Acts 23

Onaqa Pol a Juda tamo kokba naŋgi koqnjrsiqa endegsi minjrej, “O ijo was niŋgi quiye. E nami Qotei aqa ŋamgalaq dia kumbra bole bole yoqnem agi bini yoqnsim unum. Deqa e are gulube saiqoji.” Onaqa atra tamo gate aqa ñam Ananaias a Pol aqa anjam di qusiqa minjiŋ oqetonaqa tamo naŋgi Pol aqa areq di tigelesoqneb qaji naŋgi minjrej, “Niŋgi Pol aqa medabuq di qaliye.” Onaqa Pol na Ananaias minjej, “Qotei na ni dego lumqas. Ni ŋamtaŋ jigat ŋam qaq qat na laŋa babaŋq di limo bul. Deqa ino uno boledamu. Ariya ino miligi jigat. Agi ni Moses aqa dal anjam dauryosim ijo une qalieqajqa tigeltbonum. Osim olo Moses aqa dal anjam gotraŋyosim naŋgi e lubqajqa minjronum. Di kumbra uge.”

Onaqa tamo naŋgi Pol aqa areq di tigelesoqneb qaji naŋgi aqa anjam di qusibqa minjeb, “Ni kiyaqa Qotei aqa atra tamo gate degsi misiliŋyonum?” Degsib minjnabqa Pol na minjrej, “O was qu, a atra tamo gate di e qaliesai. Deqa e anjam grotonum. Agi Qotei aqa anjam bei nami endegsib neŋgreŋyeb unu, ‘Ni ino gate koba anjam uge minjaim.’ Deqa niŋgi kere merbonub.”

Ariya Juda tamo kokba awoeleŋesoqneb qaji naŋgo ambleq dia Sadyusi tamo ti Farisi tamo ti soqneb. Onaqa Pol a degsi qalieosiqa leleŋosiq minjrej, “O ijo was niŋgi quiye. E Farisi tamo. Ijo abu a dego Farisi tamo. Deqa e endegsi are qalonum. Tamo kalil moreŋo qaji naŋgi mondoŋ olo subq na tigelqab. Anjam deqa e ijo areqalo tulaŋ siŋgilatejunum. Anjam deqa qujai naŋgi na e ojsib agi nuŋgo ŋamdamuq di tigeltbonub.”

Pol a na naŋgi degsi minjrnaqa Farisi ti Sadyusi ti naŋgi ŋiriŋkobaosib areqalo aiyel osib poeleŋeb. Di kiyaqa? Sadyusi naŋgi gaigai maroqneb, “Tamo moreŋo qaji naŋgi olo subq na tigelqasai. Laŋ aŋgro saiqoji. Mondor dego saiqoji.” Ariya Farisi naŋgi maroqneb, “Tamo moreŋo qaji naŋgi bole subq na olo tigelqab. Laŋ aŋgro unub. Mondor naŋgi dego unub.” Deqa naŋgi poeleŋosib ŋiriŋosib murqumyoqneb. Onaqa Farisi naŋgo dal anjam qalie tamo qudei naŋgi tigelosib siŋgila na mareb, “Iga Pol aqa anjam quonum di a une saiqoji. Mondor bei na kio laŋ aŋgro bei na kio anjam minjonubqa a degsi marqo.” 10 Onaqa Sadyusi naŋgi anjam di qusibqa naŋgi tulaŋ ŋiriŋkobaosib Pol qalqajqa laqnabqa qaja tamo naŋgo gate koba a di unsiqa are qalej, “Naŋgi Pol ojsib aqa jejamu tulaŋ ugeugeiyqab.” A degsi are qalsiqa ulaosiq aqa qaja tamo naŋgi metnjrnaqa bosib Sadyusi naŋgo baŋq dena Pol yainjrsib naŋgo ŋeio talq olo osi gileb.

11 Gilsib di sonab nebeosiq olo qoloonaqa Tamo Koba Yesus a bosiqa Pol aqa areq di tigelosiq minjej, “Ni are siŋgilatime. Ulaaim. Ni Jerusalem endia ijo anjam mare mare laqnum dego kere ni Rom aisim dia dego ijo anjam siŋgila na minjroqne.” Tamo Koba Yesus na Pol degsi minjej.

Juda tamo qudei naŋgi Pol qalsib moiotqajqa anjam qoseb

12 Onaqa olo nebeonaqa Juda tamo qudei naŋgi koroosibqa are qujaitosib anjam endegsib qoseb, “Iga Pol qalsim moiotqom. Gago anjam di iga bole dauryqom. Iga uratqasai bolesai. Deqa iga Pol moiotosaisosimqa iga iŋgi ti ya ti mati uyqasai. Iga Pol qalsim moiotosimqa ariya bati deqa iga olo iŋgi ti ya ti uyqom.” 13 Juda tamo 40-pela naŋgi anjam degsib qoseb. 14 Osib atra tamo kokba ti Juda tamo bole bole ti naŋgoq gilsib minjreb, “Iga anjam endegsi qosonum. Iga Pol qalsim moiotqom. Gago anjam di iga bole dauryqom. Iga uratqasai bolesai. Deqa iga Pol moiotosaisosimqa iga iŋgi ti ya ti mati uyqasai. Iga Pol qalsim moiotosimqa ariya bati deqa iga olo iŋgi ti ya ti uyqom. Iga anjam degsi qosonum. 15 Deqa niŋgi na qaja tamo naŋgo gate koba a endegsi minjiye, ‘Ni Pol olo osau. Osbamqa iga olo koroosimqa aqa anjam geregere qusim aqa une qalieqom.’ Niŋgi na qaja tamo naŋgo gate koba a degsi minjibqa a Pol osi bosim nuŋgoq di brantosaisoqnimqa gamq dia iga Pol qalsim moiotqom.”

16 Ariya naŋgi anjam degsi keretonabqa Pol aqa nawi aqa ŋiri a naŋgo anjam di qusiqa tigeloqujatsiq qaja tamo naŋgo ŋeio talq gilsiqa anjam di Pol minjej. 17 Minjnaq qusiqa qaja tamo gate bei metonaq aqa areq bonaq minjej, “Ni aŋgro wala endi osim nuŋgo gate koba aqa areq osi aiimqa a na anjam bei minjqas.” 18 Onaqa gate koba dena aŋgro wala di osiqa aqa gate koba aqa areq osi aisiqa minjej, “Tonto tamo Pol a na e merbqo, ‘Ni aŋgro wala endi osi aie.’ Degbqo deqa agi ino areq osi bonum. A na ni anjam bei mermqas.”

19 Onaqa qaja tamo naŋgo gate koba dena aŋgro wala di baŋ titsiqa kiñala sasalosiqa nenemyej, “Ni anjam kie merbqam?” 20 Onaqa minjej, “Juda naŋgi na ni gisaŋmosib endegsib mermqab, ‘Nebe ni Pol gagoq osau. Osbamqa iga koroosim aqa anjam geregere qusim aqa une qalieqom.’ Naŋgi ni degsi mermqab. 21 Deqa ni naŋgo anjam di quetnjraim. Tamo 40-pela naŋgi anjam endegsib qosisib maronub, ‘Iga Pol qalsim moiotqom. Gago anjam di iga bole dauryqom. Iga uratqasai bolesai. Deqa iga Pol moiotosaisosimqa iga iŋgi ti ya ti mati uyqasai. Iga Pol qalsim moiotosimqa ariya bati deqa iga olo iŋgi ti ya ti uyqom.’ Naŋgi anjam degsib qosonub. Deqa bini naŋgi gamq di tariŋeqnub. Ni na Pol osi aioqnimqa gamq dia naŋgi Pol qalsib moiotqab.” 22 Onaqa qaja tamo naŋgo gate koba a aŋgro wala di aqa anjam qusiqa minjej, “Ni gile. Ni anjam degsi merbonum di tamo qudei minjraim. Torei tent.”

Naŋgi na Pol qariŋyonabqa a Rom naŋgo tamo koba Feliks aqaq aiej

23 Degsi minjsiqa aqa qaja tamo gate aiyel naŋgi metnjrnaqa aqa areq bonab minjrej, “Niŋgi na qaja tamo 200 siŋga na walwelo qaji naŋgi ti qaja tamo 200 aŋ ti laqnub qaji naŋgi ti qaja tamo 70 hos na walwelo qaji naŋgi ti minjribqa naŋgi bini qolo seŋ bati 9 Pol osib Sisaria qureq aiqab. Niŋgi na endegsib minjriye, ‘Nuŋgo walwelqajqa iŋgi iŋgi gereiyosib soqniye. 24 Pol aqa hos qudei dego gereiyib soqnem. Pol a hos goge dia awoamqa niŋgi na geregere taqatosib osi aisib Rom tamo koba Feliks aqa talq di brantiye.’ Niŋgi aiyel na qaja tamo naŋgi degsib minjriye.” Qaja tamo naŋgo gate koba a na naŋgi aiyel degsi minjrsiqa olo endegsi minjrej, 25 Osiqa anjam bei endegsi neŋgreŋyej,

26 “O tamo koba Feliks, ijo ñam Klodius Lisias. E qaja tamo naŋgo gate koba. Ijo anjam endi ni quqwajqa deqa e neŋgreŋyosim ni qa qariŋyonum. O kaiye. 27 Tamo agi inoq osi bonub qaji aqa ñam Pol. Juda naŋgi na a ojsib moiotqa laqnabqa e na ijo qaja tamo naŋgi joqsim aisim naŋgo baŋq dena yainjrem. E qalieem, Pol a Rom qaji tamo. Deqa e na a aqaryaiyosim naŋgo baŋq dena yainjrem. 28 Pol aqa une kie qa kio a moiotqa maroqneb di e qalieqa osimqa Pol osi gilsim Juda tamo kokba naŋgo ulatamuq dia tigeltem. 29 Tigeltonamqa naŋgi anjam gargekoba mareleŋeqnabqa e qusimqa endegsi poibej. Juda tamo kokba naŋgi naŋgo segi dal anjam qa marsib Pol aqa jejamuq di anjam laŋa laŋa qameteqnub. Naŋgi Pol aqa une kobaquja bei babtosai. Deqa e na laŋa moiotqa keresai. Tonto talq di laŋa waiyqa keresai dego. E degsi poibej. 30 Ariya bati bei e anjam endegsi quem, ‘Juda tamo qudei naŋgi anjam endegsib qosisib maronub, “Iga gamq dia tariŋonamqa qaja tamo naŋgo gate koba a na Pol osi aioqnimqa iga na qalsim moiotqom.” ’ E anjam di qusim deqa agi Pol qariŋyonum ni qa bqo. Ariya e na tamo naŋgi Pol aqa jejamuq di anjam qameteqnub qaji naŋgi endegsi minjronum, ‘Niŋgi segi Sisaria qureq aisib Feliks aqa ulatamuq dia tigelosib Pol aqa une geregere minjib a quqwas.’”

31 Qaja tamo naŋgo gate koba a na anjam degsi neŋgreŋyosiqa aqa qaja tamo naŋgi enjrnaqa naŋgi na aqa anjam dauryosibqa qolo Pol osib Antipatris qureq osi aisib dia ŋereŋeb. 32 Nebeonaqa qaja tamo siŋga na walwelo qaji naŋgi Antipatris qureq dena olo puluosib Jerusalem qureq gilsib naŋgo ŋeio talq di soqneb. Onaqa qaja tamo hos na walwelo qaji naŋgi segi Pol suweiyosib torei Sisaria qureq osi aieb. 33 Osi aisibqa naŋgo gate koba aqa anjam neŋgreŋyej qaji di Feliks yosib Pol osib aqa ulatamuq dia tigelteb. 34 Onaqa Feliks a anjam di sisiyosiqa Pol nenemyej, “Ni sawa qabe qaji?” Onaqa Pol na minjej, “E Silisia sawa qaji.” 35 Degsi minjnaqa Feliks na olo minjej, “Tamo naŋgi ino jejamuq di une qameqnub qaji naŋgi babqa e ino anjam geregere quqwai.” Osiqa qaja tamo naŋgi minjrnaqa naŋgi na Pol osib tamo koba Herot aqa talq di waiysib taqatoqneb.

Copyright information for `BOJ