Ephesians 1

Yesus na Pol qariŋyej

E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa anjam marsim laqne.” Onaqa e Qotei aqa areqalo di dauryosim agi e Yesus aqa anjam marsim laqnum. E na anjam endi neŋgreŋyosim niŋgi tamo uŋgasari Efesus qureq di unub qaji niŋgi qa qariŋyonum. Niŋgi Qotei aqa segi tamo uŋgasari tiŋtiŋ unub. Niŋgi Kristus Yesus geregere dauryeqnub. Gago Abu Qotei wo Tamo Koba Yesus Kristus wo naŋgi aiyel niŋgi qa are boleinjroqnim niŋgi lawo na soqniye.

Qotei a Kristus aqa wau na iga laŋ qaji iŋgi bole bole egej

Iga Qotei aqa ñam soqtoqnqom. A gago Tamo Koba Yesus Kristus aqa Abu Qotei. A Kristus aqa wau na laŋ qaji iŋgi bole bole iga egej. A gago qunuŋ qa are qalsiq deqa iŋgi di iga egej. Tulaŋ nami Qotei a mandam atosaisosiqa a na iga Kristus beteryqajqa marsiq giltgej. Yim iga aqa segi kumbra boleq di sosim aqa ŋamgalaq di une saiqoji sqajqa deqa. Tulaŋ nami Qotei na iga qalaqalaigosiqa iga aqa segi aŋgro sqa marsiqa Yesus Kristus aqa wau na iga eleŋej. Qotei aqa segi areqalo na a degyej. Aqa segi Aŋgro qujai Yesus a tulaŋ qalaqalaiyeqnu qaji aqa ñam na a iga qa are tulaŋ boleiyej. Deqa iga aqa kumbra deqa are qaloqnsim aqa ñam soqtoqnqom.

Qotei a iga qa are boleiyej aqa kumbra di tulaŋ kobaquja. Aqa kumbra di aqa utru agiende. A na Kristus qariŋyonaqa a iga awaigwa marsiqa moiej. Moisiqa aqa leŋ aiej dena Qotei na gago une kalil kobotetgej. A iga qa are tulaŋ boleiyosiq deqa a na qalie ti powo ti kalil iga egej. Nami Qotei a Kristus aqa wau na iga eleŋqa are qalej. Aqa areqalo di ulitesoqnej. Ariya bini a na aqa areqalo di olo boleq atsiq osorgej. 10 Deqa a kumbra endegyqas. A na iŋgi iŋgi kalil mandam ti laŋ ti di unub qaji naŋgi taqatnjroqnsim gilsi gilsim bati a nami atej qaji di brantimqa a na iŋgi iŋgi kalil di olo osim Kristus aqa baŋq di atim a naŋgo gate sqas.

11 Qotei a segi aqa areqalo dauryoqnsiq deqa iŋgi iŋgi kalil babteleŋeqnu. Tulaŋ nami a aqa segi areqalo dauryosiq deqa a na iga Juda tamo uŋgasari Kristus beteryosim aqa segi tamo uŋgasari sqajqa deqa marsiq giltgej. 12 Iga Juda tamo uŋgasari namoqna Kristus qa gago areqalo siŋgilatosim dauryem. Qotei na iga aqa riaŋ koba ti aqa siŋgila ti deqa are qaloqnsim aqa ñam soqtoqnqajqa deqa marsiq iga giltgej.

13 Niŋgi sawa bei bei qaji tamo uŋgasari niŋgi dego Qotei aqa anjam bole queb. Anjam bole agiende. Qotei a Kristus aqa wau na niŋgi eleŋej. Niŋgi Kristus qa nuŋgo areqalo siŋgilatosib deqa a beteryesonab Qotei na aqa anjam nami marej qaji di dauryosiq aqa toqor niŋgi eŋgej. Deqa niŋgi aqa segi tamo uŋgasari unub. Toqor di agi Qotei aqa Mondor Bole. 14 Iga Qotei aqa Mondor ejunum deqa iga qalieonum, bunuqna iga na iŋgi bole bole kalil Qotei a nami aqa segi tamo uŋgasari naŋgi enjrqajqa marej qaji di oqom. Mondoŋ Qotei na iga awaigosim sawa boleq di atim bati deqa iga na iŋgi bole bole kalil di oqom. Iga deqa bini tariŋoqnsim unum. O was qu, iga Qotei aqa wau deqa are qaloqnsim aqa ñam soqtoqnqom.

Pol a Efesus naŋgi qa endegsi pailyej, “O Abu, ni na Efesus naŋgi areqalo bole enjrime.”

15 E endegsi quem. Niŋgi Tamo Koba Yesus qa nuŋgo areqalo siŋgilatoqnsibqa Qotei aqa tamo uŋgasari kalil naŋgi qalaqalainjreqnub. 16 Deqa e Qotei pailyoqnsimqa e gaigai niŋgi qa are qaloqnsim Qotei biŋiyeqnum. 17 A gago Tamo Koba Yesus Kristus aqa Qotei. A gago Abu riaŋ koba ti siŋgila ti unu qaji. Deqa e niŋgi qa endegsi pailyeqnum, “O Abu, ni na Efesus naŋgi areqalo bole enjrimqa naŋgi ino anjam aqa utru geregere poinjrim ni qa bole qalieoqnqab.” 18 Ijo areqalo agiende. Qotei na nuŋgo areqalo suwantetŋgimqa iŋgi bole bole a nami niŋgi eŋgwa osiq metŋgej qaji di niŋgi poiŋgwajqa deqa. Agi niŋgi iŋgi di oqajqa tariŋoqnsib unub. Iga Qotei aqa segi tamo uŋgasari unum deqa a na iŋgi bole bole di iga egwa marsiq gereiyetgej unu. 19 Qotei a siŋgila koba ti unu. Siŋgila dena a na gaigai iga tamo uŋgasari a qa gago areqalo siŋgilateqnum qaji iga aqaryaigeqnu. Aqa siŋgila di tulaŋ kobaquja deqa iga na ubtsim marqa keresai. Aqa siŋgila koba di gagoq di waueqnu. Niŋgi siŋgila di qalieqajqa deqa e niŋgi qa Qotei pailyeqnum. 20 Siŋgila di nami Kristus aqaq di wauoqnej. Agi Kristus a moinaqa Qotei aqa siŋgila koba dena a na Kristus olo subq na tigeltosiq laŋ qureq osi oqsiq aqa baŋ woq di awotej. 21 Deqa Kristus a na mondor siŋgila ti gate kokba ti mandor ti tamo kokba ti kalil naŋgi tulaŋ buŋnjrsiqa goge kobaq di unu. A na tamo kalil bini bati endeqa ñam koba ti unub qaji naŋgi ti tamo kalil bunuqna ñam koba ti sqab qaji naŋgi ti tulaŋ buŋnjrsiqa agi goge kobaq di unu. 22 Qotei na iŋgi iŋgi kalil osiqa Kristus aqa sorgomq di atej unub. Deqa a iŋgi iŋgi kalil di naŋgo gate koba unu. Siŋgila dena a Qotei aqa segi tamo uŋgasari naŋgo gate koba sosiqa naŋgi taqatnjreqnu. 23 Qotei aqa segi tamo uŋgasari naŋgi Kristus aqa jejamu qujai. Kristus a na iŋgi iŋgi kalil ekritosiq tulaŋ keretejunu. Deqa a na Qotei aqa segi tamo uŋgasari naŋgi dego osiq tulaŋ keretnjrejunu.

Copyright information for `BOJ