Acts 4

Naŋgi na Pita wo Jon wo ojeleŋosib tonto talq di breinjreb

Pita wo Jon wo naŋgi na tamo uŋgasari naŋgi anjam degsib minjreqnabqa atra tamo naŋgi ti Sadyusi naŋgi ti atra tal taqato tamo naŋgo gate ombla na naŋgo aiyel anjam di qusibqa tulaŋ minjiŋ oqetnjrnaqa bosib naŋgi aiyel ojeleŋosib tonto talq di breinjreb. Naŋgi aiyel na tamo uŋgasari naŋgi anjam endegsib minjroqneb, “Yesus a moisiq olo subq na tigelej deqa tamo kalil naŋgi dego moisib olo subq na tigelqab.” Utru deqa atra tamo naŋgi ti Sadyusi naŋgi ti minjiŋ oqetnjrnaqa naŋgi aiyel ojeleŋosib tonto talq di breinjreb. Bilaqtej deqa naŋgi aiyel tonto talq di uratnjrnab sonab nebeej. Tamo uŋgasari tulaŋ gargekoba naŋgo aiyel anjam qusib Yesus qa naŋgo areqalo siŋgilateb. Tamo uŋgasari Yesus qa naŋgo areqalo siŋgilateb qaji kalil turteb 5,000.

Naŋgi na Pita wo Jon wo osi gilsib Juda gate kokba naŋgo ulatamuq dia tigeltnjreb

Nebeonaqa Juda naŋgo gate kokba ti tamo bole bole ti dal anjam qalie tamo naŋgi ti bosib Jerusalem di koroeb. Atra tamo gate Anas na Kaiafas na Jon na Aleksander na Anas aqa leŋ kalil dego bosib koroeb. Koroosib naŋgi aiyel metnjrnab bosib naŋgo ambleq di tigelonab nenemnjreb, “Niŋgi siŋgila qabe na osib tamo di boleteb? Niŋgi yai aqa ñam na boleteb?”

Onaqa Qotei aqa Mondor a Pita aqa miligiq aisiq medabu siŋgilatetonaqa a na naŋgi endegsi minjrej, “O Israel gate ti tamo bole bole ti niŋgi ijo anjam endi quiye. Aqo aiyel na tamo siŋga qandamo boletem deqa niŋgi na iga osib nuŋgo ŋamgalaq di tigeltgonub. Tamo di a kiersi boleej deqa niŋgi qalieqa osib nenemgonub. 10 Deqa niŋgi ti Israel tamo uŋgasari kalil ti ijo anjam endi qusib poiŋgem. Yesus Kristus Nasaret qaji agi niŋgi na ŋamburbasq di qalnab Qotei na olo subq na tigeltej qaji aqa ñam na tamo endi aqa jejamu boleosiq nuŋgo ulatamuq endia tigelesonaq niŋgi unonub. 11 Yesus a tal aqa ai bul. Niŋgi tal gereiyo qaji tamo bul. Niŋgi na tal aqa ai di arqsibqa uge qa marsib taqal waiyeb. Onaqa Qotei na tal aqa ai di olo osiqa tal siŋgilatqajqa deqa tumaq di tigeltej unu. 12 Niŋgi quiye. Tamo bei aqa ñam na Qotei na iga oqasai. Iga oqajqa tamo bei saiqoji. Qotei na tamo bei iga osorgosai bolesai. Yesus aqa ñam na qujai Qotei na iga oqas. Amqa iga padalqasai. Sawa bei beiq dia dego tamo bei na iga oqajqa di sosai.”

13 Pita wo Jon wo naŋgi siŋgila na tigelosib anjam di maroqneb naŋgi ulaosai. Deqa Juda tamo kokba naŋgi are koba qaloqneb. Di kiyaqa? Naŋgi qalieeb, naŋgi aiyel nami skul beiq gilosai. Naŋgi tamo laŋaj. Degsib qalieosib mareb, “Naŋgi aiyel nami Yesus ombla laqneb deqa anjam siŋgila na mareqnub.” 14 Onaqa tamo siŋga qandamyonaq olo boleej qaji a Pita wo Jon wo naŋgo areq di tigelesonaq Juda tamo kokba naŋgi unsibqa naŋgi aiyel anjam bei kamba minjrqa keresaiinjrej.

15 Deqa naŋgi na qaja tamo qudei naŋgi minjrnabqa bosib naŋgi aiyel joqsib taqal beiq gilnabqa naŋgi segi qairosib mareb, 16 “Iga naŋgi aiyel kiernjrqom? Naŋgi aiyel na maŋwa yonubqa Jerusalem tamo uŋgasari kalil naŋgi quekritonub. Deqa iga na ulitqa keresai. 17 Naŋgo aiyel anjam tulaŋ kobaamqa tamo uŋgasari gargekoba quo uge. Deqa iga endegyqom. Iga naŋgi aiyel saidnjrnamqa Yesus aqa ñam mare mare laqasai.” 18 Juda tamo kokba naŋgi degsib marsibqa naŋgi aiyel olo metnjrnab bonabqa siŋgila na saidnjrsib minjreb, “Niŋgi aiyel olo Yesus aqa ñam maroqnaib. Medabu getentiye.”

19 Onaqa Pita wo Jon wo naŋgi na kamba minjreb, “Aqo aiyel Qotei aqa anjam dauryqa uratosim nuŋgo anjam dauryqom di Qotei aqa ŋamgalaq di kumbra bole kio uge kio di niŋgi segi mariye. 20 Aqo aiyel medabu getentqa keresai. Kumbra kalil gago ŋamdamu na unoqnem qaji deqa iga maroqnsim laqnqom. Anjam kalil gago dabkala na quoqnem qaji di dego iga maroqnsim laqnqom. Iga uratqa keresai.”

21 Onaqa Juda tamo kokba naŋgi na olo naŋgi aiyel Yesus aqa ñam marqajqa siŋgila na saidnjrsib uratnjrnab gileb. Naŋgi aiyel na tamo siŋga qandamo boletonabqa tamo uŋgasari tulaŋ gargekoba unsib deqa tulaŋ areboleboleinjrnaqa Qotei aqa ñam soqtoqneb. Deqa Juda tamo kokba naŋgi tamo uŋgasari naŋgi ulainjreb. Osib endegsib are qaleb, “Iga naŋgo aiyel jejamuq di une bei unosai. Deqa iga naŋgi aiyel ñumqa keresai. Ñumqom di tamo uŋgasari naŋgi minjiŋ oqetnjrimqa iga kamba lugwab.” Utru deqa Juda tamo kokba naŋgi tamo uŋgasari naŋgi ulainjrsib naŋgi aiyel uratnjrnab gileb. 22 Tamo siŋga qandamo naŋgi aiyel na boleteb qaji aqa wausau 40. Deqa tamo uŋgasari naŋgi tulaŋ prugeleŋosib areboleboleinjrnaqa Qotei aqa ñam soqtoqneb.

Naŋgi siŋgila osib Yesus aqa anjam mare laqajqa deqa Qotei pailyeb

23 Juda tamo kokba naŋgi na naŋgi aiyel uratnjrnab gilsib tamo uŋgasari Yesus qa naŋgo areqalo siŋgilateb qaji naŋgoq di brantosib anjam kalil atra tamo kokba ti tamo bole bole ti naŋgi na minjreb qaji deqa sainjreb. 24 Sainjrnab qusibqa tulaŋ areboleboleinjrej. Deqa naŋgi kalil medabu qujaitosib Qotei endegsib pailyeb, “O Tamo Koba Qotei, ni na laŋ ti mandam ti yuwal ti iŋgi iŋgi kalil dego atem unub. 25 Nami ni na ino segi Mondor Bole qariŋyonamqa aisiq ino wau tamo agi gago moma Devit aqa medabu siŋgilatetonaqa endegsi marej,

‘Kiyaqa sawa bei bei qaji tamo naŋgi minjiŋ oqetnjreqnu?
Kiyaqa naŋgo areqalo nanarionaq naŋgi Qotei ti qotqajqa qaireqnub?
26 Sawa bei bei qaji naŋgo mandor kokba naŋgi tigelosib naŋgi Kristus qalib moiqajqa deqa qoteqnub.
Mandor kokba naŋgi na Tamo Koba Qotei wo aqa Kristus wo qoto itnjrqajqa deqa koroeqnub.’
27 “O Qotei, Devit aqa anjam di aqa damu gam endena brantej. Herot wo Pontius Pailat wo Israel tamo ti qure bei bei qaji tamo naŋgi ti kalil qure endia koroosibqa ino segi wau tamo bole Yesus ni nami giltem qaji a qoto itqa marsibqa anjam kereteb. 28 O Qotei, ni nami marem, ‘Naŋgi na Yesus qalib moiqas.’ Ino anjam di agi naŋgi dauryosib Yesus qalnab moiej. Naŋgo segi areqalo na naŋgi Yesus qalosai. Ni nami ino segi siŋgila na ti ino areqalo na ti marnamqa deqa naŋgi na Yesus qalnab moiej. 29 O Tamo Koba Qotei, Juda tamo kokba naŋgi minjiŋ oqetnjrqoqa iga ula egwajqa anjam mergonub di ni unime. Iga ino wau tamo. Deqa ni na iga siŋgila egoqnimqa iga ino anjam maroqnqom. Iga ulaqasai. 30 Ni na iga siŋgila egoqnimqa iga ino segi wau tamo bole Yesus aqa ñam na tamo uŋgasari naŋgi boletnjroqnimqa naŋgo ma kobooqnqas. Iga ino maŋwa yoqnimqa tamo uŋgasari naŋgi unoqnsib Yesus qa poinjroqnimqa ino ñam soqtoqnqab.”

31 Naŋgi degsib Qotei pailyosib koboonaqa tal naŋgi koroesoqneb qaji di reŋgiŋyej. Onaqa Qotei aqa Mondor aisiqa naŋgi siŋgila enjrnaqa naŋgi walwelosib siŋgila na Qotei aqa anjam mare mare laqneb. Naŋgi ulaosai.

Tamo uŋgasari naŋgi na naŋgo Kristen was naŋgi aqaryainjroqneb

32 Bati deqa tamo uŋgasari Yesus qa naŋgo areqalo siŋgilateb qaji naŋgi kalil areqalo qujaitosib soqneb. Tamo bei na aqa iŋgi iŋgi saiaosiq aqa segi qa marosaioqnej. Naŋgo iŋgi iŋgi kalil di koba qaji degsib maroqnsib Yesus aqa tamo uŋgasari kalil naŋgi jeisib enjroqneb. 33 Tamo Koba Yesus a subq na tigelej anjam di aqa aŋgro 12-pela naŋgi siŋgila na maroqneb. Naŋgo anjam di siŋgila ti. Naŋgi mareqnab Qotei a naŋgi qa are tulaŋ boleiyoqnsiqa naŋgi siŋgila enjroqnej. 34 Tamo uŋgasari Yesus qa naŋgo areqalo siŋgilateb qaji naŋgo ambleq di tamo bei yala iŋgi bei qa truquosaioqnej. Di kiyaqa? Naŋgi naŋgo mandam ti tal ti qariŋyeqnabqa tamo qudei naŋgi na awaiyoqnsib silali enjreqnab silali di osi boqnsib Yesus aqa aŋgro 12-pela naŋgo baŋq di ateqnab naŋgi na tamo iŋgi iŋgi saiqoji soqneb qaji naŋgi jeisib enjroqneb.

36 Naŋgo ambleq di tamo bei soqnej aqa ñam Josep. Aqa ñam bei Barnabas. Yesus aqa aŋgro 12-pela naŋgi na ñam di waiyeb. Aqa ñam di aqa damu, “Tamo are siŋgilatetnjro qaji.” Barnabas a Juda naŋgo moma utru Jekop aqa aŋgro Livai aqa leŋ. A Saiprus nui qaji. 37 Ariya bati deqa aqa mandam bei soqnej di tamo qudei naŋgi na awaiyosib silali yonab osi gilsiq Yesus aqa aŋgro 12-pela naŋgo baŋq di uratej.

Copyright information for `BOJ