2 Thessalonians 2

Yesus aqa bqajqa bati brantosaisoqnim Qotei aqa dal anjam gotraŋyo qaji tamo a brantqas

1O was qu, mondoŋ gago Tamo Koba Yesus Kristus a laŋ qureq dena boqnimqa niŋgi ti iga ti aqa siŋgaq di koroqom. Iga deqa niŋgi anjam kiñala merŋgim quiye. 2Tamo qudei naŋgi gisaŋoqnsib endegsib merŋgeqnub, “Tamo Koba Yesus a olo bqajqa bati brantqo.” Osib tamo qudei naŋgi endegsib mareqnub, “Qotei aqa Mondor na degsi babtosiq iga mergwo.” Olo tamo qudei naŋgi mareqnub, “Gago anjam di Qotei aqa anjam.” Olo tamo qudei naŋgi mareqnub, “Pol aqa wau qujai naŋgi ti anjam di neŋgreŋyonab iga sisiyem.” O was qu, naŋgo anjam di gisaŋ. Deqa niŋgi naŋgo anjam di qusibqa niŋgi urur prugugetosib are gulubeiŋgaiq. 3Tamo qudei naŋgi gisaŋ anjam deqaji niŋgi merŋgibqa niŋgi qusib dauryaib. Naŋgi gisaŋ kumbra dego niŋgi osorŋgibqa niŋgi bole edegaib. Niŋgi quiye. Yesus a olo bqajqa bati laŋa brantqasai. Bati di brantqa laqnimqa kumbra qudei namoqna endegsi bqas. Tamo gargekoba naŋgi boqnsib naŋgi tulaŋ diqoqnsib Qotei qoreiyoqnsib sqab. Satan a na aqa tamo kobaquja dego qariŋyim bqas. Tamo di a Qotei aqa dal anjam gotraŋyo qaji tamo. A ŋamyuoq di padalougetqas. 4Satan aqa tamo di a na qotei gisaŋ kalil naŋgi jeutnjroqnqas. Osim a diqoqnsim aqa segi ñam soqtoqnsim qotei gisaŋ naŋgi di tulaŋ buŋnjrqas. Deqa a Qotei aqa atra tal koba miligiq gilsim di awoosim marqas, “E segi Qotei.”

5Bati e nuŋgo ambleq di sosimqa e tamo uge deqa niŋgi merŋgoqnem. Niŋgi ijo anjam di olo are walŋgwo kio? 6Satan aqa tamo di a bosaiunu. A bqajqa bati agi Qotei a nami atej unu. A namoqna baim deqa a bqajqa gam tamo bei na getentejunu. Tamo yai na gam getentetejunu di niŋgi qalie. Ariya aqa bqajqa batiamqa Qotei na marim a brantqas. 7Niŋgi qalie, bini Qotei aqa dal anjam gotraŋyo qaji tamo di a ulioqnsiq waueqnu. Ariya a wauoqnimqa gam getentejunu qaji tamo di Qotei na taqal waiyim Satan aqa tamo kobaquja di a boleq dqas. 8A boleq dimqa Tamo Koba Yesus a riaŋ koba ti bosim aqa me mondor medabuq na puyimqa jagwa koba dosim dal anjam gotraŋyo qaji tamo di qalsim moiotqas. O was qu, Yesus aqa riaŋ dena tamo di tulaŋ padaltougetqas. 9Dal anjam gotraŋyo qaji tamo di a Satan aqa siŋgila ti bosim aqa gisaŋ kumbra na maŋwa gargekoba tamo uŋgasari naŋgi osornjroqnqas. 10Osim gisaŋ kumbra dena a na tamo uŋgasari padalqa gam dauryeqnub qaji naŋgi gisa gisaŋnjroqnqas. Yim naŋgi padalqab. Di kiyaqa? Qotei na naŋgi eleŋqa osiq aqa anjam bole naŋgi minjreqnaqa naŋgi deqa arearetnjrosaieqnu. 11Deqa Qotei na naŋgo areqalo niñaqyetnjrimqa naŋgi aqa anjam bole dauryqa uratosib Satan aqa gisaŋ anjam dauryoqnqab. 12Deqa iga qalieonum, tamo kalil Qotei aqa anjam bole naŋgo areqaloq di siŋgilatosaioqnsib kumbra uge uge yqajqa arearetnjreqnu qaji naŋgi di Qotei na ŋolawotnjrsim awai uge enjrqas.

Namoqna Qotei na niŋgi oqajqa deqa marsiq niŋgi giltngej

13Ariya was qu, Tamo Koba Yesus a na niŋgi tulaŋ qalaqalaiŋgeqnu. Deqa bati gaigai iga niŋgi qa are qaloqnsim Qotei biŋiyeqnum. Namoqna Qotei na niŋgi oqajqa deqa marsiq niŋgi giltŋgej. Aqa Mondor Bole na niŋgi siŋgilatŋgimqa niŋgi aqa segi tamo uŋgasari boledamu sosib aqa anjam bole nuŋgo areqaloq di siŋgilatib kumbra dena Qotei na niŋgi oqajqa deqa marsiq niŋgi giltŋgej. 14Qotei aqa areqalo agiende. Niŋgi gago Tamo Koba Yesus Kristus aqa riaŋ koba ti aqa siŋgila ti unqajqa. Deqa a na aqa anjam bole iga nami niŋgi merŋgoqnem qaji dena niŋgi metŋgej. 15Deqa was qu, niŋgi siŋgila na tigeloqnsib Qotei aqa anjam kalil iga nami niŋgi merŋgoqnem qaji di dauryosib soqniye. Anjam kalil iga neŋgreŋyosim niŋgi qa qariŋyoqnem qaji di dego niŋgi dauryoqniye.

16Gago Tamo Koba Yesus Kristus wo gago Abu Qotei wo naŋgi aiyel na iga tulaŋ qalaqalaigeqnub. Qotei a iga qa are boleiyoqnsiq deqa a gaigai gago are boletetgeqnu. Osiqa a na iga siŋgilatgeqnu. Deqa mondoŋ a na iga boletgwajqa deqa iga tariŋoqnsim unum. 17Qotei a na nuŋgo are siŋgilatetŋgoqnsim aqaryaiŋgoqnimqa niŋgi kumbra bole kalil geregere dauryoqnsib wau bole bole yoqniye.

Copyright information for `BOJ