John 15

Yesus a segi wain ŋamtaŋ bole

Osiqa Yesus a olo anjam endegsi minjrej, “E segi wain ŋamtaŋ bole. Ijo Abu a wain wau qa lanja. Ijo dani qudei naŋgi gei bole atqasai di ijo Abu na naŋgi giŋgeŋnjrsim taqal breinjrqas. Ijo dani gei bole ateleŋeqnub qaji di ijo Abu na gereinjreqnaqa naŋgi olo gei koba ateleŋeqnub. Ijo anjam e nami merŋgoqnem qaji dena niŋgi gereiŋgwo. Deqa niŋgi torei milalejunub. Niŋgi e beterbesoqnibqa e dego niŋgi beterŋgesqai. Ŋam dani a segi sqas di a geitqa keresai. Qoboq di qamesqas di a geitqas. Dego kere niŋgi e beterbesqasai di niŋgi gei bole atqa keresai.

“E segi wain ŋamtaŋ bole. Niŋgi ijo dani bul. Tamo bei a e beterbesqas di e dego a beteryesqai. Yimqa a gei koba ateleŋoqnqas. Niŋgi e uratbqab di niŋgi kumbra bole bei yqa keresai. Tamo bei a e beterbqasai di a ŋam dani bul giŋgeŋyosib taqal breiyib kaŋgraŋamqa koroiyosib ŋamyuoq di breiyib yugwas.

“Niŋgi e beterbesosib ijo anjam nuŋgoq di soqnimqa niŋgi iŋgi bei qa osib Qotei pailyqab di a na iŋgi di eŋgwas. Niŋgi ŋam dani bul sosib gei koba ateleŋabqa tamo uŋgasari naŋgi nuŋgo kumbra di unsibqa niŋgi qa endegsib marqab, ‘Naŋgi Yesus aqa aŋgro bole.’ Amqa nuŋgo kumbra dena ijo Abu aqa ñam tulaŋ kobaqujaqas. Ijo Abu na e tulaŋ qalaqalaibeqnu dego kere e na niŋgi tulaŋ qalaqalaiŋgoqnem. Deqa niŋgi gaigai ijo qalaqalaiyo kumbra ti soqniye. 10 Niŋgi ijo dal anjam kalil dauryoqnqab di niŋgi ijo qalaqalaiyo kumbra ti sqab. E ijo Abu aqa dal anjam dauryoqnsimqa aqa qalaqalaiyo kumbra ti unum dego kere. 11 Ijo areqalo agiende. E segi tulaŋ areboleboleibeqnu niŋgi dego tulaŋ areboleboleiŋgoqnem. Utru deqa e na anjam endi niŋgi merŋgonum. 12 Ijo dal anjam agiende. E na niŋgi qalaqalaiŋgeqnum dego kere niŋgi na nuŋgo was naŋgi dego qalaqalainjroqniye. 13 Tamo bei na aqa kadoi naŋgi tulaŋ qalaqalainjrsim deqa a na naŋgi aqaryainjrqa osimqa aqa segi ŋambile uratosim moiqas di a kumbra tulaŋ boledamu yqas. Qalaqalaiyo kumbra dena qalaqalaiyo kumbra kalil tulaŋ buŋnjrejunu. 14 Niŋgi ijo anjam e na merŋgeqnum qaji endi dauryoqnqab di niŋgi ijo segi kadoi bole sqab. 15 Kaŋgal tamo naŋgi naŋgo tamo kokba naŋgo wau utru geregere qaliesai. Deqa e niŋgi olo kaŋgal tamo qa merŋgwasai. Anjam kalil ijo Abu na e merbeqnaq queqnum qaji di e na ubtsim niŋgi merŋgeqnum. Deqa e niŋgi ijo kadoi qa merŋgeqnum.

16 “Niŋgi na e giltbosai. E na niŋgi ijo segi qa osim giltŋgem. Osim niŋgi wau eŋgem. Yimqa niŋgi gilsib gei koba ateleŋoqnibqa nuŋgo gei bole gaigai sqas. Deqa niŋgi ijo ñam na iŋgi bei qa ijo Abu pailyqab di a na eŋgwas. 17 E na niŋgi dal anjam endegsi merŋgwai. Niŋgi segi segi na nuŋgo was naŋgi qalaqalainjroqniye.”

Tamo uŋgasari mandamq endi unub qaji naŋgi na Yesus aqa aŋgro naŋgi jeutnjroqnqab

18 Osiqa Yesus a olo anjam endegsi minjrej, “Tamo uŋgasari mandamq endi unub qaji naŋgi na niŋgi jeutŋgoqnqab di niŋgi endegsi poiŋgem, naŋgi nami e dego jeutgoqneb. 19 Niŋgi mandam endeqa tamo qamu tamo uŋgasari mandamq endi unub qaji naŋgi na niŋgi qalaqalaiŋgonub qamu. Agi naŋgi na naŋgo segi aŋgro naŋgi qalaqalainjreqnub dego kere. Ariya niŋgi mandam endeqa tamo sai. E na niŋgi giltŋgem deqa niŋgi mandam endeqa kumbra urateb. Utru deqa mandam endeqa tamo uŋgasari naŋgi na niŋgi jeutŋgeqnub. 20 E nami merŋgonum, kaŋgal tamo na aqa tamo koba buŋyqa keresai. Niŋgi ijo anjam deqa geregere are qaliye. Jeu tamo naŋgi na e ugeugeibeqnub dego kere niŋgi dego ugeugeiŋgoqnqab. Naŋgi ijo anjam dauryoqneb qamu naŋgi nuŋgo anjam dego dauryonub qamu. 21 Ariya jeu tamo naŋgi ijo Abu e qariŋbej qaji a qa qaliesai. Deqa naŋgi na niŋgi ugeugeiŋgoqnqab. Di kiyaqa? Niŋgi ijo ñam ejunub deqa.

22 “E bosim jeu tamo naŋgi di anjam minjrosai qamu naŋgi une saiqoji qamu. Ariya bini naŋgi naŋgo une di ulitqa gam saiqoji. 23 Tamo bei na e jeutbqas di a na ijo Abu dego jeutqas. 24 E wau bunuj tamo bei na nami yosaioqnej qaji di naŋgo ambleq di yosai qamu naŋgi une saiqoji qamu. Ariya e naŋgo ambleq di wau bunuj yeqnamqa naŋgi unoqneb. Deqa naŋgi na aqo ijo Abu wo jeutgeqnub. 25 Naŋgo kumbra uge dena Qotei aqa dal anjam bei nami neŋgreŋyeb qaji di aqa damu branteqnu. Agi nami endegsib neŋgreŋyeb, ‘Tamo naŋgi na e laŋa jeutbeqnub.’

26 “Niŋgi siŋgilatŋgwajqa Mondor a ijo Abu ombla unub. E na a qariŋyit niŋgi qa bqas. A anjam bole qa Mondor. A ijo Abu aqaq dena bqas. Bosim ijo wau qa ti ijo kumbra qa ti anjam babtqas. 27 Niŋgi dego e qa anjam babtqab. Di kiyaqa? Nami e ijo wau utru atem bati deqa niŋgi e ombla sosib ijo wau unoqneb dena bosi bosib agi bini niŋgi e ombla unum.

Copyright information for `BOJ