2 Timothy 2

Pol na Timoti minjej, “Ni Kristus Yesus aqa qoto tamo bulosim soqne.”

Ariya ijo aŋgro Timoti, Kristus Yesus a iga qa are tulaŋ boleiyeqnu aqa kumbra dena ni gaigai siŋgilatmoqneme. Anjam kalil e tamo gargekoba naŋgo ŋamgalaq di palonteqnam ni quoqnem qaji di ni na osim olo tamo qudei Qotei aqa anjam siŋgila na ojeqnub qaji naŋgi di minjroqne. Yimqa naŋgi kamba anjam di olo tamo qudei naŋgi dego minjroqnqab.

Ni Kristus Yesus aqa qoto tamo bulosim aqo ombla gulube qoboiyesqom. Qoto tamo naŋgo kumbra di ni qalie. Naŋgi qotqajqa wau ojsibqa olo wau bei qa are qalosaieqnub. Naŋgi qotqajqa wau segi ojeqnub. Deqa naŋgo gate a naŋgi unjroqnsiq naŋgi qa tulaŋ areboleboleiyeqnu. Tamo bei wo bei wo gurgurosib bubuŋosib bei na bei buŋyosim di a awai oqas. Ariya bei a ururqajqa kumbra geregere dauryqasai di a awai oqasai. Tamo bei a wauosim iŋgi yagwas di iŋgi meliamqa a segi osim uyqas. Deqa tamo bei na a buŋyosim bosim iŋgi laŋa oqasai. O Timoti, ijo anjam e ni mermeqnum qaji endi ni qusim ino areqaloq di siŋgilatime. Yimqa Tamo Koba Qotei a na ni powo emimqa ni ijo anjam kalil endi geregere poimqas.

Ni gaigai Yesus Kristus qa are qaloqne. Yesus Kristus a moisiq olo subq na tigelej. A Mandor Koba Devit aqa leŋ. Aqa anjam bole agi e palontosim laqnum. E anjam bole di mareqnum deqa jeu tamo naŋgi na e tamo uge bul nuboqnsib e gulube koba ebeqnub. Deqa naŋgi na e ojsib tonto talq endia waibeb unum. Ariya naŋgi Qotei aqa anjam getentqa keresai. 10 Deqa e na ijo are miligi siŋgilatoqnsim gulube kalil di qoboiyoqnsim unum. E tamo uŋgasari Qotei na aqa segi qa giltnjrej qaji naŋgi aqaryainjrqajqa deqa osim gulube di qoboiyeqnum. Yimqa Qotei na naŋgi eleŋamqa naŋgi dego Kristus Yesus aqa ñam na ŋambile osib a ombla gaigai sqajqa deqa.

11 Iga Qotei aqa anjam bei dego gago areqaloq di siŋgilatqom. Anjam agiende.
“Iga Yesus a ombla moiem deqa iga a ombla olo ŋambile sqom.
12 Iga siŋgila na tigeloqnsim gulube kalil qoboiyoqnsim unum deqa mondoŋ iga Kristus ombla mandor kokba sqom.
Ariya iga a qoreiyqom di a na kamba iga qoreigwas.
13 Iga Kristus dauryqa marsimqa ariya gago anjam di iga olo dauryqa uratqom di Kristus a olo aqa segi anjam uratqa keresai. A dauryoqnqas.”

Pol na Timoti minjej, “Ni siŋgilaosim Qotei aqa wau tamo bole soqne.”

14 O Timoti, ni na gaigai tamo uŋgasari naŋgo areqalo tigeltetnjroqnimqa naŋgi anjam deqa are qaloqnqab. Ni Qotei aqa ŋamgalaq di naŋgi endegsi minjroqne, “Niŋgi anjam kiñilala qudei qa laŋa laŋa ŋiriŋoqnsib ñam qudei qa anjam na qotoqnaib. Nuŋgo anjam dena tamo naŋgi aqaryainjrqa keresai. Anjam di tamo naŋgi quoqnsib dena naŋgo areqalo ugetetnjreqnu.” O Timoti, ni na naŋgi degsi minjroqne.

15 Ni Qotei aqa wau tamo boledamu sqajqa siŋgilaoqnim Qotei a nuŋgo wau qa tulaŋ arearetoqnqas. Deqa ni Qotei aqa anjam bole geregere palontoqne. Ni degyqam di ni aqa ŋamgalaq di jemaimqasai. 16 Ariya tamo qudei Qotei aqa areqalo dauryosai qaji naŋgi anjam uge uge mareleŋeqnub. Deqa ni naŋgo anjam di qoreiye. Naŋgo anjam dena tamo naŋgi are tigeltetnjroqnim naŋgi Qotei qoreiyqa gam dauryoqnqab. 17 Naŋgo anjam di ma uge bulosim tulaŋ kobaqujaosimqa tamo naŋgi ugeugeinjrqas. Tamo aiyel anjam uge mareqnub qaji agi Himeneus wo Filetus wo. 18 Naŋgi aiyel anjam bole qa gam uratosib gisaŋ anjam endegsib mareqnub, “Tamo uŋgasari kalil naŋgi nami subq na tigeleb koboqo. Deqa iga olo bunuqna subq na tigelqasai.” Naŋgo gisaŋ anjam dena naŋgi na tamo uŋgasari qudei nami Yesus qa naŋgo areqalo siŋgilateb qaji naŋgo areqalo olo ugetetnjreqnub.

19 Ariya Qotei aqa segi tamo uŋgasari naŋgi tal aqa ai bulosib siŋgila na tigelejunub. Tal aqa aiq di Qotei a anjam endegsi neŋgreŋyej, “Tamo Koba Qotei a aqa segi tamo uŋgasari naŋgi qa qalie bole.” Anjam bei dego tal aqa aiq di endegsi neŋgreŋyej, “Tamo kalil Qotei aqa ñam ti unub qaji naŋgi kumbra uge kalil qoreiyoqnebe.”

20 Tal kobaquja miligiq dia tabir qudei gol na ti silva na ti gereiyeb. Tabir qudei ŋamtaŋ na gereiyeb. Tabir qudei mandam na gereiyeb. Tabir qudei wau bole qa gereiyeb. Ariya tabir qudei wau kiñilala qa gereiyeb. 21 Deqa tamo bei a kumbra uge kalil uratekritosim Qotei aqa ŋamgalaq di tamo bole sqas di a tabir wau bole qa gereiyeb qaji di bul sqas. Deqa a Qotei aqa tamo tulaŋ boledamu sosim Tamo Koba Yesus geregere wauetoqnqas. A wau bole kalil yoqnqajqa tulaŋ kere sqas.

22 Deqa areqalo uge uge kalil aŋgro wala naŋgo are miligiq dena branteqnu qaji di ni na qoreiye. Osim ni kumbra tiŋtiŋ yqajqa wauoqnsim Qotei qa ino areqalo siŋgilatoqnsim tamo kalil naŋgi qalaqalainjroqnsim are lawo na soqne. Ni ti tamo kalil are bole na Tamo Koba Qotei qa louoqnsib aqa ñam na pailyeqnub qaji naŋgi ti kumbra di yoqniye. 23 Tamo naŋgi areqalo bole ti sosai qaji naŋgi nanari anjam laŋa laŋa marele-ŋeqnub. Deqa ni naŋgo anjam di quoqnaim. Ni qalie, anjam uge dena qoto ti ŋiriŋ ti tigelteqnu. 24 Ni na Tamo Koba Qotei aqa wau tamo naŋgi minjrimqa naŋgi anjam na qotoqnsib ŋiriŋoqnaib. Naŋgi na tamo kalil naŋgi kumbra bole enjroqnebe. Tamo qudei naŋgi na bosib naŋgi gulube enjribqa naŋgi deqa ŋiriŋaib. Naŋgi kamba olo Qotei aqa kumbra bole naŋgi osornjroqnebe. 25 Ni na Qotei aqa wau tamo naŋgi minjrimqa naŋgi lawo na tamo naŋgi Qotei aqa anjam gotraŋyeqnub qaji naŋgo areqalo tingitetnjroqnebe. Yimqa Qotei na naŋgo are bulyetnjrimqa naŋgi aqa anjam bole poinjroqnim dauryoqnqab. 26 Nami Satan a siŋgila na tamo naŋgi di ojeleŋesonaqa naŋgi aqa anjam dauryoqneb. Ariya Qotei aqa wau tamo naŋgi lawo na naŋgi tingitnjribqa naŋgi Qotei aqa anjam bole qa poinjrimqa naŋgi olo areqalo bole ti sosib Satan aqa baŋq dena jaraiosib sawa boleq di sqab.

Copyright information for `BOJ