Hebrews 3

Qotei na Yesus ñam kobaquja waiyej. Ñam dena Moses aqa ñam tulaŋ buŋyejunu

O Kristen was qu, Qotei laŋ qureq di unu qaji a na niŋgi dego metŋgej deqa niŋgi Yesus qa are qaloqniye. Qotei na Yesus qariŋyonaq mandamq aiej. A gago atra tamo kobaquja unu. Deqa iga a qa gago areqalo siŋgilatoqnsim aqa ñam boleq na maroqnqom. Qotei na Yesus wau yej deqa a wau di uratosai. A Qotei aqa anjam geregere dauryoqnej. Agi Moses a nami Qotei aqa wau geregere ojoqnej dego kere. Moses a Qotei aqa tamo uŋgasari naŋgo ambleq di wauoqnej. Tamo uŋgasari naŋgi di Qotei aqa tal bul. Ariya iga qalie, tamo naŋgi tal gereiyeqnub qaji naŋgo ñam kobaquja. Tal aqa ñam kiñala. Yesus a tal gereiyo qaji tamo bul soqnej deqa Qotei na Yesus ñam kobaquja waiyej. Yesus aqa ñam dena Moses aqa ñam tulaŋ buŋyejunu. Tal kalil agi tamo naŋgi na gereiyeqnub. Ariya Qotei a segi na iŋgi iŋgi kalil gereiyej. Moses a Qotei aqa wau tamo sosiqa a Qotei aqa anjam geregere dauryoqnsiqa aqa tamo uŋgasari naŋgo ambleq di wauoqnej. Tamo uŋgasari naŋgi di Qotei aqa tal bul. Moses a Qotei aqa medabu osiqa kumbra bunuqna brantqas qaji deqa anjam maroqnej. Ariya Kristus a Qotei aqa Ŋiri. Deqa Qotei na a wau yonaqa a na Qotei aqa tamo uŋgasari naŋgi taqatnjroqnej. Tamo uŋgasari naŋgi di Qotei aqa tal bul. Kristus a Qotei aqa anjam geregere dauryoqnsiq wau di yoqnej. Deqa iga gaigai Kristus qa gago areqalo siŋgilatoqnsim a olo bqajqa deqa tariŋoqnsim sqom. Iga degyqom di iga dego Qotei aqa tal bul sqom.

Tamo naŋgi Qotei aqa medabu quqwa asginjreqnu qaji naŋgi Qotei aqa aqarato sawa miligiq gilqasai

Iga Qotei aqa tamo uŋgasari unum deqa iga Qotei aqa Mondor Bole aqa anjam quoqnqom. Aqa anjam agiende,

“Bini bati endi niŋgi Qotei aqa medabu quoqniye.
Niŋgi nuŋgo are miligi getentaib.
Niŋgi nuŋgo moma utru naŋgi bul saib.
Agi nami nuŋgo moma utru naŋgi ijo anjam quqwa asginjrnaqa gotraŋyoqneb.
Naŋgi wadau sawaq dia ijo kumbra laŋa pegiyoqneb.
Bunuqna naŋgi ijo siŋgila bati gaigai unoqneb gilsi gilsiq wausau 40 koboej.
Ariya naŋgi deqa e qa are qalosaioqneb.
10 Deqa e naŋgi qa minjiŋ oqnaqa marem,
‘Naŋgo are miligi na e daurbosaieqnub.
Naŋgi gaigai ijo gam bole urateqnub.’
11 Deqa e naŋgi qa minjiŋ oqnaqa endegsi minjrem,
‘Niŋgi ijo aqarato sawa miligiq gilqasai. E bole merŋgonum.’”
12 O was qu, niŋgi geregere ŋam atoqniye. Niŋgi ŋam atqasai di nuŋgo ambleq di was bei aqa areqalo ugeosim a Yesus qa aqa areqalo siŋgilatqa uratosim Qotei ŋambile gaigai unu qaji a qoreiyo uge. 13 Bati gaigai iga mareqnum, “Bini bati endi”. Deqa niŋgi bati gaigai Qotei aqa tamo uŋgasari naŋgi anjam bole minjroqnsib naŋgo areqalo tigeltetnjroqniye. Nuŋgo ambleq di une aqa kumbra na tamo bei gisaŋyim aqa are miligi getento uge. 14 Iga nami siŋgila na Qotei qa gago areqalo siŋgilatem. Ariya gago areqalo di iga olo tulaŋ siŋgila na ojsimqa gilsim gilsim moiqom. Iga degyqom di iga Kristus aqa segi tamo uŋgasari tiŋtiŋ sqom.

15 Iga qalie, anjam endegsi unu,

“Bini bati endi niŋgi Qotei aqa medabu quoqniye.
Niŋgi nuŋgo are miligi getentaib.
Niŋgi nuŋgo moma utru naŋgi bul saib.
Agi nami nuŋgo moma utru naŋgi ijo anjam quqwa asginjrnaqa gotraŋyoqneb.”
16 O was qu, tamo yai naŋgi Qotei aqa medabu quoqnsib olo quqwa asginjrnaqa gotraŋyoqneb? Di Israel tamo uŋgasari agi nami Isip sawaq di sonabqa Moses na joqsiq gilej qaji naŋgi na. 17 Qotei a tamo yai naŋgi qa minjiŋ oqnaqa gilsi gilsiq wausau 40 koboej? Di Israel tamo uŋgasari agi nami une yoqnsib wadau sawaq di moreŋoqneb naŋgi. 18 Qotei na tamo yai naŋgi endegsi minjrej, “Niŋgi ijo aqarato sawa miligiq gilqasai”? Osiqa minjrej, “E bole merŋgonum”? Di tamo uŋgasari aqa anjam gotraŋyoqneb qaji naŋgi. 19 Deqa iga qalieonum, Israel tamo uŋgasari naŋgi Qotei qa naŋgo areqalo yala siŋgilatosaioqneb. Utru deqa naŋgi Qotei aqa aqarato sawa miligiq gilqa keresai.

Copyright information for `BOJ