John 10

Yesus a kaja naŋgo taqato tamo bole

Osiqa Yesus a olo anjam endegsi minjrej, “Niŋgi quiye. E bole merŋgwai. Tamo bei a kaja naŋgo jeŋ miligiq gilqa osimqa siraŋmeq na gilqa uratosim qalaq na jeŋ prugosim miligiq gilqas di a bajiŋ tamo. Tamo a siraŋmeq na jeŋ miligiq gilqas di a kaja naŋgo mandor bole. Deqa siraŋme taqato tamo na siraŋ waqtetoqnim miligiq giloqnsim aqa segi kaja naŋgo ñam metnjroqnim naŋgi aqa kakoro qusib boqnib joqsim oqedoqnqas. Aqa segi kaja kalil naŋgi joqsim oqedoqnsim a naŋgi qa namoosim giloqnimqa naŋgi aqa kakoro qa poinjrqo deqa naŋgi a dauryoqnqab. Tamo laŋaj bei na naŋgi metnjrqas di naŋgi aqa kakoro qaliesai deqa naŋgi a dauryqasai. Naŋgi a uratosib jaraiqab.” Yesus a na Farisi naŋgi yawo anjam degsi minjrnaqa naŋgi qusib utru poinjrosai. Deqa Yesus a na aqa yawo anjam di aqa damu ubtosiqa endegsi minjrej, “Niŋgi quiye. E bole merŋgwai. Kaja naŋgo jeŋ miligiq gilqajqa siraŋme agi e segi. Tamo kalil e bosaisonam nami beb qaji naŋgi bajiŋ tamo. Ariya kaja naŋgi naŋgo medabu dauryosai. E segi siraŋme. Tamo bei a e qa bosim jeŋ miligiq giloqnqas di Qotei na a oqas. Amqa a miligiq gile oqede osim iŋgi bole uyoqnqas.

10 “Bajiŋ tamo naŋgi iŋgi bei qa bosaieqnub. Naŋgi kaja bajiŋosib ñumqajqa deqa beqnub. Ariya e degyqa bosai. E na kaja naŋgi ŋambile enjritqa naŋgi ŋambile sqajqa e deqa bem. 11 E kaja naŋgo Mandor bole. Deqa e na kaja naŋgi aqaryainjrqa osiy ijo segi ŋambile uratosiy moiqai. 12 Tamo laŋaj bei a silali qa segi wauqa osimqa a kaja naŋgi geregere taqatnjrqasai. Tamo di a kaja naŋgo mandor bolesai. Kaja naŋgi di aqa sai. Deqa bauŋ juwaŋ bamqa unsim kaja naŋgi uratnjrsim a ulaŋqas. Amqa bauŋ juwaŋ na kaja qudei ñumim kalil segisegiosib jaraiqab. 13 A silali qa segi wauqa osimqa a kaja naŋgi geregere taqatnjrqasai. Deqa a kaja naŋgi qa are sosai. Deqa bauŋ juwaŋ bamqa a kaja naŋgi uratnjrsim ulaŋqas.

14 “E kaja naŋgo mandor bole. E ijo segi kaja naŋgi qa qalie. Ijo segi kaja naŋgi e qa dego qalie. 15 Ijo Abu a e qa qalie. E ijo Abu qa qalie. Dego kere e ijo segi kaja naŋgi qa qalie. Naŋgi dego e qa qalie. Deqa e na kaja naŋgi aqaryainjrqa osiy ijo segi ŋambile uratosiy moiqai. 16 Ijo kaja qudei dego jeŋ oqeq di unub. Naŋgi jeŋ miligiq endi sosai. Deqa e naŋgi dego joqsiy bosiy ijo kaja jeŋ miligiq endi unub qaji naŋgi ti turtnjrsiy jeŋ qujaiq di breinjrqai. Yim naŋgi mandor qujaiq di sosib ijo medabu dauryoqnqab. 17 Ijo Abu na e tulaŋ qalaqalaibeqnu. Di kiyaqa? E ijo segi ŋambile uratosiy moiqai. Osiy olo subq na tigelqai. 18 Tamo bei na ijo ŋambile yaibqa keresai. E ijo segi areqalo na ijo ŋambile uratosiy moiqai. E siŋgila ti unum deqa e na ijo ŋambile uratqa kere. E siŋgila ti unum deqa e na olo ijo ŋambile oqa kere. Ijo Abu na nami merbej, ‘Ni degye.’ Deqa e degyqai.”

19 Onaqa Juda naŋgi Yesus aqa anjam di qusibqa areqalo bei bei osib poeleŋeb. 20 Osib tamo gargekoba naŋgi endegsib mareb, “Yesus a mondor uge ti unu. Deqa a tulaŋ nanariqo. Niŋgi kiyaqa aqa anjam queqnub?” 21 Ariya tamo qudei naŋgi mareb, “Tamo a mondor uge ti sqas di a anjam bole deqaji marqa keresai. Mondor uge a na tamo ŋam qandimo boletqa kere e?”

Juda tamo kokba naŋgi Yesus aqa anjam qa minjiŋ oqetnjrej

22 Nami Juda naŋgo moma naŋgi atra tal siraŋ waqteb. Deqa olo are qalqajqa yori bati Jerusalem dia brantej. Bati di ulili aiqa bati. 23 Onaqa Yesus a atra tal miligiq gilsiqa dena atra tal me ñam Solomon dia walweloqnej. 24 Walweleqnaqa Juda tamo kokba naŋgi Yesus aqa areq di koroosib minjeb, “Bati gembub koboamqa ni na ino ñam ubtsim geregere mergwam? Ni Kristus boleamqa geregere merge.”

25 Onaqa Yesus na kamba minjrej, “E nami niŋgi merŋgonum, ‘E Kristus.’ Merŋgonumqa niŋgi quonub ugeiŋgwo. Wau kalil e ijo Abu aqa ñam na yeqnum qaji di niŋgi geregere tenemtoqniye. Tenemtosib endegsi poiŋgwas, ‘Bole, Yesus a Kristus.’ 26 Niŋgi ijo kaja sai deqa niŋgi e qa nuŋgo areqalo siŋgilatosaieqnub. 27 Ijo kaja naŋgi ijo medabu queqnub. E naŋgi qa qalie. Naŋgi e daurbeqnub. 28 E naŋgi ŋambile enjritqa naŋgi ŋambile gaigai sqab. Deqa naŋgi padalqasai bolesai. Tamo bei na naŋgi ijo baŋq dena yaibqa keresai. 29 Ijo Abu a na naŋgi e ebej. A segi qujai Qotei Koba. A na iŋgi iŋgi kalil tulaŋ buŋnjrejunu. Deqa tamo bei na ijo kaja naŋgi ijo Abu aqa baŋq dena yaiyqa keresai bolesai. 30 Aqo ijo Abu wo iga tamo qujai.”

31 Onaqa Juda naŋgi Yesus aqa anjam di qusibqa naŋgi a qalib moiqajqa marsib meniŋ eleŋeb. 32 Osib Yesus qalqa laqnab endegsi minjrej, “E na niŋgi Qotei aqa wau bole bole gargekoba osorŋgoqnem. Niŋgi wau deqa kiersib are qalsib deqa e lubsib moiotbqa meniŋ eleŋonub?”

33 Onaqa Juda naŋgi na kamba endegsib minjeb, “Iga ino wau bole bei qa are qalsim ni meniŋ na lumqasai. Ni Qotei misiliŋyonum deqa lumqom. Agi ni Qotei aqa sawa osim maronum, ‘E segi Qotei.’ Ni degsi maraim. Ni mandam tamo. Deqa ni lumqom.”

34 Onaqa Yesus na kamba minjrej, “Nuŋgo dal anjam bei nami endegsib neŋgreŋyeb unu, ‘E niŋgi merŋgonum, “Niŋgi qotei.” ’ Nuŋgo dal anjam nami degsib neŋgreŋyeb unu. 35 Agi nami Qotei a tamo naŋgi endegsi minjrej, ‘Niŋgi qotei.’ Qotei aqa anjam kalil neŋgreŋq di unu qaji di iga olo bulyqa keresai. 36 Ariya ijo Abu a segi na e giltbosiqa qariŋbonaq mandamq aiem. Deqa e maronum, ‘E Qotei aqa Ŋiri.’ E degsi maronumqa niŋgi kiyaqa merbonub, ‘Ni Qotei aqa sawa osim maronum, “E segi Qotei?” ’

37 “E ijo Abu aqa wau yosaiotqa niŋgi ijo anjam quetbaib. 38 Ariya e Qotei aqa wau yeqnum. Deqa niŋgi ijo anjam quib ugeiŋgim niŋgi ijo wau uniye. Unsib poiŋgwas, bole, e Qotei aqa Ŋiri. Osib dena niŋgi geregere qalieqab, ijo Abu na e beterbejunu. E na ijo Abu beteryejunum.”

39 Onaqa naŋgi Yesus aqa anjam di qusib a ojqa yonab a naŋgi alelnjrsiqa ulaŋej.

40 Ulaŋosiqa olo Jordan ya taqal beiq gilej. Gilsiqa sawa Jon na nami tamo uŋgasari naŋgi yansnjroqnej qaji sawa di soqnej. 41 Sonaqa tamo uŋgasari gargekoba naŋgi aqaq giloqneb. Aqaq giloqnsib segi segi maroqneb, “Bole, Jon a na aqa anjam siŋgilatqa osiqa Qotei aqa maŋwa bei babtosaioqnej. Ariya anjam kalil a na Yesus qa maroqnej qaji di bole.” 42 Naŋgi degsib maroqneb. Deqa Yesus a sawa dia sonaqa tamo uŋgasari gargekoba naŋgi a qa naŋgo areqalo siŋgilatoqneb.

Copyright information for `BOJ