2 Corinthians 9

Pol a silali koroiyqajqa wau qa anjam marej

Qotei aqa tamo uŋgasari Judia sawaq di unub qaji naŋgi aqaryainjrqajqa deqa silali koroiyeqnub. Wau di agi niŋgi qalieonub. Deqa e olo anjam olekoba tortoryqasai. E qalieonum, niŋgi wau di yqajqa are tulaŋ prugŋgeqnu. Deqa e gaigai Masedonia Kristen naŋgo ŋamgalaq dia nuŋgo ñam soqteqnum. Osim endegsi minjreqnum, “Wausau bei nami tamo uŋgasari Akaia sawaq di unub qaji naŋgi silali koroiyqajqa wau di tigeltqa mareb.” O was qu, niŋgi wau di yqajqa tulaŋ siŋgilaeqnub deqa e na Masedonia Kristen naŋgi minjreqnam quoqnsib naŋgi gargekoba dego wau di yqajqa are prugnjreqnu. E naŋgi niŋgi qa endegsi minjrem, “Korin Kristen naŋgi silali koroiyqajqa tulaŋ siŋgilaeqnub.” Ariya e nuŋgo ñam laŋa soqto uge deqa niŋgi silali koroiyiye. E deqa are qalsim deqa was qalub naŋgi di qariŋnjrnam niŋgi qa gileb. E qalieonum, niŋgi silali di koroiyosib atib sqas. Ariya e are qalem, Masedonia Kristen tamo qudei naŋgi e ombla na niŋgi qa bosim niŋgi nami silali di atosai di unsim iga ti niŋgi ti jemaigo uge. Deqa e are qalem, e na was qalub naŋgi di minjritqa naŋgi namoqna niŋgi qa gilsib nuŋgo silali niŋgi nami koroiyqa mareb qaji di gereiyibqa e bunuqna bosiy oqai. Yim tamo uŋgasari naŋgi silali di unsib qalieqab, niŋgi nuŋgo segi areqalo na silali di ateb unu. E na niŋgi silali di koroiyqajqa waiŋgosai.

Niŋgi geregere are qaliye. Tamo a iŋgi kiñala segi yagwas di a iŋgi kiñala segi olo oqas. Ariya tamo a iŋgi koba yagwas di a olo iŋgi koba oqas. Deqa niŋgi kalil segi segi silali atqa are soqnim silali atoqniye. Niŋgi qudei are gulube na silali ataib. Tamo bei na niŋgi qudei waiŋgim deqa silali ataib. Tamo naŋgi naŋgo segi areqalo dauryosib are bole na silali atoqnqab di kere. Yim Qotei na tamo naŋgi di tulaŋ qalaqalainjroqnqas. Qotei a na iŋgi bole bole niŋgi keretsim eŋgoqnqa kere. Yim niŋgi iŋgi koba ti sqab. Deqa niŋgi gaigai iŋgi iŋgi kere na sosibqa dena wau bole bole yoqniye. Agi Qotei aqa anjam bei nami endegsib neŋgreŋyeb unu,

“Tamo naŋgi saga yago breiyeqnub dego kere tamo bole bole naŋgi na naŋgo iŋgi iŋgi jeioqnsib tamo iŋgi saiqoji unub qaji naŋgi olo laŋa enjreqnub.
Naŋgo kumbra bole di bati gaigai sqas.”
10 O was qu, Qotei a na tamo naŋgi saga yago enjreqnaqa naŋgi breiyeqnub. A na tamo naŋgi bem enjreqnaqa naŋgi uyeqnub. Dego kere a na niŋgi iŋgi iŋgi keretsim eŋgoqnimqa niŋgi iŋgi iŋgi kere na sqab. Sosib dena niŋgi Qotei aqa tamo uŋgasari naŋgi aqaryainjroqniye. Yim tamo naŋgi saga yago breiyeqnab dena iŋgi koba oqeleŋeqnu dego kere nuŋgo kumbra bole di tulaŋ kobaoqnqas. 11 Qotei a na niŋgi iŋgi iŋgi koba eŋgeqnu deqa niŋgi na kamba iŋgi iŋgi di olo oqnsib Kristen tamo uŋgasari naŋgi enjroqniye. Gago baŋ na niŋgi na naŋgi silali di enjrib naŋgi deqa tulaŋ areboleboleinjrim Qotei biŋiyoqnqab. 12 Deqa wau niŋgi yeqnub qaji dena Qotei aqa tamo uŋgasari naŋgi aqaryainjrimqa naŋgi olo iŋgi qa truquqasai. Deqa naŋgi olo Qotei tulaŋ biŋiyoqnsib sqab. 13 Niŋgi naŋgi degsib aqaryainjreqnub deqa nuŋgo wau dena nuŋgo kumbra bole kalil boleq atekritqas. Yim naŋgi unsib qalieqab, niŋgi Kristus aqa anjam bole siŋgila na ojejunub deqa niŋgi aqa anjam geregere dauryeqnub. Iŋgi bole bole niŋgi na oqnsib naŋgi ti tamo uŋgasari kalil naŋgi ti enjreqnub qaji di naŋgi unoqnsib Qotei aqa ñam soqtoqnqab. 14 Osib qalieqab, Qotei a niŋgi qa are tulaŋ boleiyeqnu. Deqa naŋgi na niŋgi tulaŋ qalaqalaiŋgosib niŋgi qa Qotei pailyoqnqab. 15 Qotei a na iŋgi tulaŋ kobaquja iga egej. Iŋgi di agi Kristus qujai. Iŋgi di aqa utru iga geregere ubtsim marqa keresai. Qotei na iŋgi di iga egej deqa iga a tulaŋ biŋiyoqnqom.

Copyright information for `BOJ