2 Corinthians 6

Qotei aqa wau tamo naŋgi gulube bei bei iteqnub

Iga Qotei ombla waueqnum deqa iga niŋgi siŋgila na endegsi merŋgwom, “Qotei a niŋgi qa are boleiyeqnu aqa kumbra di niŋgi osib olo laŋa urataib.” Agi Qotei aqa anjam bei nami endegsib neŋgreŋyeb unu, “E ni osiy boletmqajqa bati atem. Ariya bati di brantonaqa e ino pail qusim agi ni aqaryaimem.” O was qu, niŋgi quiye. Qotei na iga boletgwajqa bati agi bini brantqo. A na iga oqajqa bati agi bini qujai.

Tamo naŋgi gago wau endi uge qa maraib deqa iga na naŋgi kumbra uge bei enjrosaieqnum. Yim naŋgi uloŋosib uneq aio uge. Iga Qotei aqa wau tamo deqa iga gaigai tamo uŋgasari kalil naŋgo ŋamgalaq di kumbra bole yeqnum. Gulube bei bei gagoq di branteqnaqa iga siŋgila na tigeloqnsim gulube di qoboiyeqnum. Tamo qudei naŋgi na iga ugeugeigeqnab iga naŋgi qa ulaosaieqnum. Une bei bei na iga padaltgwa laqnaqa iga na olo gotraŋyeqnum. Gago jeu tamo naŋgi toqoŋ na iga lugoqnsib tonto talq di breigeqnub. Osib murqumyoqnsib iga qa anjam uge uge mareleŋeqnub. Iga gaigai ŋes na ti jaqatiŋ na ti waukobaeqnum. Iga geregere ŋeiosaieqnum. Iga bati gaigai mam ti laqnum. Iga gaigai kumbra bole jiga saiqoji dauryeqnum. Iga Qotei qa qalie bole unum. Iga urur minjiŋ oqosaieqnu. Iga na tamo uŋgasari naŋgi kumbra bole enjreqnum. Iga Qotei aqa Mondor Bole aqa siŋgila oqnsim unum. Iga na tamo kalil naŋgi qalaqalaiyo kumbra osornjreqnum. Iga laŋa medabu na naŋgi qalaqalainjrosaieqnum. Iga Qotei aqa anjam bole segi mareqnum. Iga Qotei aqa siŋgila oqnsim waueqnum. Iga gago baŋ wo na baŋ qonaŋ na qoto qa iŋgi iŋgi ojoqnsim dena kumbra bole tiŋtiŋ dauryoqnsim waueqnum.

Tamo qudei naŋgi gago ñam soqteqnub. Ariya tamo qudei naŋgi gago ñam ugeteqnub. Tamo qudei naŋgi iga qa yomueqnub. Ariya tamo qudei naŋgi olo gago kumbra bole babteqnub. Tamo qudei naŋgi are qaleqnub, iga gisaŋ tamo. Sai. Iga anjam bole segi mareqnum. Tamo qudei naŋgi iga ñam saiqoji qa mareqnub. Sai. Tamo gargekoba naŋgi iga qa bole qalieonub, iga Qotei aqa wau tamo bole. Iga moio tamo bulonum. Ariya iga olo ŋambile unum. Tamo qudei naŋgi na iga gulube koba egeqnub. Ariya gulube dena iga moiotgwa keresai. 10 Iga are gulubeigeqnu. Di uŋgum. Iga gaigai areboleboleigeqnu. Iga ñoro saiqoji unum. Di uŋgum. Iga na tamo uŋgasari naŋgi aqaryainjreqnam naŋgi laŋ qaji iŋgi iŋgi koba eleŋeqnub. Iga iŋgi iŋgi saiqoji unum. Ariya iga olo laŋ qaji iŋgi iŋgi kalil ejunum.

11 O Korin tamo uŋgasari, iga anjam kalil di boleq na niŋgi merŋgonum. Iga gago are miligi waqtosim niŋgi eŋgekritonum. 12 Iga gago are miligi getentosai. Iga niŋgi tulaŋ qalaqalaiŋgeqnum. Ariya niŋgi nuŋgo are miligi getentejunub. Niŋgi iga koba na are qujaitosai. 13 Niŋgi ijo aŋgro bul deqa e niŋgi endegsi merŋgwai. Iga gago are miligi waqtosim niŋgi qalaqalaiŋgeqnum dego kere niŋgi na kamba dego nuŋgo are miligi waqtosib iga qalaqalaigoqniye.

Iga na tamo uŋgasari Kristus qa naŋgo areqalo siŋgilatosaieqnub qaji naŋgi beternjrsim koba na wauqa keresai

14 Tamo uŋgasari Kristus qa naŋgo areqalo siŋgilatosaieqnub qaji naŋgo kumbra nuŋgo kumbra ti keresai. Deqa niŋgi naŋgi ti beterosib koba na wauaib. Niŋgi kumbra tiŋtiŋ dauryeqnub. Ariya naŋgi Qotei aqa dal anjam gotraŋyeqnub. Deqa niŋgi naŋgi ti beterosib wauqa kere e? Sai. Niŋgi suwaŋoq di unub. Ariya naŋgi ambruq di laqnub. Deqa niŋgi naŋgi ti beterosib wauqa kere e? Di keresai. 15 Kristus wo Satan wo naŋgi aiyel are qujaitosib ombla sqa kere e? Di keresai. Niŋgi Yesus qa nuŋgo areqalo siŋgilateqnub deqa niŋgi ti tamo uŋgasari Yesus qa naŋgo areqalo siŋgilatosaieqnub qaji naŋgi ti areqalo qujaitosib ombla sqa kere e? Di dego keresai. 16 Qotei aqa atra tal ti qotei gisaŋ naŋgo atra tal ti beterosib ombla sqa kere e? Di keresai. Niŋgi qalie, Qotei ŋambile gaigai unu qaji aqa atra tal agi iga segi unum. Agi Qotei aqa anjam bei nami endegsib neŋgreŋyeb unu, “E naŋgo ambleq di sosiy walweloqnqai. E naŋgo Qotei sqai. Naŋgi ijo segi tamo uŋgasari sqab.” 17 Tamo Koba Qotei a nami degsi marsiqa olo anjam bei dego endegsi marej, “‘Niŋgi na tamo uŋgasari e qa qaliesai qaji naŋgi uratnjrsib sasaloiye. Niŋgi kumbra jigat bei ojaib. Yim deqa e niŋgi eleŋosiy geregereiŋgoqnqai. 18 Osiy e nuŋgo Abu soqnit niŋgi ijo segi aŋgro tiŋtiŋ sqab.’ Tamo Koba Qotei siŋgila koba ti unu qaji a degsi marej.”

Copyright information for `BOJ