Acts 5

Ananaias aqa ŋauqali Safaira wo naŋgi na Qotei gisaŋyeb

Ariya tamo bei soqnej aqa ñam Ananaias. Aqa ŋauqali aqa ñam Safaira. Ananaias aqa mandam bei tamo qudei naŋgi na awaiyosib silali yonabqa a silali di osiq naŋgi aqa ŋauqali wo anjam keretosib silali oto aqa segi qa ulitosiq oto segi osi gilsiq Yesus aqa aŋgro 12-pela naŋgo baŋq di uratej. Onaqa Pita na minjej, “Ananaias, kiyaqa Satan a ino are miligiq aiqoqa ni Qotei aqa Mondor gisaŋyonum? Ino mandam awaiyonub silali osim kiyaqa oto bei ino segi qa marsim ulitonum? Nami ino mandam awaiyosaisonabqa di ino segi mandam. Ariya bunuqna mandam awaiyosib silali emonub di ino segi silali. Ni segi na silali di taqatosim ni wau kie yqa osim ye. Ni kiyaqa gisaŋosim maronum, ‘Silali kalil agi osi bonum’? Ni kiyaqa kumbra uge di yqajqa are qalonum? Ni que. Ni tamo naŋgi gisaŋ anjam minjrosai. Ni Qotei gisaŋ anjam minjonum.” Pita a degsi marnaqa Ananaias a anjam di qusiqa moioqujatosiq mandamq di uloŋej. Onaqa aŋgro wala naŋgi bosib aqa jejamu gara na dalaosib osi gilsib subq ateb. Onaqa tamo uŋgasari kalil anjam di queb qaji naŋgi tulaŋ ulaugeteb.

Sokiñalayonaq aqa ŋauqali bej. Aqa gumbuluŋ moiej di a qaliesai. A bonaqa Pita na minjej, “Ni mare. Ni ino gumbuluŋ wo nuŋgo mandam bei tamo qudei naŋgi na awaiyosib silali eŋgonub qaji kalil agi ino gumbuluŋ na osi bosiq ebqo endi segi e?” Onaqa minjej, “Od. Silali kalil agide.” Degsi minjnaqa Pita na minjej, “Kiyaqa ni ino gumbuluŋ wo anjam keretosib kumbra uge di yonub? Niŋgi maronub, ‘Tamo Koba Qotei aqa Mondor a gago kumbra di unqasai.’ Degosib niŋgi yonub. Ni que. Aŋgro wala ino gumbuluŋ subq atonub qaji naŋgi bosib siraŋmeq di tigelonub. Naŋgi ni dego qoboimosib gilsib subq atqab.” 10 Degsi minjnaqa a dego moioqujatosiq Pita aqa siŋgaq di uloŋej. Onaqa aŋgro wala naŋgi bosib a moiej di unsib qoboiyosib gilsib aqa gumbulu qali aqa areq di subq ateb. 11 Onaqa anjam di tulaŋ kobaonaqa Yesus aqa tamo uŋgasari kalil tamo qudei naŋgi ti qusib tulaŋ ulaugeteb.

Yesus aqa aŋgro 12-pela naŋgi maŋwa gargekoba yoqneb

12 Bati deqa Qotei na Yesus aqa aŋgro 12-pela naŋgi siŋgila enjreqnaqa naŋgi maŋwa gargekoba yeqnabqa tamo uŋgasari naŋgi unoqneb. Tamo uŋgasari Yesus qa naŋgo areqalo siŋgilateb qaji naŋgi kalil are qujaitoqnsibqa Juda naŋgo atra tal meq dia korooqnsibqa Qotei qa louoqneb. Tal me di aqa ñam Solomon aqa Tal Me. 13 Tamo uŋgasari laŋa laŋaj kalil Jerusalem qureq di soqneb qaji naŋgi na tamo uŋgasari Yesus qa naŋgo areqalo siŋgilateb qaji naŋgo ñam soqtetnjroqnsibqa naŋgi ti koba na koroqajqa ulaoqneb. 14 Tamo ti uŋa ti tulaŋ gargekoba Tamo Koba Yesus qa naŋgo areqalo siŋgilatoqnsib boqnsib tamo nami Yesus qa naŋgo areqalo siŋgilateb qaji naŋgo miligiq aieqnab naŋgi tulaŋ kobaoqneb. 15 Deqa naŋgi na tamo uŋgasari ma ti soqneb qaji naŋgi saperaq di ŋeiotnjroqnsib qoboinjrsib boqnsib gam qalaq di ateleŋoqneb. Pita a gam na walwelosim giloqnimqa aqa seŋ qunuŋ na naŋgi waburtnjroqnimqa naŋgo ma kobooqnqajqa deqa are qalsibqa gam qalaq di ateleŋoqneb. 16 Qure kiñilala kalil Jerusalem qure jojomq di soqneb qaji naŋgi na dego tamo mainjro qaji naŋgi ti tamo mondor uge uge ti soqneb qaji naŋgi ti joqsib boqneb. Joqsib beqnab Yesus aqa aŋgro 12-pela naŋgi na naŋgi kalil boletnjroqneb.

Qotei aqa laŋ aŋgro bei bosiqa tonto tal siraŋme waqtonaqa Yesus aqa aŋgro naŋgi oqedeb

17 Yesus aqa aŋgro 12-pela naŋgi kumbra degyeqnabqa atra tamo gate aqa wau qujai agi Sadyusi naŋgi ti koba na unsib minjiŋ oqetnjrnaqa naŋgi ojeleŋosib tonto talq di breinjrnab soqneb. 19 Sonabqa qoloej. Onaqa Tamo Koba Qotei aqa laŋ aŋgro bei aisiqa tonto tal siraŋme waqtosiq naŋgi joqsiq oqedeb. Oqedonabqa laŋ aŋgro na minjrej, 20 “Niŋgi gilsib atra tal miligiq dia tigelosib tamo uŋgasari naŋgi ŋambile gaigai sqajqa anjam di palontosib minjroqniye.” 21 Onaqa naŋgi laŋ aŋgro aqa anjam di qusib dauryosib nobqolo malu qameqnaqa atra tal miligiq gilsib dia tigelosib tamo uŋgasari naŋgi Qotei aqa anjam palontosib minjroqneb.

Ariya atra tamo gate aqa wau tamo ti naŋgi na Juda tamo kokba ti Israel tamo bole bole ti naŋgi metnjrnab bosib koroeb. Koroosib anjam keretosib naŋgo qaja tamo naŋgi minjreb, “Niŋgi aisib Yesus aqa aŋgro 12-pela naŋgi tonto talq dena joqsib boiye.”
22 Onaqa qaja tamo naŋgi aisib tonto talq di brantosib ŋam ateb Yesus aqa aŋgro 12-pela naŋgi di sosai. Naŋgi degsi unsib deqa olo puluosib bosib Juda tamo kokba naŋgi minjreb, 23 “Iga ainum tonto tal siraŋme qandimesonaq unonum. Tal taqato tamo naŋgi aŋ ti siraŋmeq di tigelenab. Ariya iga siraŋ waqtosim miligiq gilonum iga tamo bei unosai.”

24 Degsi minjrnabqa atra tamo kokba ti atra tal taqato tamo naŋgo gate ombla na anjam di qusib are koba qalsib maroqneb, “Yesus aqa aŋgro 12-pela naŋgi kiersib tonto tal uratosib jaraionub?” 25 Onaqa tamo bei bosiqa naŋgi minjrej, “Niŋgi quiye. Tamo niŋgi na tonto talq di breinjreb qaji agi atra tal miligiq di sosibqa tamo uŋgasari naŋgi anjam minjreqnub.” 26 Degsi minjrnaqa atra tal taqato tamo naŋgo gate ombla na tigelosib atra tal miligiq gilsib ŋam ateb Yesus aqa aŋgro 12-pela naŋgi na tamo uŋgasari naŋgi anjam minjreqnab unjreb. Unjrsib naŋgi ojeleŋosib joqsib gileb. Siŋgila na ojsib gilosai. Jiŋga na joqsib gileb. Tamo uŋgasari naŋgi ŋiriŋosib meniŋ osib naŋgi ñumaib deqa ulaosib jiŋga na joqsib gileb.

Yesus aqa aŋgro naŋgi Yesus aqa anjam Juda tamo kokba naŋgo ulatamuq dia marqajqa ulaosai

27 Jiŋga na joqsib gilsib Juda tamo kokba naŋgo ulatamuq dia tigeltnjreb. Tigelonabqa atra tamo gate a na naŋgi ŋiriŋtnjrsiqa minjrej, 28 “Niŋgi Yesus aqa ñam mare mare laqajqa iga siŋgila na saidŋgem. Di niŋgi na olo mare mare laqnabqa tamo uŋgasari kalil Jerusalem qureq endi unub qaji naŋgi quekritonub. Di segi sai. Niŋgi iga qa mareqnub, iga na Yesus ŋamburbasq di qalnam moiej. Degsib maroqnsib une di gago jejamuq di ateqnub.”

29 Atra tamo gate a na Yesus aqa aŋgro 12-pela naŋgi anjam degsi minjrnaqa naŋgi Pita ombla na kamba minjreb, “Iga Qotei aqa anjam segi dauryqom di kere. Iga tamo naŋgo anjam dauryqasai. 30 Di bole, niŋgi na Yesus ŋamburbasq di qalnab moiej. Moinaqa gago moma naŋgo Qotei a na olo subq na tigeltej. 31 Yesus qujai di Qotei na laŋ qureq osi oqsiqa aqa baŋ woq di awotej. Deqa Yesus a gago Tamo Koba. A na qujai iga eleŋamqa iga padalqasai. Yesus qujai dena iga Israel tamo uŋgasari are bulyetgsim gago une kobotetgwas. 32 Iga gago segi ŋamdamu na Yesus aqa kumbra di unoqnsim deqa mare mare laqnum. Qotei aqa Mondor Bole na dego Yesus aqa kumbra deqa mare mare laqnu. Qotei na tamo uŋgasari aqa anjam dauryeqnub qaji naŋgi aqa Mondor di enjreqnu.”

Gamaliel a Juda tamo kokba naŋgi minjrej, “Niŋgi Yesus aqa aŋgro gulube enjrqa osibqa mati are qaliye.”

33 Onaqa Juda tamo kokba naŋgi Yesus aqa aŋgro 12-pela naŋgo anjam di qusibqa minjiŋ oqetnjrnaqa naŋgi ñumib moreŋqa maroqneb. 34 Onaqa naŋgo ambleq dena Farisi tamo bei aqa ñam Gamaliel a tigelej. A dal anjam qalie tamo kobaquja. Tamo kalil naŋgi bati gaigai a qa maroqneb, “A tamo bolequja.” A tigelosiqa qaja tamo naŋgi minjrej, “Niŋgi mati Yesus aqa aŋgro 12-pela naŋgi joqsib taqal beiq giliye.” 35 Onaqa naŋgi gilnabqa Gamaliel a na Juda tamo kokba naŋgi minjrej, “O Israel tamo, niŋgi Yesus aqa aŋgro 12-pela naŋgi gulube enjrqa osibqa mati geregere are qaliye. 36 Niŋgi qalie, nami yala tamo bei aqa ñam Teudas a tigelosiqa aqa segi ñam soqtoqnsiqa maroqnej, ‘E tamo kobaquja.’ Degsi mareqnaqa tamo 400 a dauryoqneb. Onaqa Rom naŋgi na bosib a qalnab moinaqa tamo naŋgi a dauryoqneb qaji kalil segi segi jaraionab aqa wau koboej. 37 Bunuqna Rom tamo uŋgasari naŋgo ñam kalil sisiyqa bationaqa Galili qaji tamo bei aqa ñam Judas a dego tigelosiqa Rom naŋgi ti qotqajqa maroqnsiqa tamo naŋgo are tigeltetnjreqnaqa naŋgi a dauryoqneb. Onaqa Rom naŋgi na a qalnab moinaqa tamo kalil a dauryoqneb qaji naŋgi segi segi jaraieb. 38 Deqa niŋgi quiye. Niŋgi Yesus aqa aŋgro 12-pela naŋgi di uratnjrib naŋgo wau yoqneb. Naŋgi naŋgo segi areqalo na wauqab naŋgo wau koboqas. 39 Ariya naŋgi Qotei aqa areqalo na wauqab di niŋgi na naŋgi kobotnjrqa keresai. Niŋgi naŋgi ñumqab di niŋgi Qotei ti qotqab.”

Gamaliel a na Juda tamo kokba naŋgi anjam degsi minjrnaqa naŋgi aqa anjam di qusib dauryosib Yesus aqa aŋgro 12-pela naŋgi ñumqa urateb.
40 Osib naŋgi metnjrnabqa naŋgi olo bonabqa bu toqoŋ na naŋgi kumbaiŋnjrsib naŋgi Yesus aqa ñam olo marqajqa siŋgila na saidnjrsib naŋgi uratnjreb. 41 Onaqa naŋgi areboleboleinjrnaqa koro sawa di uratosib gileb. Naŋgi Yesus aqa ñam qa jaqatiŋ eb deqa Qotei a naŋgi qa marej, “Naŋgi Yesus aqa ñam qa siŋgilaonub deqa naŋgi jaqatiŋ oqa kere.” Qotei a naŋgi qa degsi marej deqa naŋgi areboleboleinjrnaq gileb. 42 Naŋgi Yesus aqa anjam mare mare laqajqa uratosaioqneb. Naŋgi bati gaigai Yesus aqa anjam plaltoqnsib maroqneb. Atra tal miligiq dia, tamo uŋgasari naŋgo segi segi talq dia naŋgi anjam endegsib minjroqneb, “Yesus a bole Kristus Qotei na qariŋyej qaji.”

Copyright information for `BOJ