Hebrews 10

Wagme naŋgo leŋ na tamo uŋgasari naŋgo une kobotqa keresai

Moses aqa dal anjam a na iŋgi bole bole Qotei a mondoŋ iga egwas qaji di iga laŋa suwi osorgeqnu. Damu osorgosaieqnu. Dal anjam a marej, niŋgi wagme naŋgo leŋ oqnsib wausau gaigai atraiyoqniye. Dal anjam a degsi marej deqa iga qalieonum, dal anjam a na tamo uŋgasari Qotei aqa areq gileqnub qaji naŋgo une kobotqa keresai. Wagme dena tamo uŋgasari naŋgi boletnjrqa kere qamu naŋgi olo bunuqna atraiyosai qamu. Atraiyqa iŋgi dena tamo uŋgasari Qotei qa loueqnub qaji naŋgo une yansetnjrqa kere qamu naŋgi olo bunuqna naŋgo une qa are qalsib deqa are gulubeinjrosai qamu. Ariya atra tamo kokba naŋgi wausau gaigai wagme iŋgi iŋgi di oqnsib Qotei atraiyeqnub. Deqa tamo uŋgasari naŋgi naŋgo une qa olo are qaloqnsib are gulube ti unub. Anjam di aqa utru agiende. Bulmakau ti kaja du du ti naŋgo leŋ na tamo uŋgasari naŋgo une kobotqa keresai.

Deqa Kristus a mandamq aiqa osiqa endegsi marej,

“O Abu, ni atraimqajqa wagme iŋgi iŋgi qa arearetmosaieqnu.
Ariya e ijo segi jejamu osiy ni atraimqai. Ijo jejamu di agi ni na e gereiyetbem.
Atra tamo naŋgi tamo uŋgasari naŋgo une qa maroqnsib deqa wagme iŋgi iŋgi oqnsib ŋamyuo na koitoqnsib ni atraimeqnub.
Ariya ni iŋgi iŋgi deqa arearetmosaieqnu.
Ariya e ni endegsi mermem,
‘O Qotei, e bonum.
Agi nami e qa anjam degsib neŋgreŋyeb unu.
Bini e ino areqalo dauryqa bonum.’” Kristus a mandamq aiqa osiqa degsi marej.
Dal anjam a marej, niŋgi iŋgi iŋgi deqaji oqnsib Qotei atraiyoqniye. Namoqna Kristus a deqa are qalsiq endegsi marej, “O Abu, ni atraimqajqa wagme iŋgi iŋgi deqa arearetmosaieqnu. Atra tamo naŋgi tamo uŋgasari naŋgo une qa maroqnsib deqa wagme iŋgi iŋgi oqnsib ŋamyuo na koitoqnsib ni atraimeqnub. Ariya ni iŋgi iŋgi deqa arearetmosaieqnu.” Ariya bunuqna Kristus a olo marej, “O Qotei, e ino areqalo dauryqa bonum.” A degsi marej deqa iga qalieonum, a kumbra namij di taqal atsiqa olo kumbra bunuj atej. 10 Yesus Kristus a Qotei aqa areqalo dauryosiq deqa a bati qujai qa aqa segi jejamu osiqa Qotei atraiyej. Kumbra dena a na iga Qotei aqa segi tamo uŋgasari boledamu sqa marsiq giltgej.

Yesus aqa leŋ na gago une kobotetgej

11 Atra tamo kalil naŋgi bati gaigai atra tal miligiq giloqnsibqa naŋgo wau yeqnub. Naŋgi bati gargekoba wagme iŋgi iŋgi deqaji Qotei atraiyeqnub. Ariya iŋgi iŋgi dena tamo uŋgasari naŋgo une kobotetnjrqa keresai. 12 Ariya Kristus a bati qujai qa gago une kobotqa marsiqa aqa segi jejamu osiqa Qotei atraiyej. Osiqa laŋ qureq oqsiq dia Qotei aqa baŋ woq di awoej. Deqa aqa atraiyo wau di gaigai sqas. 13 A Qotei aqa baŋ woq di awesosiqa mondoŋ Qotei na aqa jeu tamo kalil naŋgi osim aqa siŋgaq di koroinjrqajqa deqa tariŋeqnu. 14 Yesus a bati qujai qa aqa segi jejamu osiqa Qotei atraiyej. Wau dena a na Qotei aqa segi tamo uŋgasari boledamu nami giltnjrej qaji naŋgi torei boletnjrej. Deqa naŋgi bati gaigai une saiqoji sqab.

15 Ariya anjam deqaji Qotei aqa Mondor Bole a na dego iga mergeqnu. Agi a endegsi mergeqnu, 16 “Tamo Koba Qotei a marqo, ‘Ijo anjam bunuj agiende. Bati bei brantimqa e na ijo dal anjam kalil osiy tamo uŋgasari naŋgo areqaloq di atsiy siŋgilatqai. Osiy naŋgo are miligiq di dego neŋgreŋyqai.’” 17 Osiqa olo anjam bei dego totoryosiq endegsi mareqnu, “E naŋgo une kobotetnjrqai. Deqa bunuqna e naŋgo une qa olo are qalqasai.” 18 O was qu, Qotei na gago une torei kobotej deqa atraiyqajqa iŋgi bei na gago une olo kobotqajqa wau bei saiqoji.

Iga Warum Tulaŋ Getento Koba di miligiq gilqa kere

19 O was qu, Yesus aqa leŋ na gago une kobotetgej deqa leŋ dena iga Warum Tulaŋ Getento Koba di miligiq giloqnsim Qotei aqa talq di sqom. Iga ulaqasai. 20 Yesus a segi na ŋambile qa gam bunuj waqtetgosiqa a segi namoosiq warum di miligiq gilsiq gara gaiŋejunu qaji dena torei miligiq gilej. Gara di Yesus aqa segi jejamu. 21 Gago atra tamo kobaquja unu agi Yesus. Deqa a na Qotei aqa segi tamo uŋgasari kalil naŋgi taqatnjreqnu. 22 A na aqa segi leŋ bilentonaqa gago are miligiq aiej. A gago kumbra uge kalil qa are qalsiqa gago une kobotetgej. Deqa iga qalieonum, iga Qotei aqa ŋamgalaq di une saiqoji unum. A gago jejamu ya na yansetgej deqa kumbra gisaŋ kalil gago are miligiq di unu qaji di iga taqal waiyqom. Osim Qotei qa gago areqalo siŋgilatosim aqa areq giloqnqom. Utru deqa Yesus a na aqa segi leŋ bilentonaqa gago are miligiq aiej. 23 Gago areqalo iga Qotei qa siŋgilatejunum qaji deqa ti iŋgi bole bole iga mondoŋ oqajqa tariŋeqnum qaji deqa ti iga maroqnsim laqnum. Ariya gago areqalo di iga olo siŋgila na ojesqom. Iga ulaosim areqalo aiyeltqasai. Iga qalie, kumbra kalil Qotei a nami yqa marej qaji di a yqas. 24 Iga segi segi Qotei aqa tamo uŋgasari naŋgi qa dego are qaloqnqom. Osim naŋgo areqalo tigeltetnjroqnimqa naŋgi na Kristen tamo kalil naŋgi qalaqalainjroqnsib kumbra bole bole enjroqnqab. 25 Iga Qotei aqa tamo uŋgasari unum deqa iga aqa ñam qa korooqnqajqa uratqasai. Agi Kristen tamo qudei naŋgi korooqnqajqa asginjreqnu. Niŋgi qalie, Kristus olo bqajqa bati jojomqo. Deqa iga segi segi korooqnsimqa gago Kristen was naŋgo are siŋgilatetnjroqnqom.

Iga Qotei aqa Ŋiri qoreiyqasai

26 Niŋgi quiye. Iga Kristus aqa anjam bole qalieonum. Ariya bunuqna iga olo anjam di uratosim gago segi areqalo na une aqa kumbra dauryoqnqom di gago une deqa olo atraiyqa iŋgi bei sqasai. 27 Iga degyqom di iga Qotei qa ulaugetosim a gago une qa pegigwa bati qa tariŋoqnqom. Pegigwa bati deqa Qotei na aqa jeu tamo kalil naŋgi ojeleŋosim ŋamyuo kaŋkaŋ kobaq di breinjrqas. Ŋamyuo di agi Qotei na atej unu. 28 Iga qalie, tamo bei a Moses aqa dal anjam bei gotraŋyimqa tamo aiyel kio tamo qalub kio aqa une unsib boleq di maribqa tamo uŋgasari naŋgi na tamo di aqaryaiyqasai. Naŋgi a qalib moiqas. 29 Ariya tamo bei a Qotei aqa Ŋiri qoreiyosim aqa ñam ugeugeiyqas di niŋgi kiersib are qalqab? Tamo di aqa une deqa a gulube tulaŋ kobaquja oqas. Kristus aqa leŋ na Qotei aqa anjam bunuj siŋgilatej deqa tamo di a anjam di dauryosiq a Qotei aqa segi tamo tiŋtiŋ soqnej. Ariya bunuqna a olo Yesus aqa leŋ di ugeugeiyosim Qotei aqa Mondor iga qa are boleiyeqnu qaji aqa ñam ugetqas di a une tulaŋ kobaquja yqas. 30 Iga qalieonum, Qotei a nami endegsi marej, “Tamo naŋgo une kalil e segi na kambatosiy awai uge enjrqai. Di ijo segi wau.” Osiqa marej, “E segi Tamo Koba Qotei. Deqa e na ijo tamo uŋgasari naŋgo une qa peginjrqai.” 31 O was qu, Qotei ŋambile gaigai unu qaji a na tamo bei ojsim ŋolawotqa laqnim tamo di a Qotei qa ulaugetqas.

Nuŋgo areqalo Yesus qa siŋgilateqnub qaji di niŋgi siŋgila na ojesoqniye

32 Ariya niŋgi are qaliye. Nami Qotei na nuŋgo areqalo suwaŋtetŋgonaqa bati deqa jeu tamo naŋgi na gulube ti jaqatiŋ ti gargekoba niŋgi eŋgoqneb. Ariya bati deqa niŋgi siŋgila na tigeloqnsibqa gulube di gotraŋyoqneb. Di niŋgi keretoqneb. 33 Bati qudei jeu tamo naŋgi dena niŋgi joqoqnsib tamo uŋgasari naŋgo ŋamgalaq dia tigeltŋgoqnsib nuŋgo ñam misiliŋyoqnsib niŋgi ugeugeiŋgoqneb. Ariya bati qudei Kristen tamo qudei naŋgi gulube deqaji iteqnabqa niŋgi na olo naŋgi beternjroqnsib siŋgilatnjroqneb. 34 Jeu tamo naŋgi dena nuŋgo ambleq na tamo qudei ojsibqa tonto talq di breiŋgonab sonabqa niŋgi na tonto tamo naŋgi deqa are qaloqnsib naŋgi geregereinjroqneb. Bati di jeu tamo naŋgi dena niŋgi qudei nuŋgo iŋgi iŋgi yaiŋgoqneb. Ariya niŋgi deqa are ugeiŋgosai. Niŋgi areboleboleiŋgej. Di kiyaqa? Niŋgi qalie, iŋgi di laŋa mandam qaji iŋgi. Ariya laŋ qure qaji iŋgi a bati gaigai sqas. Iŋgi di niŋgi oqsib oqab.

35 Deqa kumbra bole niŋgi nami yoqneb qaji deqa olo are qaloqniye. Osib nuŋgo areqalo Yesus qa siŋgilateqnub qaji di siŋgila na ojesoqniye. Niŋgi olo urataib. Niŋgi uratqasai di mondoŋ niŋgi awai tulaŋ boledamu oqab. 36 Niŋgi siŋgila na tigelesoqniye. Niŋgi degyqab di niŋgi Qotei aqa areqalo dauryqab. Osib mondoŋ iŋgi bole bole Qotei a nami niŋgi eŋgwa marej qaji di niŋgi oqab. 37 Agi Qotei aqa anjam bei nami endegsib neŋgreŋyeb unu, “Sokiñala tamo bunuqna bqas qaji di a bqas. Deqa a tariŋsokobaiyqasai. A urur boqujatqas. 38 Ariya ijo segi tamo uŋgasari tiŋtiŋo naŋgi e qa naŋgo areqalo siŋgilatqab di naŋgi ŋambile sqab. Ariya naŋgi olo bunuqna e qoreibqab di e naŋgi qa areboleboleibqasai.”

39 Ariya was qu, iga Qotei qoreiyosim padalqasai. Iga tamo deqaji sai. Iga Qotei qa gago areqalo siŋgilato qaji tamo. Deqa iga ŋambile gaigai sqom.

Copyright information for `BOJ