2 Corinthians 3

Yesus aqa wau tamo naŋgi aqa anjam bunuj marsib laqnub

Iga gago segi ñam olo soqteqnum e? Sai. Tamo qudei naŋgi kumbra endegyeqnub. Naŋgi tamo bei minjib a naŋgi qa anjam endegsi neŋgreŋyqas, “Naŋgi tamo bole.” Yim niŋgi anjam di sisiyosib naŋgo ñam soqtetnjrqajqa deqa. O naŋgi niŋgi merŋgib niŋgi naŋgi qa anjam endegsib neŋgreŋyqab, “Naŋgi tamo bole.” Yim tamo qudei naŋgi anjam di sisiyosib naŋgo ñam soqtetnjrqajqa deqa. Tamo qudei naŋgi kumbra degyeqnub. Ariya iga kumbra degyosaieqnum. Niŋgi segi gago kumbra qalie. Deqa niŋgi segi neŋgreŋ bulosib gago kumbra qa tamo naŋgi minjreqnub. Neŋgreŋ di gago are miligiq di unu. Deqa tamo kalil naŋgi neŋgreŋ di sisiyosib poinjreqnu. Gago wau na Kristus a anjam di neŋgreŋyosiq qariŋyej. Neŋgreŋ di boleq di unu. A Kristus aqaq na bej. Neŋgreŋ di agi niŋgi segi. Kristus a tamo bei aqa wau na neŋgreŋyosai. A Qotei ŋambile gaigai unu qaji aqa Mondor aqa wau na neŋgreŋyej. A meniŋq di neŋgreŋyosai. A tamo uŋgasari naŋgo are miligiq di neŋgreŋyej.

Anjam di aqa utru agiende. Qotei a Kristus aqa ñam na iga wau egej deqa iga aqa wau ojeqnum. Iga qalieonum, Qotei na aqa wau di geregere boletqas. Bole, iga segi na wau di ojqa keresai. Deqa iga gago segi siŋgila na wau bei yeqnum degsi marqa keresai. Qotei a segi na iga siŋgilatgeqnaqa iga wau yeqnum. Gago wau agiende. Iga Kristus aqa anjam bunuj aqa leŋ na siŋgilatej qaji di palontosim laqnum. Qotei a segi na iga siŋgilatgeqnu deqa iga wau di ojeqnum. Kristus aqa anjam bunuj di a dal anjamq di neŋgreŋyosai. Anjam bunuj di Qotei aqa Mondor Bole aqa segi anjam. Tamo naŋgi dal anjam dauryqa marqab di naŋgi moreŋqab. Ariya tamo naŋgi Qotei aqa Mondor dauryqab di a na naŋgi ŋambile enjrqas.

Niŋgi are qaliye. Dal anjam aqa wau agiende. A na tamo uŋgasari naŋgi moiotnjreqnu. Dal anjam di Qotei a meniŋq di neŋgreŋyonaqa a Qotei aqa riaŋ ti bej. Deqa Moses aqa ulatamu riaŋonaqa Israel tamo uŋgasari naŋgi aqa ulatamu koqyqa keresai. Ŋam qamotnjrej. Ariya bunuqna riaŋ di olo koboej. Ariya Qotei na aqa Mondor Bole tamo uŋgasari naŋgi enjrej aqa wau dena dal anjam aqa wau tulaŋ buŋyejunu. Deqa wau di Qotei aqa riaŋ ti aqa siŋgila ti sqas. Dal anjam aqa wau agiende. Dal anjam na iga gago une qa mergoqnsiq iga padaltgeqnu. Wau di Qotei aqa riaŋ ti bej. Ariya iga qalieonum, iga na tamo uŋgasari naŋgi Qotei aqa ŋamgalaq di tamo bole une saiqoji sqajqa gam osornjreqnum wau di olo tulaŋ riaŋ koba ti bqas. A na dal anjam aqa riaŋ tulaŋ buŋyqas. 10 Wau bunuj Qotei na yeqnu qaji di aqa riaŋ ti siŋgila ti unu. Riaŋ dena wau namij aqa riaŋ tulaŋ buŋyejunu. Deqa iga bini wau namij aqa riaŋ uneqnum di a torei koboej. 11 Wau namij di a gaigai sqa keresai. A koboqas. Ariya a Qotei aqa riaŋ ti bej. Deqa iga qalieonum, wau bunuj gaigai sqas qaji a olo tulaŋ riaŋ koba ti sqas. A na wau namij aqa riaŋ tulaŋ buŋyqas.

12 Riaŋ di bosim gaigai gagoq di sqajqa deqa tariŋoqnsim unum. Deqa iga ulaosaieqnum. Iga riaŋ deqa mare mare laqnum. 13 Nami riaŋ di koboeqnaqa Moses aqa ulatamu riaŋ ti soqnej deqa a gara mutu oqnsiqa dena aqa ulatamu kabutoqnej. Yim Israel naŋgi unaib deqa. Ariya iga Moses aqa kumbra di dauryosaieqnum. 14 Israel naŋgo areqalo geteŋnjresoqnej deqa naŋgi dal anjam namij sisiyoqneb di naŋgi anjam aqa utru poinjrosaioqnej. Naŋgi nami degsib soqneb agi bini unub. Naŋgo areqalo gara mutu na kabutobulejunu. Tamo bei na gara di taqal atqa keresai. Kristus aqa wau na segi Qotei na gara di olo taqal ateqnu. 15 Od, bati gaigai Israel naŋgi Moses aqa dal anjam sisiyeqnub di naŋgo areqalo gara mutu na kabutobulejunu. Naŋgi nami degsib soqneb agi bini unub. 16 Ariya tamo naŋgi are bulyosib Tamo Koba Yesus aqa areq bqab di Qotei na gara di olo taqal atetnjrqas. 17 Tamo Koba Yesus a segi Qotei aqa Mondor Bole. Tamo bei a Tamo Koba Yesus aqa Mondor ti sqas di aqa une na a olo ojqa keresai. A bole sqas. 18 Deqa gago ulatamu olo kabuesosai. Iga kalil Tamo Koba Qotei aqa riaŋ di ya jeqiloq di unobuleqnam riaŋ di gagoq di tulaŋ kobaqujaeqnaqa dena iga Qotei a segi buloqnsim unum. Tamo Koba Yesus a na kumbra di iga egeqnu. Tamo Koba a segi Qotei aqa Mondor Bole.

Copyright information for `BOJ