2 Timothy 4

Pol na Timoti minjej, “Ni Kristus aqa anjam palontqajqa tulaŋ siŋgilaoqne.”

Qotei wo Kristus Yesus wo naŋgo ŋamgalaq di e ni siŋgila na endegsi mermqai. Mondoŋ Kristus Yesus a laŋ qureq dena brantosim bati deqa a na tamo uŋgasari kalil ŋambile so qaji naŋgi ti tamo uŋgasari nami moreŋeb qaji naŋgi ti naŋgo kumbra qa peginjrqas. Osim a bati gaigai naŋgo Mandor Koba sqas. Deqa ni Kristus aqa anjam palontqajqa siŋgilaoqne. Yimqa tamo qudei naŋgi ino anjam quqwa arearetnjroqnqas. Ariya tamo qudei naŋgi ino anjam quqwa asginjroqnqas. Di uŋgum. Ni gaigai Kristus aqa anjam naŋgi siŋgila na minjroqne. Osim anjam dena naŋgo are qametnjroqnsim naŋgo areqalo tigeltetnjroqne. Yim naŋgi are bulyoqnsib Qotei aqa kumbra dauryoqnqab. Deqa ni gaigai kumbra lawo na naŋgi gereinjroqnsim Qotei aqa kumbra naŋgi osornjroqne. Ni que. Bunuqna tamo gargekoba naŋgi Qotei aqa anjam quqwa asginjroqnimqa naŋgi anjam utru bei bei quqwajqa are prugnjroqnim naŋgo segi areqalo na tamo qudei naŋgi metnjroqnib bosib gisaŋ anjam minjroqnib qusib arearetnjroqnqas. Deqa naŋgi anjam bole quqwajqa uratoqnsib-qa laŋa sa anjam quqwajqa dab atoqnqab. Ariya Timoti, ni gaigai areqalo bole na sosimqa gulube ti jaqatiŋ ti qoboiyoqnsim siŋgila na tigelesoqne. Osim ni na Yesus aqa anjam bole tamo uŋgasari naŋgi minjroqnsim laqne. Ni naŋgi aqaryainjrqajqa wau ti unum deqa ni wau di yoqne.

Pol a moiqa bati jojomej

Ni qalie, jeu tamo naŋgi na e lubsib moiotbqa bati jojomqo. Israel naŋgi wain bilentoqnsib Qotei atraiyeqnub dego kere e moisiyqa ijo leŋ aiqas dena Qotei atraiyobulqai. Tamo naŋgi gurguroqnsib bubuŋeqnub dego kere e nami siŋgila na ururosim Kristus dauryoqnem agi e degsi unum. Ariya bini e ijo wau kobotonum. E Qotei qa ijo areqalo siŋgilatoqnem di e uratosai-oqnem. Agi bini e siŋgila na ojejunum. Tamo naŋgi gurgu-roqnsib bubuŋeqnub di naŋgi awai oqajqa. Ariya ijo awai bole agi Qotei a laŋ goge dia atej unu. E awai di oqajqa deqa tariŋoqnsim unum. Ijo awai agiende. Mondoŋ Tamo Koba Qotei na e tamo bole une saiqoji qa merbqas. Di ijo awai bole. Tamo Koba Qotei a kumbra tiŋtiŋ na tamo uŋgasari naŋgo kumbra qa naŋgi peginjreqnu. Ariya Qotei na naŋgi peginjrqajqa batiamqa a na awai bole di e ebqas. A e segi awai ebqasai. Tamo kalil Yesus a laŋ goge dena brantim unqajqa deqa areboleboleinjreqnaqa tariŋeqnub qaji naŋgi ti awai bole egwas.

Pol na Timoti minjej, “Ni e qa urur au.”

O Timoti, ni e qa urur au. 10 Ni que. Demas a mandam endeqa kumbra qa tulaŋ areareteqnu. Deqa a na e uratbosiqa Tesalonaika qureq gilej. Ariya Kresens a Galesia sawaq gilej. Taitus a Dalmesia sawaq gilej. 11 Aqo Luk wo segi unum. Deqa ni Mak osimqa endeq boiye. Mak a tamo bole. A na e aqaryaiboqnsiqa wau bole yeqnu. 12 Tikikus agi e na qariŋyonam Efesus qureq aiej.

13 Ni e qa bqa osimqa ijo gara jugo Troas qureq di uratem qaji di osim osau. Agi Karpus aqa talq di uratem unu. Ijo buk dego osau. Ariya ijo pepa lulumo wagme naŋgo jegara na gereiyo qaji di dego osim osbetbe. Ni are walmaiq.

14 Bras na iŋgi iŋgi gereiyo qaji tamo aqa ñam Aleksander a na e ugeugeiboqnej. Deqa mondoŋ Tamo Koba Qotei na a kamba bar anaiyqas. 15 Aleksander a nami iga jeutgoqnsiqa gago anjam tulaŋ ugeugeiyoqnej. Deqa ni a qa geregere ŋam atoqne.

16 Bati jeu tamo naŋgi namoqna e ojsib Rom qaji anjam pegiyo tamo aqa ulatamuq dia tigeltbeb bati deqa tamo bei na e taqbosai. Tamo kalil naŋgi e uratbosib jaraieb. Deqa e Qotei endegsi pailyem, “O Abu, ni naŋgo une deqa are qalsim naŋgi olo kambatnjraime.” E degsi Qotei pailyem. 17 Ariya Tamo Koba Yesus a segi na e taqbosiqa siŋgila ebej. Deqa e anjam pegiyo tamo aqa ulatamuq dia tigelosimqa Yesus aqa anjam bole mareqnamqa sawa bei bei qaji tamo naŋgi quoqneb. Qotei na e aqaryaibosiqa bauŋ juwaŋ naŋgo medabuq dena e osiq taqal waibej. 18 Deqa e qalieonum. Jeu tamo naŋgi boqnsib kumbra uge uge ebqa maroqnib Qotei na e aqaryaiboqnsim naŋgo baŋq dena e oqnsim taqal waiboqnqas. Osim bunuqna a na e laŋ qureq osi oqsim dia e taqatboqnsim ijo Mandor Koba sqas. Deqa iga bati gaigai aqa ñam soqtoqnqom. Bole.

19 O Timoti, ni na ijo kaiye anjam endi osim tamo naŋgi Onesiforus aqa talq di unub qaji naŋgi ti Prisila wo Akwila wo naŋgi koba na minjrime. 20 Erastus a Korin qureq di unu. Ariya Trofimus a Miletus qureq dia ma ti sonaq e a uratem unu. 21 Ni e qa urur boqujat. Ni tariŋoqnim ulili bati bo uge.

Yubulus na Pudens na Linus na Klodia na naŋgi Kristen tamo kalil ti koba na kaiye anjam endi ni qa qariŋyonub.

22 Tamo Koba Yesus a na ino qunuŋ geregere taqateme. Osim niŋgi kalil qa are boleiyeme.

Copyright information for `BOJ