John 14

Yesus a segi qujai tamo uŋgasari naŋgi Abu Qotei aqaq oqwajqa gam

Osiqa Yesus a na aqa aŋgro kalil naŋgi olo endegsi minjrej, “Niŋgi are gulubeiŋgaiq. Niŋgi Qotei qa nuŋgo areqalo siŋgilateqnub. Ariya niŋgi e qa dego nuŋgo areqalo siŋgilatoqniye. Laŋ qureq dia ijo Abu aqa talq di warum gargekoba unub. E oqsiy nuŋgo segi segi warum gereiyetŋgwai. Degsi sosai qamu e anjam endi niŋgi merŋgosai qamu. E nuŋgo segi segi warum gereiyetŋgsiy olo bosiy niŋgi joqsiy qure e sqai di niŋgi dego e ombla sqab. Qure e sqai deq oqwajqa gam di niŋgi qalie.”

Onaqa Tomas na Yesus minjej, “O Tamo Koba, qure ni oqwam qaji di iga qaliesai. Deqa iga kiersim qure deq oqwajqa gam qalieqom?” Onaqa Yesus na minjej, “E segi gam. E segi anjam bole qa utru. E segi ŋambile qa utru dego. Deqa tamo bei a gam bei na ijo Abu aqaq oqwa keresai. Ijo Abu aqaq oqwajqa gam agi e segi qujai. Niŋgi e qa qalieonub qamu niŋgi ijo Abu qa dego qalieonub qamu. Agi endego niŋgi ijo Abu qa qalieosib a unonub.”

Onaqa Filip na Yesus minjej, “O Tamo Koba, ni na ino Abu iga osorgimqa di iga qa kereqas.” Onaqa Yesus na minjej, “O Filip, e bati olekoba niŋgi koba na soqnem. Ni e qa qalieosaiunum e? Tamo a e nubqo di a ijo Abu dego unqo. Deqa ni kiyaqa e merbonum, ‘Ni na ino Abu iga osorge’? 10 E ijo Abu beteryejunum a dego e beterbejunu di ni poimosai kio? Anjam e na niŋgi merŋgeqnum qaji endi ijo segi areqalo na marosai. Ijo Abu na e beterbesosiqa aqa wau ojeqnu. 11 E ijo Abu beteryejunum a dego e beterbejunu. Niŋgi ijo anjam di qusib poiŋgem. Ariya niŋgi qusib ugeiŋgimqa wau kalil e nuŋgo ŋamgalaq di yeqnum qaji deqa olo are qalsib dena nuŋgo areqalo e qa siŋgilatiye.

12 “Niŋgi quiye. E bole merŋgwai. Tamo bei a e qa aqa areqalo siŋgilatqas di wau kalil e yeqnum qaji a dego yoqnqas. Osim ijo wau di buŋyosim wau tulaŋ kokba yoqnqas. Di kiyaqa? E ijo Abu aqaq olo oqwai deqa. 13 E Qotei aqa Ŋiri deqa niŋgi iŋgi bei qa osib ijo ñam na Qotei pailyqab di e na iŋgi di eŋgwai. Yim dena ijo Abu a ñam koba oqas. 14 Niŋgi iŋgi bei qa osib ijo ñam na Qotei pailyqab di e na iŋgi di eŋgwai.”

Yesus na aqa Abu minjim a na aqa Mondor qariŋyqas

15 Osiqa Yesus a olo anjam endegsi minjrej, “Niŋgi e qalaqalaibo degosib ijo anjam dauryoqniye. 16 Amqa e na ijo Abu minjitqa a na Aqaryaiŋgo tamo bei qariŋyimqa nuŋgoq bosim siŋgilatŋgwas. Osim bati gaigai niŋgi koba na sqas. 17 Aqaryaiŋgo tamo di a anjam bole qa Mondor. Tamo uŋgasari mandamq endi unub qaji naŋgi Mondor di oqa keresai. Naŋgi a unosaieqnub. Naŋgi a qa qaliesai dego. Ariya niŋgi a qa qalie. A niŋgi koba na unub. Bunuqna a bosim nuŋgo are miligiq di sqas.

18 E niŋgi mandum aŋgro bul uratŋgwasai. E niŋgi qa olo bqai. 19 Tamo uŋgasari mandamq endi unub qaji naŋgi sokiñalaysibqa e olo nubqasai. Ariya niŋgi na e olo nubqab. E ŋambile unum deqa niŋgi dego ŋambile sqab. 20 Sosib bati deqa niŋgi endegsib qalieqab, e na ijo Abu beteryejunum. Niŋgi na e beterbejunub. E na niŋgi beterŋgejunum. 21 Niŋgi quiye. Tamo bei a ijo dal anjam qusim dauryoqnqas di a na e tulaŋ qalaqalaiboqnqas. Tamo a e qalaqalaiboqnqas di ijo Abu na kamba a qalaqalaiyoqnqas. E dego a tulaŋ qalaqalaiyoqnsiyqa aqaq di brantoqnsiyqa e segi qa babtoqnqai.”

22 Onaqa Judas bei Judas Iskariot sai a na Yesus endegsi nenemyej, “O Tamo Koba, kiyaqa ni tamo uŋgasari kalil mandamq endi unub qaji naŋgoq di brantqa saidosim gago segiq di brantoqnsim ni segi qa babtoqnqam?” 23 Onaqa Yesus na kamba minjej, “Tamo bei na e tulaŋ qalaqalaibqas di a ijo anjam dauryoqnqas. Yimqa ijo Abu na kamba tamo di qalaqalaiyimqa aqo ijo Abu wo aqaq bosim a ombla gaigai sqom. 24 Tamo bei a e qalaqalaibqasai di a ijo anjam dauryqasai. Anjam e na niŋgi merŋgeqnum qaji endi ijo anjam sai. Anjam endi ijo Abu e qariŋbej qaji aqa anjam.

25 “Anjam endi e niŋgi koba na sosim deqa merŋgeqnum. 26 Bunuqna Aqaryaiŋgo tamo a niŋgi qa bosim siŋgilatŋgwas. A Qotei aqa Mondor Bole. Ijo Abu na a qariŋyim ijo ñam na bosim anjam kalil niŋgi merŋgekritqas. Osim nuŋgo areqalo tigeltetŋgimqa anjam kalil e nami niŋgi merŋgoqnem qaji deqa olo are qalqab.

27 “E niŋgi uratŋgwa osiyqa nuŋgo are latetŋgwai. E segi are lawo na unum niŋgi degsib are lawo na sqajqa deqa e na nuŋgo are latetŋgwai. Mandam tamo uŋgasari naŋgi na degsib nuŋgo are latetŋgwa keresai. Deqa niŋgi are gulubeiŋgaiq. Osib ulaaib. 28 E niŋgi endegsim merŋgonum quonub, ‘E niŋgi uratŋgsiy olo niŋgi qa bqai.’ Niŋgi e qalaqalaibonub qamu niŋgi ijo anjam deqa areboleboleiŋgwo qamu. Di kiyaqa? E ijo Abu aqaq olo oqwai deqa. Ijo Abu na e tulaŋ buŋbejunu. 29 E ijo Abu aqaq oqosaisosim anjam endi agi merŋgonum. Deqa bunuqna e ijo Abu aqaq oqitqa niŋgi e qa nuŋgo areqalo siŋgilatqab.

30 “Mandam endeqa gate koba Satan a beqnu. Deqa e olo anjam olekoba titsiy merŋgoqnsiy sqasai. Satan a na e gulube bei ebqa keresai. 31 Ariya ijo areqalo agiende. Tamo uŋgasari mandamq endi unub qaji naŋgi endegsib qalieqab, e na ijo Abu tulaŋ qalaqalaiyeqnum deqa aqa anjam kalil a na e merbeqnu qaji di e olo dauryeqnum. Ariya niŋgi tigelab iga gilqom.”

Copyright information for `BOJ