Hebrews 9

Atra tamo kokba namij qaji naŋgi na wagme aqa leŋ oqnsib Qotei atraiyoqneb

Israel naŋgi anjam namij di dauryosib deqa naŋgi Qotei qa louoqnsib mandamq endia atra tal ateb. Atra tal di jagwa tal bul. Tal miligiq dia warum bei soqnej. Warum di aqa ñam “Getento Warum.” Warum di naŋgi gereiysib lam ti atra bijal ti atraiyqa bem ti warum miligiq di atnab soqnej. Ariya getento warum qoreq di naŋgi gara kobaquja bei gainteb. Gara gaiŋesoqnej aqa qoreq di warum bei soqnej. Warum di aqa ñam “Warum Tulaŋ Getento Koba.” Qa sum koitib qurem quleqwajqa deqa marsib bijal gol na gereiysib warum dia atnab soqnej. Ariya Qotei aqa dal anjam so qaji ŋam moŋgum dego warum dia soqnej. Ŋam moŋgum aqa qalaq di gol na walateb. Warum miligiq di laŋ qure qa uyo iŋgi Qotei na nami Israel naŋgi enjrej qaji di tabirq di atnab soqnej. Tabir di dego gol na gereiyeb. Ariya ŋam moŋgum miligiq dia Aron aqa walwelqa toqoŋ nami qenjilitej qaji di atnab soqnej. Meniŋ aiyel Qotei a nami naŋgo quraq di aqa dal anjam neŋgreŋyej qaji di dego ŋam moŋgum miligiq di atnab soqnej. Ariya dal anjam so qaji ŋam moŋgum aqa quraq dia laŋ aŋgro aiyel naŋgo sigito qunuŋ atnab soqnej. Laŋ aŋgro aiyel naŋgi di Qotei aqa siŋgila sigitoqnsib unub. Naŋgo bari na ŋam moŋgum di kabutesoqnej. Ŋam moŋgum aqa qura di tamo uŋgasari naŋgo une kobotetnjrqajqa sawa. Ariya bini e iŋgi iŋgi kalil deqa anjam koba marqasai.

Ariya iŋgi iŋgi kalil deqaji atra tal miligiq di atnab sonabqa atra tamo naŋgi bati gaigai atra tal miligiq giloqnsibqa warum dia Qotei louqajqa wau yeqnub. Ariya atra tamo kobaquja a segi qujai leŋ oqnsiqa bati qujai qa wausau gaigai warum tulaŋ getento koba di miligiq giloqnsiqa aqa segi une qa ti tamo uŋgasari naŋgo une qa ti leŋ di Qotei atraiyeqnu. Tamo uŋgasari naŋgo areqalo bolesai deqa naŋgi une yeqnub. Kumbra dena Qotei aqa Mondor na iga endegsi osorgeqnu, atra tal soqnim iga Qotei aqa tal miligiq gilqajqa gam geteŋesqas. Atra tal di laŋa mandam qaji tal. Tal di laŋ qure qaji atra tal laŋa sigitejunu. Tal dena kumbra bini bati endeqa brantqas qaji di iga laŋa suwi osorgeqnu. Atra tal dia atra tamo naŋgi iŋgi iŋgi oqnsib Qotei atraiyeqnub. Ariya iŋgi iŋgi dena tamo naŋgi Qotei qa loueqnub qaji naŋgo are miligi gereiyetnjrqa keresai. Yim naŋgi qalieqab, “Bole, Qotei na gago une yansetgekritqo.” Degyqa keresai. 10 O was qu, dal anjam di uyo iŋgi qa ti ya uyo qa ti yanso oqajqa ti deqa mareqnu. A jejamu qa iŋgi iŋgi qa segi mareqnu. Ariya Qotei na dal anjam di tamo uŋgasari naŋgi enjrej. Osiqa endegsi are qalej, “Naŋgi mati dal anjam di dauryosib giloqnib bunuqna batiamqa e na iŋgi iŋgi kalil tingitnjrit koboamqa e olo gam bunuj naŋgi osornjrqai.”

Kristus na aqa segi leŋ osiqa Qotei atraiyej

11 Ariya bini Kristus a brantosiqa a gago atra tamo kobaquja sosiqa iŋgi bole bole Qotei na iga egej qaji di osi bosiqa laŋ qaji atra tal miligiq gilej. Atra tal di tulaŋ bolequja. Atra tal dena mandam qaji atra tal di tulaŋ buŋyejunu. Mandam tamo naŋgi na atra tal di gereiyosai. 12 Ariya Kristus a bulmakau ti kaja du du ti naŋgo leŋ osiqa atra tal di miligiq gilosai. A aqa segi leŋ osiqa bati qujai qa atra tal miligiq gilej. Aqa wau dena a na iga olo awaigej. Deqa iga ŋambile gaigai sqom. 13 Tamo uŋgasari naŋgi une ti unub deqa atra tamo naŋgi bulmakau ti kaja du du ti naŋgo leŋ oqnsib Qotei atraiyeqnub. Osib bulmakau naŋgo damu koiteqnab skuleqnaq aqa sum oqnsib tamo uŋgasari naŋgo gateq di bilenteqnub. Kumbra dena naŋgi na tamo uŋgasari naŋgo une yansetnjreqnab naŋgi Qotei aqa segi tamo uŋgasari tiŋtiŋ unub. 14 Ariya Kristus aqa leŋ na wagme naŋgo leŋ tulaŋ buŋyejunu. Kristus aqa jejamuq di jiga bei saiqoji. Qotei aqa Mondor gaigai sqas qaji a na Kristus siŋgilatonaqa aqa segi jejamu ŋambile sonaqa osiqa Qotei atraiyej. Osiqa aqa leŋ na gago are miligi yansetgej. A gago jejamu segi yansetgosai. A gago une kobotetgej deqa iga qalieonum, iga Qotei aqa ŋamgalaq di une saiqoji unum. Deqa iga olo dal anjam dauryqajqa are qalqasai. Di kiyaqa? Dal anjam dena iga ŋambile sqa keresai. Ariya iga Qotei ŋambile gaigai unu qaji a qa are qaloqnsim wauetoqnqom di iga ŋambile sqom.

Kristus aqa leŋ na anjam bunuj siŋgilatej

15 Yesus aqa leŋ na iga aqaryaigej deqa iga Qotei aqa ŋamgalaq di tamo bole unum. Aqa wau dena a Qotei aqa anjam bunuj siŋgilatqa osiqa Qotei ti iga ti gago ambleq di tigelejunu. Tamo uŋgasari naŋgi anjam namij aqa sorgomq di sosib bati deqa naŋgi une yoqnsib laqneb. Onaqa Yesus a naŋgi qa moisiq wau dena a naŋgi olo awainjrsiqa naŋgo une kobotetnjrej. Deqa tamo uŋgasari kalil Qotei na metnjreqnaq qusib dauryeqnub qaji naŋgi ŋambile gaigai sqab. Ŋambile di agi Qotei a nami aqa aŋgro naŋgi enjrqa marej.

16 E mandam tamo naŋgo kumbra qa merŋgwai. Tamo bei a bunuqna moiqas deqa are qalsimqa aqa aŋgro naŋgi na aqa iŋgi iŋgi kalil oqab deqa marsim naŋgo ñam neŋgreŋyim sqas. Ariya a moiosaisoqnimqa aqa aŋgro naŋgi na aqa iŋgi iŋgi oqa keresai. A moiimqa di naŋgi aqa iŋgi iŋgi oqab. 17 Tamo di a ŋambile soqnimqa aqa anjam neŋgreŋyej qaji di a laŋa sqas. Ariya a moiimqa aqa anjam di siŋgila ti sqas. 18 Dego kere atra tamo naŋgi na bulmakau naŋgi ñumeqnab moreŋeqnab naŋgo leŋ aioqnej. Leŋ dena anjam namij di siŋgilatoqnej. 19 Agi nami Moses a dal anjam kalil osiqa tamo uŋgasari naŋgi palontosiq minjroqnej. Osiqa bunuqna a na bulmakau ti kaja du du ti naŋgo leŋ osiqa ya ti sil lent ti ŋamtaŋ aqa dani aqa ñam hisop de ti turtsiq tamo uŋgasari naŋgo gateq di bilentej. Osiqa Qotei aqa gara neŋgreŋ aqa qoreq di dego bilentej. Sil lent di agi kaja du du naŋgo juŋgum na gereiyo qaji. 20 Ariya Moses a leŋ bilentosiq marej, “Leŋ endi aisiq Qotei aqa anjam siŋgilatqo. Agi Qotei a nami niŋgi merŋgej, ‘Niŋgi anjam di dauryiye.’” 21 Dego kere Moses a atra tal ti atraiyqa iŋgi iŋgi ti dia dego leŋ bilentej. 22 Deqa iga qalieqom, leŋ na segi iŋgi iŋgi kalil yansqas. Leŋ aiqasai di Qotei na tamo uŋgasari naŋgo une kobotqasai. Dal anjam a degsi marqo.

Kristus a gago une kobotqa marsiqa aqa segi jejamu osiq Qotei atraiyej

23 Atra tal aqa iŋgi iŋgi di mandam qaji iŋgi iŋgi. A laŋ qaji iŋgi iŋgi laŋa sigitejunu. Atra tamo naŋgi na wagme naŋgo leŋ oqnsib dena iŋgi iŋgi di yanseqnub. Ariya laŋ qaji iŋgi iŋgi di wagme naŋgo leŋ na yansqa keresai. Leŋ tulaŋ boledamu na laŋ qaji iŋgi iŋgi yansqas. 24 Iga qalie, Kristus a mandam qaji atra tal tamo naŋgi na gereiyeb qaji di miligiq gilosai. Mandam qaji atra tal di Qotei aqa atra tal bole laŋa sigitejunu. Kristus a laŋ qureq oqej. Deqa bini a Qotei aqa areq di sosiqa iga qa waueqnu.

25 Atra tamo kobaquja a wausau gaigai wagme naŋgo leŋ oqnsiqa Warum Tulaŋ Getento Koba di miligiq gileqnu. A aqa segi leŋ osaieqnu. A wagme aqa leŋ oqnsiq miligiq gileqnu. Ariya Yesus a degyosai. A laŋ qureq oqsiq bati qujai qa aqa segi jejamu osiq Qotei atraiyej. A bati gargekoba degyosaioqnej. 26 A bati gargekoba degyoqnej qamu Qotei na nami mandam atej bati deqa a jaqatiŋ oqnsiq bosi bosiq agi bini a olo jaqatiŋ eqnu qamu. Ariya diŋo bati jojomqo deqa Kristus a bati qujai qa mandamq aisiq a gago une kobotqa marsiq aqa segi jejamu osiq Qotei atraiyej. 27 Iga qalie, tamo kalil naŋgi bati qujai qa moieqnub. Ariya mondoŋ tamo kalil naŋgi Qotei aqa ulatamuq di brantib a naŋgo une qa naŋgi peginjrqas. 28 Dego kere Kristus a bati qujai qa tamo gargekoba naŋgo une qoboiyetnjrqa marsiqa aqa segi jejamu osiq Qotei atraiyej. Ariya mondoŋ a olo laŋ qureq dena bosimqa a tamo uŋgasari naŋgo une olo kobotetnjrqasai. A bosim tamo uŋgasari a qa tariŋeqnub qaji naŋgi oqas.

Copyright information for `BOJ