitesoqnej qaji di tulaŋ kobaquja. Kumbra di Qotei na iga osorgonaq unem. Aqa kumbra di agiende.

A segi tamo bulyonaqa tamo uŋgasari naŋgi a unoqneb.
Mondor Bole a na aqa kumbra bole babtosiq osorgej.
Osiq mergej, “Aqa kumbra di tulaŋ tiŋtiŋo.”
Laŋ aŋgro naŋgi dego a unoqneb.
Tamo naŋgi sawa bei beiq giloqnsibqa aqa anjam mare mare laqneb.
Deqa tamo uŋgasari mandamq endi unub qaji naŋgi a qa naŋgo areqalo siŋgilatoqneb.
Ariya Qotei na a olo osiq laŋ qureq osi oqnaqa a dia ñam kobaquja osiq unu.
Copyright information for `BOJ