Ephesians 6

Pol a na aŋgro naŋgi ti naŋgo ai wo abu wo naŋgi ti anjam minjrej

O aŋgro, niŋgi nuŋgo ai wo abu wo naŋgo anjam dauryoqniye. Niŋgi Tamo Koba Yesus beteryejunub deqa niŋgi kumbra di yqab di bolequja. Agi Qotei aqa anjam bei nami endegsib neŋgreŋyeb unu, “Ni ino ai wo abu wo naŋgo sorgomq di sosim naŋgo anjam dauryoqne.” O aŋgro, niŋgi dal anjam di dauryqab di Qotei na niŋgi iŋgi boledamu a nami niŋgi eŋgwa marej qaji di eŋgwas. Agi a nami endegsi marej, “Ni dal anjam di dauryqam di ino wau kalil boleqas. Yim ni mandamq endia so kobaiyqam.”

O abu, niŋgi na nuŋgo aŋgro naŋgo areqalo ugetetnjraib. Yim naŋgi minjiŋ oqetnjro uge. Niŋgi Tamo Koba Qotei aqa ŋamgalaq di naŋgo kumbra tingitetnjroqnsib Qotei aqa anjam plaltosib minjroqniye.

Pol a na kaŋgal tamo naŋgi ti naŋgo wau qa gate naŋgi ti anjam minjrej

Ariya kaŋgal tamo niŋgi quiye. Niŋgi nuŋgo wau qa gate naŋgo sorgomq di geregere sosib naŋgi qa ulaoqniye. Niŋgi naŋgi qa ulaqasai di niŋgi naŋgo ŋamgalaq di kumbra uge yqab. Niŋgi Kristus aqa wau bole yeqnub dego kere niŋgi gaigai nuŋgo wau qa gate naŋgi qa wau bole yoqniye. Niŋgi gisaŋ kumbra na nuŋgo wau qa gate naŋgo ŋamgalaq dia laŋa wau bole yobulaib. Niŋgi Kristus aqa kaŋgal tamo unub deqa nuŋgo are miligiq na Qotei aqa areqalo dauryosib naŋgi qa wau bole yoqniye. Niŋgi mandam tamo naŋgi segi wauetnjrosaieqnub. Niŋgi Tamo Koba Yesus dego waueteqnub. Niŋgi deqa are qalsib are bole na nuŋgo wau qa gate naŋgi wauetnjroqniye. Niŋgi are qaliye. Tamo bei a wau bole yimqa di Tamo Koba Yesus a na kamba awai tulaŋ boledamu yqas. A tamo laŋaj kio a kaŋgal tamo kio di uŋgum a wau bole yimqa di Tamo Koba Yesus a na kamba awai tulaŋ boledamu yqas.

Ariya wau qa gate, niŋgi dego nuŋgo kaŋgal tamo naŋgi kumbra bole enjroqniye. Niŋgi naŋgi ula enjroqnaib. Tamo Koba Qotei a laŋ goge di unu. A nuŋgo Tamo Koba unu. A kaŋgal tamo naŋgo Tamo Koba dego unu. Deqa a kumbra qujai na tamo uŋgasari kalil naŋgi peginjreqnu. Niŋgi deqa are qalsib nuŋgo kaŋgal tamo naŋgi kumbra bole enjroqniye.

Niŋgi qoto tamo bul sosib qoto qa iŋgi iŋgi jigeleŋosib siŋgila na tigelesoqniye

10 Ariya e ijo anjam getentqai. Niŋgi Tamo Koba Yesus beteryejunub deqa niŋgi aqa siŋgila kobaquja qa are qaloqnsib siŋgila na tigelesoqniye. 11 Osib qoto qa iŋgi iŋgi Qotei na iga egeqnu qaji di jigeleŋosib siŋgila na tigelosib Satan aqa gisaŋ anjam ti aqa uli kumbra ti gotraŋyoqnsib qotoqniye. 12 Niŋgi geregere are qaliye. Iga mandam tamo uŋgasari naŋgi ti qotosaieqnum. Iga Satan aqa mondor uge uge naŋgi ti aqa gate kokba ti iŋgi iŋgi kalil siŋgila ejunub qaji naŋgi ti qoteqnum. Gate kokba naŋgi di ambru qa bati endeqa mandam taqatoqnsib unub. Iga mondor uge uge kalil laŋ goge di unub qaji naŋgi ti qoteqnum. 13 Deqa niŋgi qoto qa iŋgi iŋgi Qotei na eŋgeqnu qaji di eleŋosib bati uge endeqa niŋgi siŋgila na tigelosib qotoqniye. Yim bunuqna qoto koboamqa niŋgi siŋgila na tigelesqab.

14 Deqa niŋgi siŋgila na tigelesqa marsibqa anjam bole alalag bul di tigsib tigeloiye. Osib kumbra tiŋtiŋ di gara jugo bul jigsib dena nuŋgo are targa kabutiye. 15 Qotei na jeu kobotej deqa tamo uŋgasari naŋgi a ti koba na are qujaitosib unub. Anjam bole di niŋgi siŋga tatal bul jigsib mare mare laqniye. 16 Niŋgi qoto qa iŋgi iŋgi kalil di jigekritosib ariya Kristus qa dego nuŋgo areqalo siŋgilatosib soqniye. Nuŋgo areqalo di dumu bul osib tigeloiye. Yimqa tamo uge Satan a na qaja ti ŋamyuo ti niŋgi qa waiyoqnimqa nuŋgo dumu dena niŋgi na qaja ti ŋamyuo ti di gotraŋyoqnqab. 17 Qotei a na niŋgi eleŋej aqa kumbra deqa niŋgi are qaloqniye. Osib areqalo di gate tatal bul jigsib soqniye. Sosib Qotei aqa Mondor aqa sebru dego ojsib dena qotoqniye. Sebru di Qotei aqa anjam. 18 Niŋgi Qotei aqa Mondor aqa siŋgila na gaigai Qotei pailyoqniye. Niŋgi aqar ataib. Niŋgi gaigai Qotei na niŋgi aqaryaiŋgwa maroqnsib siŋgila na pailyoqniye. Niŋgi pailyo urato uge deqa niŋgi geregere ŋam atoqnsib soqniye. Sosib niŋgi gaigai Qotei na aqa segi tamo uŋgasari naŋgi aqaryainjrqajqa deqa are qaloqnsib naŋgi qa pailyoqniye. 19 Osib e qa dego endegsib Qotei pailyoqniye, “O Abu, ni na Pol aqa medabu siŋgilatetimqa a ulaqasai. A ino anjam bole nami ulitesoqnem qaji di olo ubtsim tamo uŋgasari naŋgi minjroqnqas.” 20 O was qu, Qotei a segi na e qariŋbej deqa e aqa anjam bole di marsim laqnem. Utru deqa e tonto talq endi unum. E anjam bole di marqajqa wau ti. Deqa niŋgi Qotei pailyoqnibqa a na e siŋgilatboqnim e ulaqasai. E aqa anjam di siŋgila na tamo uŋgasari naŋgi minjroqnqai.

Pol na Qotei endegsi pailyej, “Ni na Efesus naŋgi qa kumbra bole bole yoqne.”

21 Ariya Tikikus a niŋgi qa bqo deqa a na ijo wau kalil qa niŋgi saiŋgwas. Tikikus a gago Kristen was bole. A Tamo Koba Yesus aqa wau tamo bole. 22 E na a qariŋyonum niŋgi qa bqo. Iga kiersim unum di a na niŋgi merŋgwas. Osim nuŋgo are siŋgilatetŋgwas.

23 O Kristen was qu kalil, Abu Qotei wo Tamo Koba Yesus Kristus wo naŋgi aiyel na nuŋgo are latetŋgebe. Osib niŋgi aqaryaiŋgibqa niŋgi naŋgi aiyel qa nuŋgo areqalo siŋgilatoqnsib qalaqalaiyo kumbra dauryoqniye. 24 Tamo kalil gago Tamo Koba Yesus Kristus qalaqalaiyqa uratosaieqnub qaji naŋgi qa Qotei a are boleiyeme.

Copyright information for `BOJ