John 12

Maria a goreŋ quleq tulaŋ boledamu Yesus aqa siŋgaq di bilentej

1Ariya Juda naŋgo yori bati koba jojomej. Bati 6-pela amqa brantqas. Deqa Yesus a tigelosiqa Betani qureq gilej. Qure di Lasarus agi Yesus na subq na tigeltej qaji aqa qure utru. 2Gilnaqa qure deqaji tamo uŋgasari naŋgi unsibqa areboleboleinjrnaqa iŋgi goieteb. Ariya Marta a iŋgi suweiyosiq Lasarus wo Yesus wo tamo qudei ti metnjrnaq bosib koba na awoosib iŋgi uyoqneb. 3Onaqa Maria a goreŋ quleq tulaŋ boledamu silali kobaquja na awaiyej qaji di jaliŋaq jigsiqa osi bosiqa Yesus aqa siŋgaq di bilentosiqa aqa segi gate baŋga na nuntetej. Onaqa goreŋ aqa quleq na tal keretej. 4Onaqa Yesus aqa aŋgro bei aqa ñam Judas Iskariot bunuqna Yesus osim jeu tamo naŋgo baŋq di atqas qaji a Maria aqa kumbra di unsiqa ŋiriŋosiq marej, 5“Iga kiyaqa goreŋ di qariŋyosai? Osim meniŋ silali 300 osim tamo iŋgi iŋgi saiqoji unub qaji naŋgi aqaryainjrosai?” 6Judas a tamo iŋgi iŋgi saiqoji unub qaji naŋgi qa are qalsiq anjam di marosai. A bajiŋ tamo. A Yesus aqa aŋgro naŋgo silali jugwajqa quŋ taqatoqnej. Deqa naŋgi quŋ miligiq di silali ateqnab a na olo bajiŋoqnej. A deqa are qalsiq marej.

7Onaqa Yesus a Judas aqa anjam di qusiqa minjej, “Uŋa di uratim a goreŋ di ojeme. Ojesoqnimqa e moiqai. Moiitqa naŋgi na e subq atqab. 8Tamo iŋgi iŋgi saiqoji unub qaji naŋgi bati gaigai niŋgi ti sqab. Ariya e bati gaigai niŋgi ti sqasai.”

Atra tamo kokba naŋgi Lasarus dego qalsib moiotqa maroqneb

9Ariya Juda tamo uŋgasari tulaŋ gargekoba naŋgi qalie, Yesus a Betani qureq bosiq di soqnej. Deqa naŋgi a unqa beleŋeb. Naŋgi Yesus segi unqajqa bosai. Naŋgi qalie, Yesus a nami Lasarus subq na tigeltej. Deqa naŋgi a dego unqa beb. 10Yesus a Lasarus subq na tigeltej deqa atra tamo kokba naŋgi Lasarus dego qalsib moiotqa maroqneb. 11Di kiyaqa? Juda tamo uŋgasari tulaŋ gargekoba naŋgi atra tamo kokba naŋgi daurnjrqa uratosib Yesus qa naŋgo areqalo siŋgilatosib a dauryeb.

Yesus a mandor koba bul Jerusalem miligiq gilej

12Juda tamo uŋgasari tulaŋ gargekoba naŋgi yori bati di unqa marsib Jerusalem beleŋeb. Beleŋosib Jerusalem dia ŋereŋesonab nebeonaqa naŋgi endegsib queb, “Yesus a Jerusalem bqas.” 13Naŋgi degsi qusib deqa naŋgi tuwom baŋga eleŋosib Yesus gamq di turqajqa aieb. Aisib Yesus beqnaqa gamq di turosibqa tulaŋ koba leleŋosib endegsib minjeb, “Iga Qotei qa tulaŋ areboleboleigwo. Tamo a bqo endi Tamo Koba Qotei aqa ñam na bqo. Deqa Qotei na a tulaŋ gereiyeme. A Israel naŋgo Mandor Koba.”

14Onaqa Yesus a donki osiqa quraq di awoej. Aqa kumbra deqa nami Qotei aqa anjam endegsib neŋgreŋyeb unu, 15“O Saion tamo uŋgasari, niŋgi ulaaib. Niŋgi uniye. Nuŋgo Mandor Koba a donki bunuj quraq di awoosiq beqnu.” 16Nami Yesus aqa aŋgro naŋgi anjam di aqa utru poinjrosai. Ariya bunuqna Qotei na Yesus ñam kobaquja yonaqa naŋgi Qotei aqa anjam neŋgreŋq di so qaji deqa olo are qalsibqa qalieeb, anjam di Yesus qa neŋgreŋyeb. Osib tamo uŋgasari naŋgo kumbra deqa olo are qalsib aqa utru poinjrej.

17Lasarus a moisiq subq di sonaqa tamo uŋgasari gargekoba naŋgi Yesus ombla sosib a Lasarus metosiq subq na tigeltonaq uneb. Unsib deqa anjam mare mare laqneb. 18Mare mare laqnab tamo uŋgasari tulaŋ gargekoba queleŋeb. Queleŋosib deqa Yesus a donki bunuj quraq di awoosiq Jerusalem beqnaqa naŋgi a gamq di turqajqa aieleŋeb. 19Ainabqa Farisi naŋgi na unjrsibqa segi segi maroqneb, “Iga Yesus siŋgila na saidyeqnamqa keresaiigeqnu. Niŋgi uniye. Tamo uŋgasari kalil naŋgi a dauryeqnub.”

Grik tamo qudei naŋgi Yesus unqajqa Filip minjeb

20Ariya tamo uŋgasari Qotei louqa marsib yori bati di unqajqa Jerusalem aieleŋeb qaji naŋgo ambleq di Grik tamo qudei soqneb. 21Deqa Grik tamo naŋgi di Filip aqaq di branteb. Di kiyaqa? Filip a dego Grik tamo deqa. Filip aqa qure utru Betsaida. Qure di Galili sawaq di unu. Ariya naŋgi Filip aqaq di brantosib minjeb, “O gago was, iga Yesus unqa bonum.” 22Onaqa Filip a aisiqa Grik tamo naŋgo anjam mareb qaji di Andru minjej. Minjsiqa Andru ombla gilsib anjam di olo Yesus minjeb. 23Minjnab qusiqa naŋgi kamba minjrej, “E Tamo Aŋgro. Deqa e ñam koba oqajqa bati brantqo. 24Niŋgi quiye. E bole merŋgwai. Wit yago breiyibqa mandamq aisim moiqasai di a laŋa sqas. Ariya moiqas di a olo qoqi oqsim gei gargekoba ateleŋqas. 25Dego kere tamo bei na aqa segi ŋambile tulaŋ qalaqalaiyqas di a padalqas. Ariya tamo bei a mandamq endia aqa segi ŋambile qoreiyqas di a ŋambile gaigai sqas. 26Tamo bei a ijo wau yqa osimqa a e daurbem. Yimqa qure e sqai qaji di ijo wau tamo a dego e ombla sqas. Tamo bei a ijo wau yoqnqas di ijo Abu na a ñam kobaquja yqas.”

Naŋgi na Tamo Aŋgro soqtosib gaintqab

27Osiqa Yesus a olo anjam endegsi marej, “Endego e are tulaŋ gulubekobaibqo. Deqa e endegsi Qotei pailyqai kio, ‘O ijo Abu, ni na marimqa gulube e qa bqa laqnu endi e qa baiq’? Uŋgum, e degsi Qotei pailyqasai. Gulube aqa bati endi e qa branteme. E deqa mandamq aiem. 28O ijo Abu, ni na ino ñam tulaŋ kobaqujatime.” Yesus a anjam degsi marnaqa laŋ goge dena anjam endegsi bej, “E ijo ñam agi kobaqujatonum. Deqa olo kobaqujatqai.” 29Onaqa tamo uŋgasari Yesus aqa areq di tigelesoqneb qaji naŋgi anjam di qusibqa segi segi maroqneb, “Kola anjam atqo kio?” Onaqa tamo qudei naŋgi mareb, “Sai. Laŋ aŋgro bei na Yesus anjam minjqo.”

30Onaqa Yesus na kamba minjrej, “Anjam niŋgi quonub qaji di e aqaryaibqajqa bosai. Di niŋgi aqaryaiŋgwajqa bej. 31Niŋgi quiye. Qotei a tamo uŋgasari mandamq endi unub qaji naŋgo une qa naŋgi peginjrqajqa bati brantqo. Qotei na mandam endeqa gate koba Satan taqal waiyqajqa bati agi brantqo. 32E bini mandamq endi unum. Ariya bunuqna jeu tamo naŋgi na e soqtbosib goge gaintbqab. Yimqa bati deqa e na tamo uŋgasari kalil naŋgi metnjritqa naŋgi e qa bqab.” 33Yesus aqa segi moiqajqa gam di boleq atqa osiqa degsi marej.

34Onaqa tamo uŋgasari naŋgi dena kamba Yesus minjeb, “Kristus a bati gaigai sqas. Nami dal anjam degsi marnab iga quem. Deqa ni kiyaqa maronum, ‘E Tamo Aŋgro soqtbosib gaintbqab’? Tamo Aŋgro di tamo yai?”

35Onaqa Yesus na minjrej, “Puloŋ a nuŋgo ambleq di sokiñalaysim niŋgi olo uratŋgwas. Puloŋ a nuŋgo ambleq endi unu. Deqa niŋgi puloŋ di osib puloŋq na laqniye. Yimqa ambruiŋgwasai. Tamo ambruq na laqnu qaji a ambruq di sosim qabitqas kio? Di a qalieqasai. 36Puloŋ a nuŋgo ambleq endi unu. Deqa niŋgi puloŋ di osib puloŋ qa nuŋgo areqalo siŋgilatiye. Niŋgi degyqab di niŋgi puloŋ aqa aŋgro bole sqab.”

Juda tamo gargekoba naŋgi Yesus qa naŋgo areqalo siŋgilatosai

Yesus a anjam degsi minjrsiqa naŋgi uratnjrnaq naŋgi a olo unosai.
37Yesus a Qotei aqa maŋwa gargekoba naŋgo ŋamgalaq di yoqnej. Yeqnaqa naŋgi unoqnsib deqa naŋgo areqalo siŋgilatosai. 38Naŋgo kumbra uge dena anjam bei nami Qotei aqa medabu o tamo Aisaia na marej qaji di aqa damu brantej. A endegsi marej, “O Tamo Koba, tamo yai a gago anjam endi qusiqa aqa areqaloq di siŋgilatqo? Tamo yai a Tamo Koba Qotei aqa siŋgila unqo?” Aisaia a nami anjam degsi marej.

39Deqa naŋgi Yesus qa naŋgo areqalo siŋgilatqa keresai. Utru deqa Aisaia a anjam bei dego endegsi neŋgreŋyej, 40“Qotei a naŋgo ŋamdamu getentetnjrej. A naŋgo are miligi dego getentetnjrej. Deqa naŋgi naŋgo ŋamdamu na Qotei aqa kumbra bei unqa keresai. Naŋgi naŋgo are miligiq na Qotei aqa anjam dego poinjrqa keresai. Deqa naŋgi are bulyosib e qa bqa keresai. Deqa e na naŋgi olo boletnjrqasai.” 41Aisaia a nami Yesus aqa siŋgila unsiq deqa Yesus qa degsi marej.

42Bole, Juda tamo kokba gargekoba naŋgi are bulyosib Yesus qa naŋgo areqalo siŋgilateb. Ariya naŋgi Farisi naŋgi ulainjrsib deqa naŋgi boleq na Yesus aqa ñam marosaioqneb. Naŋgi are qaleb, “Iga boleq na Yesus aqa ñam marqom di Farisi naŋgi na iga Qotei tal miligiq gilqa saidgwab.” 43Naŋgi degsib are qaleb. Di kiyaqa? Naŋgi tamo na naŋgo ñam soqtqajqa arearetnjroqnej. Naŋgi Qotei na naŋgo ñam soqtqajqa arearetnjrosaioqnej.

Anjam Yesus na tamo uŋgasari naŋgi palontsiq minjroqnej qaji dena naŋgo une qa naŋgi peginjrqas

44Onaqa Yesus a tulaŋ koba leleŋosiq marej, “Tamo bei a e qa aqa areqalo siŋgilatqas di a e qa segi aqa areqalo siŋgilatqasai. Ijo Abu e qariŋbej qaji a qa dego aqa areqalo siŋgilatqas. 45Tamo bei a e nubqas di a ijo Abu e qariŋbej qaji di dego unqas. 46E puloŋ bulosim mandamq aiem. Deqa tamo uŋgasari kalil e qa naŋgo areqalo siŋgilatqab qaji naŋgi ambruq di sqasai. 47Tamo bei a ijo anjam qusimqa ariya a dauryqasai di e aqa une deqa a pegiyqasai. E na tamo uŋgasari mandamq endi unub qaji naŋgo une qa peginjrqa bosai. E naŋgi oqajqa bem. 48Ariya tamo bei na e qoreibosim ijo anjam quqwa uratqas di aqa une qa pegiyqajqa tamo unu. Diŋo batiamqa anjam e mareqnum qaji dena tamo di aqa une qa pegiyqas. 49E ijo segi areqalo na anjam endi marosaieqnum. Ijo Abu e qariŋbej qaji a na anjam merbeqnaqa quoqnsim agi mareqnum. 50E qalieonum, ijo Abu Qotei aqa anjam di ŋambile gaigai sqajqa anjam. Deqa anjam kalil e mareqnum qaji endi ijo Abu na e merbeqnaq quoqnsim agi mareqnum.”

Copyright information for `BOJ