James 4

Tamo bei a mandam qa kumbra qa tulaŋ areboleboleiyqas di a olo Qotei jeutqas

O was qu, kiyaqa niŋgi segi segi anjam na qotoqnsib ŋiriŋkobaeqnub? Utru agiende. Niŋgi nuŋgo segi jejamu qa areboleboleiŋgeqnaqa kumbra uge uge yqajqa are prugŋgeqnu. Kumbra di nuŋgo jejamu qa sarqei kalilq di siŋgila na waueqnu. Utru deqa niŋgi anjam na qotoqnsib ŋiriŋkobaeqnub. Niŋgi iŋgi iŋgi koba oqajqa tulaŋ arearetŋgeqnu. Ariya niŋgi iŋgi di osaieqnub. Deqa niŋgi tamo ñumeqnub. Niŋgi iŋgi iŋgi oqajqa mamaulŋgeqnu. Ariya niŋgi osaieqnub. Deqa niŋgi ŋiriŋko-baoqnsib qoto tigelteqnub. Niŋgi iŋgi iŋgi qa Qotei pailyo-saieqnub. Utru deqa niŋgi osaieqnub. Niŋgi iŋgi iŋgi qa Qotei pailyoqnsib ariya niŋgi osaieqnub. Di kiyaqa? Niŋgi areqalo uge na Qotei pailyeqnub deqa. Niŋgi nuŋgo segi jejamu qa arebole-boleiŋgoqnim sqajqa deqa maroqnsib iŋgi iŋgi di oqajqa are qaleqnub. Uŋa bei na aqa gumbuluŋ uratosiq olo tamo bei ombla sambala kumbra yeqnub dego kere niŋgi Qotei uratobuloqnsib kumbra uge uge yeqnub. Niŋgi quiye. Tamo bei a mandam qa kumbra qa tulaŋ areboleboleiyqas di a olo Qotei jeutqas. Niŋgi di qaliesai kio? Deqa tamo bei na mandam qa kumbra kadoiyqas di a Qotei ti jeu sqas. Agi Qotei aqa anjam bei nami endegsib neŋgreŋyeb unu, “Qotei a na aqa Mondor Bole gago are miligiq di atej unu. Mondor di a iga qa tulaŋ areareteqnu. Deqa iga a qoreiyqom di a are ugeiyqas.” O was qu, anjam di laŋa sa anjam niŋgi degsib are qalonub kio?

Ariya Qotei a iga qa are tulaŋ boleiyeqnu. Deqa aqa anjam bei nami endegsib neŋgreŋyeb unu, “Tamo naŋgi naŋgo segi ñam soqteqnub qaji naŋgi Qotei na olo jeutnjreqnu. Ariya tamo naŋgi naŋgo segi ñam aguq ateqnub qaji naŋgi qa Qotei a olo are boleiyoqnsiq gereinjreqnu.” Deqa was qu, niŋgi nuŋgo segi ñam aguq atoqnsib Qotei aqa sorgomq di geregere soqniye. Sosib Satan gotraŋyoqniye. Yimqa Satan a na niŋgi uratŋgosim ulaŋqas. Niŋgi Qotei jojomyoqnibqa a kamba dego niŋgi jojomŋgoqnqas. O une tamo, niŋgi quiye. Tamo naŋgi naŋgo baŋ yansoqnsib jiga koboteqnub dego kere niŋgi nuŋgo are miligi gereiyoqnsib bulyoqniye. Niŋgi qudei areqalo aiye aiyelteqnub. Deqa niŋgi nuŋgo areqalo uge di olo uratoqnsib nuŋgo are miligi yansoqniye. Niŋgi are gulubeiŋgim akamuge-toqniye. Niŋgi tamo kikieqnub qaji nuŋgo kiki uratosib olo akamoqniye. Niŋgi tamo areboleboleiŋgeqnu qaji nuŋgo arebolebole di dego kobotosib olo tulaŋ are gulubeiŋgoqneme. 10 Osib niŋgi Tamo Koba Qotei aqa ŋamgalaq dia nuŋgo segi ñam aguq atoqniye. Niŋgi degyqab di Qotei na olo nuŋgo ñam soqtetŋgwas.

Niŋgi nuŋgo was naŋgo jejamuq di une laŋa qametnjraib

11 O was qu, niŋgi na Qotei aqa tamo uŋgasari naŋgi uge qa minjraib. Tamo bei na aqa was naŋgi uge qa minjrsim naŋgo jejamuq di une qametnjrqas di a dal anjam dego uge qa marsiq qamqo. Niŋgi dal anjam uge qa marsib qamqab di niŋgi dal anjam aqa sorgomq di sqa uratonub. Osib laŋa pegiyonub. 12 Qotei a segi na dal anjam babtej deqa a na qujai gago une qa iga pegigwa kere. A na qujai tamo naŋgi eleŋqa kere. A na qujai naŋgi padaltnjrqa kere. Deqa niŋgi tamo kiero deqa niŋgi nuŋgo was naŋgo jejamuq di une qametnjreqnub? Di kumbra uge.

Niŋgi nuŋgo segi ñam soqtoqnsib nuŋgo segi wau qa diqoqnaib

13 Niŋgi qudei endegsib mareqnub, “Bini kio nebe kio iga qure beiq gilsim dia wausau qujai sosim silali qa wauosim olo bqom.” 14 Niŋgi degsib mareqnub. Ariya nebe kumbra kie nuŋgoq di brantqas di niŋgi qalieqa keresai. Niŋgi ŋam qurem bul sokiñalayosib koboqab. 15 Deqa niŋgi endegsib maroqniye, “Tamo Koba Qotei a na marimqa iga ŋambile sqom. Sosim iga kumbra kie yqa are qalsim yqom.” 16 Ariya niŋgi olo nuŋgo segi ñam soqtoqnsib nuŋgo segi wau qa diqoqnsib laqnub. Nuŋgo kumbra di uge. 17 Ni geregere are qale. Ni kumbra bole qa qalieosim ariya ni dauryqasai di ni une yonum.

Copyright information for `BOJ