1 Timothy 4

Mondoŋ gisaŋ tamo naŋgi bosib Kristen tamo uŋgasari naŋgo areqalo tulaŋ niñaqyetnjroqnqab

Qotei aqa Mondor a anjam endegsi babtej. Mondoŋ diŋo bati jojomoqnimqa tamo qudei naŋgi Kristus qa naŋgo areqalo siŋgilatqa uratqab. Di kiyaqa? Naŋgi gisaŋ mondor ti mondor uge uge ti naŋgo anjam qusib dauryqab deqa. Bati di gisaŋ tamo naŋgi boqnsib gisaŋ anjam di tamo uŋgasari naŋgi minjroqnqab. Tamo naŋgi di naŋgo areqalo tulaŋ niñaqejunu. Deqa naŋgi naŋgo segi une poinjrqa keresai. Tamo naŋgi di anjam uge endegsib tamo uŋgasari naŋgi minjroqnqab, “Niŋgi uŋataib. Niŋgi tamotaib. Niŋgi damu uyaib. Di getento kalil.” O Timoti, anjam di gisaŋ. Qotei a na iŋgi iŋgi kalil ateleŋej. Deqa iga a qa gago areqalo siŋgilateqnum qaji iga iŋgi iŋgi kalil di oqa marsim Qotei biŋiyosim oqom. Iga Qotei aqa anjam bole qalieonum deqa iga iŋgi di oqom. Iga qalie, iŋgi iŋgi kalil Qotei na atej qaji di bole. Deqa iga iŋgi bei getentqasai. Iga Qotei biŋiyoqnsim iŋgi iŋgi kalil di oqnqom. Qotei aqa anjam na ti gago pailyo na ti iŋgi iŋgi kalil di boleteqnu. Deqa iŋgi iŋgi di Qotei aqa segi iŋgi bole tiŋtiŋ.

Pol na Timoti minjej, “Ni Kristus aqa wau tamo bole soqne.”

O Timoti, ijo anjam di ni na Kristen was qu naŋgi olo minjroqne. Ni minjroqnqam di ni Kristus Yesus aqa wau tamo boledamu sqam. Deqa anjam bole ni ino areqaloq di siŋgilatejunum qaji dena ti powo bole ni osim dauryeqnum qaji dena ti ni olo torei siŋgilatmesqas. Ariya tamo qudei naŋgi sa anjam uge uge laŋa maroqnsib dena tamo uŋgasari naŋgi nanaritnjreqnub. Deqa ni na anjam di qoreiyosim Qotei aqa kumbra siŋgilatsim dauryoqne. Ni qalie, iga gago jejamu siŋgilatqa osim gaigai qaloqnsim siŋgilatoqnqom kumbra dena iga kiñala aqaryaigwas. Di kiyaqa? Gago jejamu di laŋa mandam qaji jejamu. Ariya iga Qotei aqa kumbra qa are qalsim siŋgilatoqnsim dauryoqnqom kumbra dena iga bole aqaryaigimqa iga mandamq endia so bole sosim mondoŋ dego iga ŋambile gaigai sqom. Anjam di bole. Tamo kalil naŋgi qusib marqab, “Bole.” 10 Qotei agi ŋambile gaigai unu qaji a na tamo uŋgasari kalil naŋgi oqajqa waueqnu. Od, a na iga tamo uŋgasari a qa gago areqalo siŋgilateqnum qaji iga bole eleŋej koboqo. Mondoŋ a na iga joqsim laŋ qureq oqwas. Iga deq oqwajqa tariŋoqnsim a qa gago areqalo siŋgilate-junum. Utru deqa iga gaigai Qotei aqa wau siŋgila na ojeqnum.

11 O Timoti, ni na anjam di Kristen tamo uŋgasari naŋgi plaltsim minjroqnimqa naŋgi qusib dauryoqnqab. 12 Tamo qudei naŋgi ni qa mareqnub, ni aŋgro kiñala. O Timoti, tamo naŋgi dena ino ñam ugetetmaib. Ni kumbra bole segi yoqnimqa Kristen tamo naŋgi na ni numoqnsib daurmoqnqab. Ino anjam maro na ti ino walwel na ti ni kumbra bole segi yoqne. Osim qalaqalaiyo kumbra dauryoqnsim Qotei qa ino areqalo siŋgila-toqnsim Qotei aqa ŋamgalaq di tamo bole une saiqoji soqne. 13 E ni qa urur bosaiotqa Kristen tamo uŋgasari naŋgi louqa korooqnibqa ni tigeloqnsim Qotei aqa anjam sisiyoqnsim anjam aqa damu palontoqnsim Qotei aqa kumbra dauryqa gam osornjroqne. 14 Nami Kristen gate naŋgi Qotei aqa ñam na ino gateq di naŋgo baŋ atnabqa Qotei na ni siŋgila emej. Onaqa bunuqna tamo bei na olo Qotei aqa medabu osiq ni qa anjam bei dego babtej. Deqa ni siŋgila di oqnsim wauqa asgimaiq. 15 Ni gaigai ino wau di geregere taqatosim siŋgila na wauoqne. Yimqa Kristen tamo uŋgasari kalil naŋgi ino kumbra di unoqnsib maroqnqab, “Bole.” 16 Ni ino segi kumbra ti ino anjam maro ti geregere taqatosim siŋgila na Qotei aqa wau yoqne. Yimqa ino wau dena Qotei na ni ti tamo uŋgasari kalil ino anjam qusib dauryeqnub qaji naŋgi ti oqas.

Copyright information for `BOJ