2 Corinthians 8

Kristen tamo uŋgasari naŋgi na Judia sawa qaji naŋgi aqaryainjrqajqa deqa silali koroiyeb

Ariya was qu, Qotei a Kristen tamo uŋgasari Masedonia sawaq di unub qaji naŋgi qa are tulaŋ boleiyosiq aqaryainjrej deqa iga na niŋgi saiŋgonam niŋgi quiye. Masedonia Kristen naŋgi gulube koba esoqneb dena naŋgi are tulaŋ gulubeinjrej. Bati deqa naŋgi iŋgi iŋgi tulaŋ saiqoji soqneb. Ariya Qotei na naŋgi siŋgilatnjrej deqa naŋgi olo areboleboleinjrnaqa Kristen tamo qudei naŋgi silali qa aqaryainjrqa marsib silali koba koroiyeb unu. E deqa niŋgi merŋgwai. Masedonia Kristen naŋgi naŋgo segi areqalo dauryosib silali di koroiyosib ateb. Naŋgo silali kiñala soqnej di naŋgi koroiyeb. Osib naŋgo kumbra di buŋyosib silali koba olo koroiyosib ateb. Naŋgi na iga waiŋgosib endegsib mergoqneb, “Niŋgi na iga wau egibqa iga Kristen naŋgi koba na wauoqnsim Qotei aqa tamo uŋgasari Judia sawaq di unub qaji naŋgi silali qa aqaryainjrqom.” O was qu, iga nami are qalem, naŋgi silali koroiyosib atqab. Ariya naŋgi kumbra di olo buŋyosib Qotei aqa areqalo dauryosib naŋgo segi jejamu dego osib Tamo Koba Qotei yeb. Osib iga dego egeb.

Nami Taitus a silali koroiyqajqa wau di nuŋgo ambleq di tigeltonaqa Qotei a niŋgi qa are tulaŋ boleiyosiq aqaryaiŋgej. Deqa iga na olo Taitus siŋgila na minjem, “Ni Korin naŋgoq gilsim wau di kobotime.” O was qu, bati gaigai niŋgi kumbra tulaŋ boledamu yeqnub. Agi niŋgi Qotei qa nuŋgo areqalo siŋgilatoqnsib aqa anjam palontqajqa waukobaeqnub. Niŋgi Qotei qa qalie koba ti sosib deqa niŋgi aqa wau ojqajqa tulaŋ siŋgilaeqnub. Osib niŋgi iga dego tulaŋ qalaqalaigeqnub. Ariya Qotei a niŋgi qa are tulaŋ boleiyosiq aqaryaiŋgej deqa niŋgi nuŋgo kumbra di olo buŋyosib silali koroiyqajqa wau di dego yoqnsib silali atib soqnem.

E na niŋgi wau di yqajqa siŋgila na merŋgosai. Kristen tamo uŋgasari qudei naŋgi wau di yqajqa tulaŋ siŋgilaeqnub. Naŋgo kumbra deqa agi e na niŋgi saiŋgonum. Yim niŋgi qusib niŋgi dego qalaqalaiyo kumbra dauryqajqa tulaŋ siŋgilaqab kio di e qalieqajqa deqa niŋgi saiŋgonum. Gago Tamo Koba Yesus Kristus a niŋgi qa are tulaŋ boleiyosiq aqaryaiŋgej di niŋgi qalie. Agi a nami laŋ qaji ñoro koba esosiqa ariya a niŋgi aqaryaiŋgwa osiq deqa a ñoro kalil di olo uratosiqa iŋgi tulaŋ saiqoji soqnej. Yim niŋgi kamba laŋ qaji ñoro koba oqajqa deqa.

10 Ariya e silali koroiyqajqa wau deqa olo merŋgwai. Ijo areqalo agiende. Wausau bei qa nami niŋgi namoqna silali koroiyqajqa wau di tigelteb bati deqa niŋgi wau di yqajqa tulaŋ arearetŋgej. 11 Ariya bini niŋgi wau di olo kobotqa siŋgilaoiye. Niŋgi degyqab di bolequja. Nami niŋgi wau di yqajqa are tulaŋ prugŋgoqnej. Deqa bini niŋgi silali yala soqnim siŋgilaosib wau di kobotiye. 12 Niŋgi silali koroiyqa are soqnim niŋgi koroiyiye. Yim Qotei a niŋgi qa tulaŋ areboleboleiyqas. Niŋgi silali saiamqa di uŋgum. Koroiyaib. Qotei a deqa ŋiriŋqasai. Niŋgi silali soqnim di niŋgi koroiyiye.

13 Niŋgi gulube koba abqa dena tamo qudei naŋgi olo bole sqajqa e deqa niŋgi merŋgosai. Ijo areqalo agiende. Iga kalil kerekere unum deqa iga kumbra qujai dauryosim tamo uŋgasari naŋgi aqaryainjroqnqom. 14 Bini niŋgi iŋgi iŋgi koba ti unub. Deqa niŋgi na tamo qudei iŋgi iŋgi qa truqueqnub qaji naŋgi aqaryainjriye. Ariya bunuqna niŋgi iŋgi iŋgi qa truquabqa naŋgi na kamba olo niŋgi aqaryaiŋgwab. Deqa niŋgi kalil kumbra qujai di dauryosib tamo uŋgasari naŋgi aqaryainjroqniye. 15 Agi Qotei aqa anjam bei nami endegsib neŋgreŋyeb unu, “Tamo naŋgi iŋgi koba koroiyeb qaji naŋgi iŋgi uynab menetnjrnaqa iŋgi oto bei uratosai. Ariya tamo naŋgi iŋgi kiñala koroiyeb qaji naŋgi dego iŋgi uynab menetnjrej. Naŋgi iŋgi bei qa truquosai.”

Pol na tamo qudei naŋgi qariŋnjrnaqa Korin naŋgi qa gileb

16 Ariya e Qotei biŋiyeqnum. Di kiyaqa? A na Taitus are pruqtetej deqa a iga ti are qujaitosiqa a dego niŋgi aqaryaiŋgwajqa siŋgilaej. 17 Iga na Taitus minjem, “Ni olo Korin naŋgi qa gile.” Onaqa a odej. Ariya a silali koroiyqajqa wau di yqa tulaŋ siŋgilaej deqa a aqa segi areqalo na odosiq niŋgi qa gilej. 18 Iga na Kristen was bei osim Taitus ombla qariŋnjrnam niŋgi qa gileb. Was bei di a Yesus aqa anjam bole marqajqa ñam ti. Kristen tamo uŋgasari qure qure kalilq di unub qaji naŋgi a qa qalie. 19 Di segi sai. Kristen tamo uŋgasari qure qure kalilq di unub qaji naŋgi na was di gilteb deqa a iga ti koba na walweloqnsim silali koroiyqajqa wau di taqateqnum. Wau di aqa utru agiende. Qotei a Kristen naŋgi qa are tulaŋ boleiyosiq aqaryainjrej deqa naŋgi silali di koroiyeb. Wau di iga na taqateqnum. Di kiyaqa? Iga wau dena Tamo Koba Yesus aqa ñam soqtimqa tamo kalil naŋgi unsib qalieqab, bole, iga wau di yqajqa are tulaŋ pruggeqnu. 20 Iga silali di taqateqnum deqa tamo qudei naŋgi iga qa yomuqab kio. Degaib deqa iga na was bei di osim koba na silali di taqateqnum. 21 Di kiyaqa? Iga kumbra bole segi dauryqajqa deqa. Iga Tamo Koba Qotei aqa ŋamgalaq di segi kumbra bole yqajqa are qalosai. Iga tamo uŋgasari naŋgo ŋamgalaq di dego kumbra bole yqajqa are qaleqnum.

22 Ariya iga olo gago Kristen was bei dego qariŋyonam a Taitus wo was de wo naŋgi aiyel daurnjrsiq koba na niŋgi qa gileb. Was bei di agi iga nami bati gargekoba aqa kumbra tenemtoqnem. A Qotei aqa wau ojqajqa tulaŋ siŋgilaoqnej iga degsi unoqnem. A niŋgi qa qalieosiq deqa mareqnu, “Korin Kristen naŋgi kumbra bole yqab.” A degsi mareqnu deqa bini a silali koroiyqajqa wau endi ojqajqa tulaŋ siŋgilaeqnu.

23 Niŋgi Taitus qalie. Aqo Taitus wo ombla niŋgi aqaryaiŋgwajqa wau qujai. Gago Kristen was aiyel naŋgi di Kristen tamo uŋgasari qure qure kalilq di unub qaji naŋgi qa wau bole yeqnub. Naŋgo wau dena naŋgi Kristus aqa ñam tulaŋ soqteqnub. 24 Deqa niŋgi na was aiyel naŋgi di kumbra bole enjroqniye. Yim Kristen tamo uŋgasari kalil naŋgi nuŋgo qalaqalaiyo kumbra di unsib marqab, “Bole.” Osib qalieqab, e nuŋgo kumbra bole qa naŋgi minjreqnum di e anjam bole minjreqnum.

Copyright information for `BOJ