Hebrews 1

Qotei na aqa Ŋiri Yesus aqa medabu na iga anjam mergeqnu

Nami Qotei na gago moma utru naŋgi anjam minjroqnej. A gam endena naŋgi anjam minjroqnej. A na aqa medabu o qaji tamo naŋgi qariŋnjreqnaqa naŋgi giloqnsib gago moma utru naŋgi anjam minjroqneb. O bati gargekoba gago moma utru naŋgi anjam minjroqnsib soqneb. Ariya bini bati endi diŋo bati jojomqo deqa Qotei na aqa Ŋiri Yesus aqa medabu na iga anjam mergeqnu. Qotei na aqa Ŋiri Yesus giltej deqa a na iŋgi iŋgi kalil oqas. Aqa baŋ na Qotei na mandam atej unu. Yesus a na Qotei aqa riaŋ koba iga osorgeqnu. Yesus aqa so ti Qotei aqa so ti ombla kerekere. Aqa anjam siŋgila ti unu deqa anjam dena a na iŋgi iŋgi kalil siŋgilatejunu. A na gago une kobotetgosiqa laŋ qureq oqsiq Qotei siŋgila koba ti unu qaji aqa baŋ woq di awejunu.

Qotei aqa Ŋiri Yesus a na laŋ aŋgro naŋgi tulaŋ buŋnjrejunu

Qotei na aqa Ŋiri Yesus ñam kobaquja waiyej. Ñam di tulaŋ kobaquja. Ñam dena laŋ aŋgro naŋgo ñam tulaŋ buŋyejunu. Deqa Yesus a laŋ aŋgro naŋgo gate. Naŋgi aqa sorgomq di unub. Nami Qotei na aqa Ŋiri Yesus endegsi minjej,

“Ni ijo segi Aŋgro.
Bini e ino Abu unum.”
Osiqa olo anjam bei dego aqa Ŋiri qa endegsi marej, “E aqa Abuqai. A ijo Aŋgro sqas.” Ariya Qotei na aqa laŋ aŋgro naŋgi anjam degsi minjrosaioqnej.
Nami Qotei na aqa Ŋiri matu Yesus qariŋyim mandamq aiqa osiqa a qa olo anjam bei endegsi marej, “Ijo laŋ aŋgro kalil naŋgi a qa louoqnqab.” Ariya Qotei a laŋ aŋgro naŋgi qa are qalsiqa endegsi marej,

“Ijo laŋ aŋgro naŋgi ijo wau tamo.
Deqa e na naŋgi wau enjritqa naŋgi jagwa bulosib ijo wau ojqab.
Naŋgi ijo wau tamo deqa e na naŋgi qariŋnjrit naŋgi ŋamyuo bulosib ijo anjam dauryoqnqab.”
Ariya Qotei na aqa segi Ŋiri endegsi minjej,

“O Qotei, ni bati gaigai Mandor Koba sqam.
Sosim ni kumbra tiŋtiŋ na ino segi tamo uŋgasari naŋgi taqatnjroqnqam.
Ni kumbra tiŋtiŋ qa tulaŋ arearetmeqnu.
Ni kumbra uge qa arearetmosaieqnu.
Deqa ino Qotei na ino gateq di goreŋ bilentej.
Aqa kumbra dena a na ni giltmosiqa ñam kobaquja emej.
Deqa ni tulaŋ areboleboleimeqnu.
Ino arebolebole dena ino kadoi naŋgo arebolebole tulaŋ buŋyejunu.”
10 Qotei na aqa Ŋiri degsi minjsiqa olo anjam bei dego endegsi minjej,

“O Tamo Koba, ni nami mandam atem unu.
Osim laŋ dego ino segi baŋ na gereiyem.
11 Laŋ ti mandam ti koboqab.
Ariya ni bati gaigai sqam.
Laŋ ti mandam ti gara jugo bulosib sariosib ugeqab.
12 Tamo bei na aqa gara lubtoqnsiq taqal ateqnu
dego kere ni na laŋ ti mandam ti taqal atqam.
Tamo bei na aqa gara piqtoqnsiq taqal ateqnu
dego kere ni na laŋ ti mandam ti taqal atqam.
Ariya ni segi bulyqasai.
Ni bati gaigai degsi sqam.
Ino sqajqa bati koboqasai.”
13 Qotei na aqa Ŋiri degsi minjsiqa olo minjej,

“Ni ijo baŋ woq endi awesoqnimqa
e na ino jeu tamo kalil naŋgi eleŋosiy ino siŋgaq di ateleŋqai.”
Qotei na aqa Ŋiri degsi minjej. Ariya anjam deqaji Qotei na aqa laŋ aŋgro naŋgi minjrosaioqnej.
14 Laŋ aŋgro naŋgi mondor. Naŋgi Qotei aqa wau ojeqnub. Agi Qotei na naŋgi qariŋnjreqnaqa naŋgi giloqnsib tamo uŋgasari a na oqas qaji naŋgi aqaryainjreqnub.

Copyright information for `BOJ