John 16

“Niŋgi ijo ñam ulontaib deqa e na anjam endi merŋgeqnum. Juda tamo kokba naŋgi na niŋgi taqal waiŋgosib niŋgi olo Qotei tal miligiq gilqa saidŋgwab. Yimqa bunuqna bati bei bamqa tamo naŋgi niŋgi liŋgoqnsib moiotŋgeqnub qaji naŋgi endegsib are qalqab, ‘Iga Qotei aqa wau bole yeqnum.’ Naŋgi aqo ijo Abu wo qa qaliesai deqa naŋgi na niŋgi degŋgwab. Ariya bini e naŋgo kumbra deqa niŋgi saiŋgonum. Bunuqna naŋgi na niŋgi degŋgibqa niŋgi ijo anjam endeqa olo are qalqab.”

Yesus a Mondor Bole aqa wau qa anjam marej

Osiqa Yesus a olo anjam endegsi minjrej, “Nami e niŋgi koba na sosim deqa e na anjam endi niŋgi merŋgosaioqnem.
Ariya bini e niŋgi uratŋgsiy ijo Abu e qariŋbej qaji aqaq olo oqwai. Ariya nuŋgo ambleq di aŋgro bei na e kamba nenembosai, ‘Ni qabitqam’ degbosai. E na anjam endi merŋgonumqa niŋgi qusib are gulubeiŋgwo. Niŋgi quiye. E bole merŋgwai. E niŋgi aqaryaiŋgwajqa deqa uratŋgsiy oqwai. E oqwasai di niŋgi siŋgilatŋgwajqa Mondor a nuŋgoq bqasai. Ariya e oqsiy Mondor qariŋyitqa a nuŋgoq bqas. Bosim mandam endeqa tamo uŋgasari naŋgo une babtoqnim naŋgi poinjroqnqas. Kumbra bole qa utru di dego a na osornjroqnim naŋgi qalieoqnqab. Qotei a mondoŋ tamo uŋgasari naŋgo une qa naŋgi peginjrqas. Kumbra di dego naŋgi qalieqajqa deqa Qotei aqa Mondor na naŋgi osornjroqnqas. Une aqa utru agiende. Mandam endeqa tamo uŋgasari naŋgi e qa naŋgo areqalo siŋgilatosaieqnub. 10 Kumbra bole aqa utru agiende. E ijo Abu aqaq oqitqa niŋgi e olo nubqasai. 11 Qotei na tamo naŋgo une qa peginjrqas kumbra di aqa utru agiende. Mandam endeqa gate koba Satan aqa une qa Qotei na pegiyosim a ŋamyuoq waiyqas.

12 “E anjam gargekoba niŋgi merŋgwajqa ijo areqaloq di unu. Bini e merŋgwasai. Di kiyaqa? Nuŋgo areqalo na ojqa keresai deqa. 13 Ariya anjam bole qa Mondor a bosimqa nuŋgo areqalo gereiyetŋgimqa niŋgi anjam bole kalil poiŋgekritqas. A aqa segi areqalo na anjam merŋgwasai. A anjam quoqnsim di segi niŋgi merŋgoqnqas. Osim kumbra mondoŋ branteleŋqas qaji di dego ubtsim merŋgoqnqas. 14 A ijo anjam osim niŋgi merŋgoqnqas. Osim kumbra dena a na ijo ñam koba ti ijo siŋgila ti boleq atoqnqas. 15 Ijo Abu aqa iŋgi iŋgi kalil di ijo dego. Deqa e niŋgi merŋgonum, Qotei aqa Mondor a ijo anjam osim niŋgi merŋgoqnqas.”

Yesus na aqa aŋgro naŋgi uratnjrim are ugeinjrim bunuqna naŋgi olo areboleboleinjrqas

16 Osiqa Yesus a olo anjam endegsi minjrej, “Niŋgi sokiñalaysib e nubqasai. Olo sokiñalaysib e nubqab.” 17 Onaqa Yesus aqa aŋgro qudei naŋgi segi segi mareleŋoqneb, “Yesus a marqo, ‘Niŋgi sokiñalaysib e nubqasai. Olo sokiñalaysib e nubqab.’ Osiq marqo, ‘Ijo anjam di aqa utru agiende. E ijo Abu aqaq olo oqwai.’ A kiyaqa degsi marqo?” 18 Naŋgi degsib marsib olo mareb, “Yesus a marqo, ‘Niŋgi sokiñalaysib e nubqab.’ Anjam di aqa utru iga poigosai.”

19 Naŋgi degsib Yesus nenemyqa osib segi segi mareqnab a qalieosiqa endegsi minjrej, “E niŋgi merŋgonum, ‘Niŋgi sokiñalaysib e nubqasai. Olo sokiñalaysib e nubqab.’ Ijo anjam di aqa utru niŋgi poiŋgosai deqa niŋgi segi segi nenemeqnub. 20 Niŋgi quiye. E bole merŋgwai. Niŋgi e qa are tulaŋ ugeiŋgimqa akam ti sqab. Ariya mandam endeqa tamo uŋgasari naŋgi areboleboleinjrim sqab. Niŋgi are gulubeiŋgwas. Ariya nuŋgo are gulube di olo koboamqa niŋgi areboleboleiŋgwas. 21 Uŋa a aŋgro oqa batiamqa aqa jejamu tulaŋ jaqatiŋyoqnimqa a are gulubekobaiyqas. Ariya a aŋgro osim aqa jaqatiŋ koboamqa a aqa jaqatiŋ deqa olo are qalqasai. A aŋgro osim deqa tulaŋ areboleboleiyim sqas. 22 Dego kere bini niŋgi are gulubeiŋgwo. Ariya bunuqna e niŋgi olo niŋgitqa niŋgi are gulube di uratosib tulaŋ areboleboleiŋgwas. Nuŋgo arebolebole di tamo bei na olo yaiŋgwa keresai. 23 Bati deqa niŋgi na olo e anjam bei nenembqasai. Deqa niŋgi quiye. E bole merŋgwai. Niŋgi iŋgi bei qa osib ijo ñam na Abu pailyqab di a na eŋgwas. 24 Niŋgi nami ijo ñam na Qotei pailyosaioqneb. Ariya bini niŋgi iŋgi bei qa osibqa niŋgi ijo ñam na Qotei pailyoqniye. Osib deqa niŋgi iŋgi di osib niŋgi tulaŋ areboleboleiŋgoqnqas.”

Yesus a segi na mandam endeqa siŋgila kalil gotraŋyosiq tigelejunu

25 Osiqa Yesus a olo anjam endegsi minjrej, “E anjam merŋgeqnum endi yawo na anjam merŋgeqnum. Bunuqna e olo yawo anjam bei merŋgwasai. Anjam aqa damu geregere plaltosiy ijo Abu qa merŋgoqnqai. 26 Yimqa bati deqa niŋgi ijo ñam na ijo Abu pailyoqnqab. Deqa e niŋgi qa olo ijo Abu pailyqasai. Niŋgi segi na ijo Abu pailyoqnqab. 27 Ijo Abu a na niŋgi tulaŋ qalaqalaiŋgeqnu. Di kiyaqa? Niŋgi na e qalaqalaibeqnub deqa. Osib niŋgi endegsi poiŋgeqnu, Qotei na e qariŋbonaq bem. 28 Nami e ijo Abu ombla sosim dena mandamq aiem. Bini e olo mandam uratosiy aqaq olo oqwai.”

29 Onaqa Yesus aqa aŋgro naŋgi aqa anjam di qusib minjeb, “Od, endego ni boleq na anjam ubtosim mergonum. Ni yawo anjam mergosai. 30 Deqa iga bini poigwo, ni kumbra kalil qa qalieonum. Deqa tamo bei na ni anjam bei nenemmosaisoqnimqa ni a qa tariŋqasai. Ni namoqna aqa anjam kamba minjqa kere. Utru deqa iga ni qa gago areqalo siŋgilatosim qalieonum, ni Qotei ombla sosim dena bem.”

31 Onaqa Yesus na kamba minjrej, “Niŋgi e qa nuŋgo areqalo siŋgilatonub e? Di keretonub. 32 Niŋgi quiye. Bati bei bqas agi jojomqo. Od, bati di bqo. Deqa jeu tamo naŋgi na niŋgi teteiŋgibqa niŋgi kalil e uratbosibqa segisegiosib nuŋgo qureq jaraiibqa e segi sqai. Bole, e segi sqasai. Di kiyaqa? Ijo Abu a e ombla unum deqa. 33 Niŋgi na e beterbosib are lawo na sqajqa deqa e na anjam endi niŋgi merŋgonum. Niŋgi mandamq endia sosib niŋgi gulube koba oqnqab. Deqa uŋgum. Niŋgi are siŋgilatiye. E segi na mandam endeqa siŋgila kalil gotraŋyosim tigelejunum.”

Copyright information for `BOJ