Acts 8

Naŋgi Stiven qalnab moinaqa Sol a unsiqa tulaŋ areboleboleiyej. Osiqa marej, “Keretosib Stiven qalnub moiqo.” Onaqa tamo qudei Qotei aqa kumbra dauryoqneb qaji naŋgi Stiven moiej deqa are ugeinjrnaqa akamosib bosib aqa jejamu osib subq ateb.

Sol a tamo uŋgasari Yesus qa naŋgo areqalo siŋgilateb qaji naŋgi ugeugeinjroqnej

Bati deqa Juda tamo kokba naŋgi Jerusalem dia tamo uŋgasari Yesus qa naŋgo areqalo siŋgilateb qaji naŋgi qa tulaŋ minjiŋ oqetnjrnaqa ugeugeinjroqneb. Deqa naŋgi segi segi jaraiosib Judia sawa ti Samaria sawa ti deq giloqneb. Ariya Yesus aqa aŋgro 12-pela naŋgi segi Jerusalem di soqneb. Naŋgi jaraiosai.
Sol a dego tamo uŋgasari Yesus qa naŋgo areqalo siŋgilateb qaji naŋgi qa tulaŋ minjiŋ oqnaqa ugeugeinjroqnej. Deqa a naŋgo segi segi talq giloqnsiqa tamo ti uŋa ti ojeleŋoqnsiqa naŋgi joqsi aioqnsiqa tonto talq di breinjroqnej.

Yesus aqa tamo uŋgasari naŋgi Qotei aqa anjam mare mare laqneb

Ariya Yesus aqa tamo uŋgasari jaraieb qaji naŋgi sawa bei beiq giloqnsib dia Qotei aqa anjam mare mare laqneb. Filip a dego gilsiqa Samaria qureq dia tamo uŋgasari naŋgi Kristus aqa anjam minjroqnej. Minjroqnsiqa maŋwa gargekoba yeqnaqa naŋgi unoqnsib Filip aqa anjam qusib dauryoqneb. Tamo uŋgasari gargekoba naŋgi mondor uge ti sonabqa Filip na mondor uge wiyetnjreqnaqa mondor uge naŋgi na naŋgo jejamu uratoqnsib tulaŋ koba leleŋoqnsib jaraioqneb. Tamo uŋgasari jejamu lainjro qaji ti siŋga qandamnjro qaji ti gargekoba Filip na boletnjroqnej. Deqa qure dia tamo uŋgasari naŋgi Qotei aqa siŋgila unoqnsib tulaŋ areboleboleinjroqnej.

Qure dia quñam tamo bei soqnej aqa ñam Saimon. A nami quñam gargekoba yoqnsiqa aqa segi ñam soqtoqnsiqa maroqnej, “E tamo kobaquja.” Degyeqnaqa tamo uŋgasari qure dia soqneb qaji naŋgi a ulaiyoqnsibqa biŋiyoqneb. 10 Deqa tamo ñam ti tamo laŋaj ti kalil qure dia soqneb qaji naŋgi Saimon aqa anjam qusib dauryoqneb. Osib aqa ñam soqtoqnsib maroqneb, “Tamo di siŋgila koba. A Qotei aqa siŋgila na waueqnu.” 11 Naŋgi degyoqneb. Di kiyaqa? Saimon a nami quñam qaloqnsiq maŋwa gargekoba yoqnej deqa. Degsi ynaq ynaq naŋgi a unoqnsib biŋiyoqneb. 12 Ariya Qotei a tamo uŋgasari naŋgo Mandor Koba sosiq naŋgi taqatnjreqnu anjam bole di Filip a palontoqnsiqa Yesus Kristus aqa ñam mare mare laqnaqa tamo uŋgasari gargekoba naŋgi quoqnsib are bulyoqnsib Yesus qa naŋgo areqalo siŋgilatoqneb. Degyeqnabqa Filip a na naŋgi yansnjroqnej. 13 Onaqa quñam tamo Saimon a dego Filip aqa anjam di qusiqa quñam uratosiq are bulyosiq aqa areqalo Yesus qa siŋgilatej. Deqa Filip na Saimon dego osiq yansej. Yansonaqa Saimon a Filip daurysiq laqnsiqa Qotei na Filip aqa baŋ na maŋwa gargekoba yeqnaq unoqnsiqa tulaŋ koba prugoqnej.

14 Bati deqa Samaria tamo uŋgasari gargekoba naŋgi Qotei aqa anjam osib Yesus qa naŋgo areqalo siŋgilateb. Deqa Yesus aqa aŋgro 12-pela Jerusalem qureq di soqneb qaji naŋgi degsi qusibqa Pita wo Jon wo qariŋnjrnab Samaria naŋgoq gileb. Gilsib Samaria naŋgoq di brantosib naŋgi qa endegsib Qotei pailyeb, “O Abu, ni na Samaria naŋgi ino Mondor enjrime.” Degsib Qotei pailyeb. 16 Di kiyaqa? Bati deqa Qotei aqa Mondor naŋgoq aiosaisoqnej deqa. Naŋgi Tamo Koba Yesus aqa ñam na segi yanso eb. 17 Deqa naŋgi aiyel na Samaria tamo uŋgasari naŋgi qa pailyoqnsibqa naŋgo gateq di baŋ ateleŋeqnab naŋgi Qotei aqa Mondor oqneb.

18 Yesus aqa aŋgro aiyel naŋgi degyeqnabqa quñam tamo Saimon a unsiqa silali osi bosiqa naŋgi aiyel silali enjrqa osiqa minjrej, 19 “Niŋgi e dego siŋgila ebibqa e kamba tamo uŋgasari naŋgo gateq di baŋ atoqnitqa naŋgi Qotei aqa Mondor oqnqab.”

20 Degsi minjrnaqa Pita na minjej, “Siŋgila endi Qotei na iga laŋa egwo. Iga silali na awaiyosai. Deqa ni silali na awaiyqa maraim. Ni kumbra ugetonum. Deqa ni ino silali qoji padalqam. 21 Ino are miligi Qotei na unqo bolesai. Deqa ni iga ombla na wau endi ojqa keresai. 22 E ni numonum ino areqalo tulaŋ uge. Ino kumbra uge dena ni ojosiŋgilatmqo. Deqa ni are bulye. Osim ino kumbra uge di uratosim Tamo Koba Qotei pailyimqa a ino areqalo uge di taqal waiyetmosim a ni qa olo are boleiyqas.” 24 Onaqa Saimon na minjrej, “Niŋgi segi aiyel e qa Tamo Koba Qotei pailyiye. Yimqa e padalqa merbonub di e padalqasai.”

25 Ariya Pita wo Jon wo naŋgi Tamo Koba Yesus aqa anjam bole palontoqnsib Samaria tamo uŋgasari naŋgi minjroqnsib laqnsib bati bei olo puluosib Jerusalem aieb. Naŋgi Jerusalem aioqnsib Samaria naŋgo qure qure kalilq dia brantoqnsib Yesus aqa anjam bole minjre minjre aieqnab quoqneb.

Filip a Itiopia tamo Yesus aqa anjam bole plaltosiq minjej

26 Onaqa Tamo Koba Yesus aqa laŋ aŋgro bei Filip aqaq aisiqa minjej, “Ni tigelosim gam Jerusalem dena Gasa qureq aiejunu deq aie.” Gam di wadau sawaq di unu. 27 Onaqa Filip a laŋ aŋgro aqa anjam di qusiqa tigelosiq gam deq aiej. Aisiq gam dena walweleqnaqa Itiopia tamo bei Qotei louqa Jerusalem aisiq dena puluosiq Itiopia sawaq olo gileqnaqa gamq di turej. Tamo di a tamo kobaquja. A Itiopia naŋgo mandor koba aqa ñoro taqato tamo. Mandor di aqa ñam Kandasi. Mandor di a uŋa. Aqa ñoro kalil silali ti tamo dena taqatoqnej. 28 Aqa karis goge di awoosiqa Qotei aqa medabu o tamo Aisaia aqa anjam nami neŋgreŋyej qaji di sisiyosiq giloqnej. 29 Onaqa Qotei aqa Mondor na Filip minjej, “Ni gilsim karis di jojomye.” 30 Degsi minjnaqa Filip a ururosiq karis jojomyosiqa tamo di a Qotei aqa medabu o qaji tamo Aisaia aqa anjam sisiyeqnaqa qusiqa nenemyej, “Ni anjam sisiyeqnum di aqa damu poimqo e?” 31 Onaqa tamo dena minjej, “E kiersi anjam endi aqa damu poibqas? Tamo bei na anjam endi aqa damu plaltosim merbimqa e poibqas.” Osiqa Filip minjnaqa a karis gogetosiqa ombla awoeb.

32 Tamo di a Qotei aqa anjam endegsi sisiyoqnej, “A kaja du bul qalqajqa marsib osi gilqab. Kaja naŋgi juŋgum joqetnjreqnab mequmosib unub dego kere a mequmosim sqas. 33 Naŋgi gisaŋ anjam gargekoba aqa jejamuq di laŋa qametsibqa a gulube koba yosib qalib moiqas. Deqa a mandamq endi olo sqasai. A aŋgro saiqoji sqas deqa tamo bei na aqa aŋgro qa marqa keresai.”

34 Itiopia tamo dena anjam di sisiyekritosiq Filip minjej, “Ni e merbe. Qotei aqa medabu o qaji tamo Aisaia aqa anjam endi yai qa neŋgreŋyej? A segi qa kio tamo bei qa kio neŋgreŋyej?” 35 Onaqa Filip na minjej, “A Yesus qa neŋgreŋyej.” Osiqa anjam dena utru atsiq Qotei aqa anjam qudei ti turtosiq Yesus qa saiyoqnej. 36 Onaqa naŋgi gam dauryosib giloqnsib gam qalaq di ya bei sonaq unsibqa Itiopia tamo dena Filip minjej, “Ni une. Ya agide. Iŋgi bei na e getentbqa keresai. Deqa ni e yansbe.” 37 Onaqa Filip na minjej, “Ni are bulyosim ino areqalo kalil Yesus qa siŋgilatqam di e ni yansmqai.” Onaqa minjej, “E ijo areqalo Yesus Kristus qa siŋgilatosim poibqo, a Qotei aqa Ŋiri.”

38 Degsi minjsiqa aqa karis tigeltosiq naŋgi aiyel mandamq aisib Filip na a osiq yaq aisiq yansej. 39 Onaqa naŋgi aiyel ya uratosib gogetonabqa Tamo Koba Qotei aqa Mondor aisiqa Filip loumtosiq osi gilsiqa sawa beiq di atnaqa Itiopia tamo a olo Filip unosai. A yanso ej deqa a tulaŋ areboleboleiyonaqa gam dauryosiq aqa qureq gilej. 40 Onaqa Filip a Asdot qureq di brantosiq dena walweloqnsiqa qure qureq dia Yesus aqa anjam bole tamo uŋgasari naŋgi minjroqnsiq gilsiq Sisaria qureq di brantej.

Copyright information for `BOJ