1 Timothy 5

Pol na Timoti minjej, “Ni Kristen tamo naŋgi tingitnjrqa osimqa ni mati endegsi are qale, naŋgi kalil ino was bul.”

Ni na tamo qeli naŋgi ŋiriŋtnjroqnaim. Ni lawo na naŋgi tingitnjroqne. Ni naŋgi tingitnjrqa osimqa naŋgi ino abu bul lawo na tingitnjroqne. Aŋgro meli naŋgi ti aŋgro wala naŋgi ti dego lawo na tingitnjroqne. Ni naŋgi tingitnjrqa osimqa naŋgi ino was bul lawo na tingitnjroqne. Uŋa qeli naŋgi dego tingitnjrqa osimqa naŋgi ino ai bul lawo na tingitnjroqne. Duŋgeŋge naŋgi dego tingitnjrqa osimqa naŋgi ino jaja bul lawo na tingitnjroqne. Ni Qotei aqa ŋamgalaq di kumbra bole na duŋgeŋge naŋgi tingitnjroqne.

Uŋa qobul naŋgi taqatnjrqajqa anjam

Nuŋgo ambleq di uŋa qobul naŋgi unub. Naŋgi qudei aŋgro saiqoji unub. Deqa ni na uŋa qobul naŋgi di kumbra bole enjroqne. Ariya uŋa qobul qudei naŋgo aŋgro ti moma ti unub. Deqa ni na naŋgo aŋgro ti moma ti minjrimqa naŋgi endegsi poinjrem. Naŋgo wau bole agi naŋgi na naŋgo ai naŋgi taqatnjroqnsib iŋgi iŋgi enjroqnqab. Naŋgi nami aŋgro kiñilala sonabqa naŋgo ai naŋgi waukobaoqnsib naŋgi gereinjroqneb. Ariya bini naŋgo ai naŋgi qobulonub deqa naŋgi na kamba naŋgi taqatnjrqab. Naŋgi kumbra di yqab di Qotei a naŋgi qa areboleboleiyqas.

Ariya uŋa qobul qudei naŋgi aŋgro saiqoji unub. Naŋgi segi unub deqa naŋgi Qotei qa naŋgo areqalo siŋgilatoqnsib a na naŋgi geregereinjrqajqa deqa tariŋoqnsib qolo ti qanam ti pailyoqnsib unub. Ariya uŋa qobul qudei naŋgi naŋgo segi jejamu qa areqalo uge uge dauryeqnub. Deqa naŋgi moiobule-junub. Deqa ni na uŋa qobul naŋgi di minjrimqa naŋgi Qotei pailyoqnsibqa kumbra bole segi dauryoqnebe. Yim deqa tamo uŋgasari qudei naŋgi anjam uge bei naŋgi qa marqa keresai. Ariya ni que. Tamo bei na aqa segi leŋ naŋgi ti aqa tal qujai naŋgi ti geregereinjrqasai di a kumbra tulaŋ ugedamu yqo. A Yesus qa aqa areqalo siŋgilatqa uratobulqo. Ni une. Tamo naŋgi Qotei qaliesai qaji naŋgi kumbra uge deqaji yosaieqnub.

O Timoti, ni na uŋa qobul qudei naŋgo ñam neŋgreŋyim Kristen tamo uŋgasari naŋgi na iŋgi iŋgi qa aqaryainjroqnqab. Ni na uŋa qobul endeqaji naŋgo ñam neŋgreŋye. Naŋgi uŋa qeli wausau 60 onub. Naŋgi nami tamo qujai segi esoqneb. 10 Naŋgi nami wau bole bole yoqneb deqa naŋgi tamo uŋgasari naŋgo ŋamgalaq di uŋa bole. Naŋgi na naŋgo aŋgro naŋgi geregere-injroqnsib boletnjroqneb. Tamo laŋaj naŋgi naŋgo meq beqnabqa oqnsib geregereinjroqneb. Naŋgi na Kristen tamo uŋgasari naŋgo siŋga yansetnjroqneb. Tamo uŋgasari naŋgi gulube ti sonabqa naŋgi na aqaryainjroqneb. O Timoti, ni na uŋa qobul deqaji naŋgo ñam neŋgreŋyim Kristen tamo uŋgasari naŋgi na iŋgi iŋgi qa aqaryainjroqnqab.

11 Ariya uŋa qobul meli naŋgi siŋgila bole unub deqa ni na naŋgo ñam ataim. Di kiyaqa? Naŋgi olo tamo oqajqa are prugnjreqnaqa Kristus qoreiyeqnub deqa. 12 Naŋgi nami Qotei aqa ñam na anjam siŋgilatosib mareb, “Iga olo tamo oqasai. Iga Kristus aqa kumbra segi dauryqom.” Ariya naŋgo anjam di naŋgi bunuqna uratosib olo tamo oqajqa are prugnjreqnu. Deqa naŋgi unetonub. 13 Naŋgo kumbra bei agiende. Naŋgi lalie kobaeqnub. Naŋgi wauqa asginjreqnaqa ta talq giloqnsib anjam laŋa laŋa maroqnsib yomu anjam quqwajqa tulaŋ arearetnjreqnu. Deqa anjam uge uge iga marqa keresai qaji di naŋgi olo mare mare laqnub. 14 Deqa e are qalonum, uŋa qobul meli naŋgi olo tamo osib aŋgrotoqnsib naŋgo segi tal gereiyoqnqab di kere. Naŋgi degyqab di jeu tamo naŋgi na naŋgo kumbra di unoqnsib deqa naŋgi Qotei aqa ñam misiliŋyqa keresai. 15 Ni qalie, uŋa qobul meli qudei naŋgi Qotei aqa gam bole uratoqnsib olo Satan dauryeqnub. 16 Ariya uŋa qudei Kristus qa naŋgo areqalo siŋgilateqnub qaji naŋgo ai naŋgi qobulonub deqa ni na naŋgi minjrimqa naŋgi na naŋgo ai naŋgi taqatnjrsib iŋgi iŋgi enjroqnqab. Yimqa Kristen naŋgi gulube di qoboiyqasai. Uŋa qobul aŋgro saiqoji unub qaji naŋgi segi Kristen naŋgi na taqatnjroqnsib iŋgi iŋgi qa aqaryainjroqnqab.

Kristen gate naŋgi wau bole yeqnub deqa iga na naŋgi geregereinjroqnqom

17 Kristen gate naŋgi wau bole yeqnub deqa ni na tamo uŋgasari naŋgi minjrimqa naŋgi na Kristen gate naŋgo ñam soqtetnjroqnsib naŋgi iŋgi iŋgi qa aqaryainjroqnebe. Kristen gate qudei naŋgi Qotei aqa anjam palontqajqa waukobaoqnsib Qotei aqa gam bole tamo uŋgasari naŋgi osornjreqnub. Deqa ni na tamo uŋgasari naŋgi minjrimqa naŋgi na Kristen gate naŋgi di tulaŋ geregereinjroqnebe. 18 Iga qalie, Qotei aqa anjam bei nami endegsib neŋgreŋyeb unu, “Bulmakau naŋgi waukobaoqnsib rais paraparaiyoqnsib aqa sau taqal ateqnub. Deqa niŋgi na naŋgi damu uyqa saidnjraib.” Iga qalie, “Tamo naŋgi wauqab di naŋgo awai dego naŋgi oqab.” 19 O Timoti, tamo qujai na ni mermqas, “Kristen gate bei di a une yqo.” Yimqa ni aqa anjam quetaim. Ariya tamo aiyel kio tamo qalub kio naŋgi na anjam di mermibqa ni naŋgo anjam di quetnjre. 20 Kristen gate bei a une yimqa ni na a osim Kristen gate kalil naŋgo ulatamuq di tigeltosim aqa une boleq atsim minjimqa Kristen gate kalil naŋgi kumbra di unsib naŋgi dego ulaqab.

Pol na Timoti minjej, “Ni Qotei aqa wau geregere taqatime.”

21 O Timoti, Qotei ti aqa laŋ aŋgro naŋgi ti Kristus Yesus ombla na naŋgo ŋamgalaq dia e siŋgila na anjam endegsi ni mermqai. Wau kalil e ino baŋq di atem qaji di ni geregere taqatosim wauoqne. Ni na ino was naŋgi ti tamo kokba ti naŋgi segi gereinjroqnaim. Ni tamo kalil naŋgi turtnjrsim gereinjroqnime. 22 Ni Kristen naŋgo gate bei atqa osimqa ino baŋ aqa gateq di urur ataim. Ni grotqam di a bunuqna une yimqa ni a ombla une oqam. Deqa ni ino segi so geregere taqatosim Qotei aqa ŋamgalaq di tamo bole une saiqoji soqne.

23 Ariya ni ma ti sosim mene jaqatiŋmeqnu deqa ni bunuqna ya segi uyaim. Ni ya ti wain ti turtsim uyoqne. Yim ino mene olo boleqas.

24 Tamo qudei naŋgo une boleqsi unu. Naŋgo une deqa Qotei na naŋgi awai uge enjrqas. Ariya tamo qudei naŋgo une uliejunu. Bunuqna naŋgo une di dego boleq dqas. 25 Dego kere tamo naŋgo kumbra bole qudei dego boleqsi unu. Ariya kumbra bole qudei urur boleq dqasai di uŋgum. Kumbra di bunuqna boleq dqas. Kumbra bole deqaji gaigai uliesqa keresai.

Copyright information for `BOJ