John 17

Yesus na aqa aŋgro naŋgi qa Qotei pailyej

Yesus a na aqa aŋgro naŋgi anjam degsi minjrsiq koboonaqa laŋ goge tarosiqa Qotei endegsi pailyej, “O Abu, bati brantqo. E ino segi Aŋgro deqa ni na e ñam koba ebime. Yim e kamba dego ni ñam koba emqai. Di kiyaqa? Ni na e siŋgila ebem. Osim e na tamo uŋgasari kalil naŋgo gate sqa marsim e giltbem. Deqa tamo uŋgasari ni na e ebem qaji naŋgi di e na ŋambile enjritqa naŋgi ŋambile gaigai sqab. Ŋambile gaigai sqajqa kumbra agiende. Tamo ŋambile gaigai sqab qaji naŋgi ni qa qalieqab. Agi ni segi Qotei bole. E Yesus Kristus qa dego naŋgi qalieqab. Agi ni na e qariŋbonam bem.

“Ino ñam koba ti ino siŋgila ti di e na tamo uŋgasari mandamq endi unub qaji naŋgi osornjroqnem. Osim wau kalil ni na e yqajqa ebem qaji agi yekritem. O Abu, nami mandam a brantosaisonaqa e ni ombla ñam koba ti soqnem. Ñam di ni na e olo ebimqa aqo ombla ñam koba ti sqom.

“Mandam endeqa tamo uŋgasari ni na ebem qaji naŋgi di e na ino ñam osornjroqnem. Naŋgi ino segi tamo uŋgasari sonabqa ni na naŋgi e ebem. Naŋgi ino anjam dauryoqneb. Bini naŋgi qalieonub, iŋgi iŋgi kalil ni na e ebem qaji di inoq dena branteb. Anjam kalil ni na e merboqnem qaji di e na kamba naŋgi minjreqnam naŋgi quoqnsib endegsi poinjrej, e nami ni ombla sosim dena bem. Deqa naŋgi e qa naŋgo areqalo siŋgilatosib qalieeb, ni na e qariŋbonam bem.

“E naŋgi qa osim ni pailmonum. Mandam endeqa tamo uŋgasari kalil naŋgi qa e ni pailmosai. Tamo uŋgasari ni na e ebem qaji naŋgi segi qa osim ni pailmonum. Di kiyaqa? Naŋgi ino segi tamo uŋgasari unub deqa. 10 Ijo segi tamo uŋgasari kalil naŋgi di ino dego. Ino segi tamo uŋgasari kalil naŋgi di ijo dego. Naŋgoq dena ijo ñam kobaqujaeqnu.

11 “E inoq olo bqai. Deqa e mandamq endia olo sqasai. Ariya ijo segi tamo uŋgasari naŋgi mandamq endi sqab. O Abu, ino kumbra kalil boledamu. Ni segi qujai une saiqoji. Ino segi ñam koba ni na ebem qaji ñam dena ni na ijo segi tamo uŋgasari naŋgi geregere taqatnjroqnime. Amqa aqo aiyel are qujaitejunum dego kere naŋgi kamba dego are qujaitosib sqab. 12 E naŋgi ti sosimqa ino ñam kobaquja ni na ebem qaji ñam dena naŋgi taqatnjroqnem. Deqa ijo aŋgro bei padalosai. Ijo aŋgro qujai agi ni na nami padalqajqa giltem qaji a segi padalqas. A padalamqa ino anjam bei nami neŋgreŋyeb qaji di aqa damu brantqas. 13 E inoq bqai. E tulaŋ areboleboleibeqnu dego kere ijo segi tamo uŋgasari naŋgi dego tulaŋ areboleboleinjrqajqa deqa e mandamq endia sosimqa anjam endi maronum.

14 “E na ino anjam naŋgi minjrem. Utru deqa tamo uŋgasari mandamq endi unub qaji naŋgi na naŋgi jeutnjreqnub. Di kiyaqa? Ijo aŋgro naŋgi mandam endeqa tamo sai. Agi e dego mandam endeqa tamo sai. 15 Ni na ijo segi tamo uŋgasari naŋgi joqimqa naŋgi mandam uratosib laŋ qureq oqwajqa e deqa ni pailmosai. Naŋgi mandamq endi soqnibqa ni na naŋgi taqatnjresoqnimqa tamo uge Satan a na naŋgi ugeugeinjraim deqa ni pailmonum. 16 Naŋgi dego mandam endeqa tamo sai. Agi e dego mandam endeqa tamo sai. 17 Ino anjam kalil bole. Ni na ino anjam bole di naŋgi minjroqnimqa naŋgo are miligiq di wauoqnimqa dena naŋgi ino segi tamo uŋgasari tiŋtiŋ sqab. 18 Nami ni na e qariŋbonam mandamq aisim tamo uŋgasari naŋgo ambleq di soqnem. Deqa e na kamba ijo segi tamo uŋgasari naŋgi qariŋnjritqa mandam endeqa tamo uŋgasari naŋgo ambleq di sqab. 19 E niŋgi qa osiy ijo segi jejamu osiy ni emekritqai. Ijo kumbra dena naŋgi ino segi tamo uŋgasari tiŋtiŋ sosib ino anjam bole dauryoqnqab.

20 “E ijo aŋgro 11-pela naŋgi qa segi ni pailmosai. Bunuqna ijo aŋgro 11-pela naŋgi ijo anjam mare mare laqnibqa tamo uŋgasari gargekoba naŋgi naŋgo anjam quoqnsib e qa naŋgo areqalo siŋgilatoqnqab. E naŋgi qa dego ni pailmonum. 21 O Abu, ni ijoq di unum. E dego inoq di unum. Aqo aiyel are qujaitosim unum. Ijo segi tamo uŋgasari kalil naŋgi dego aqo aiyel koba na are qujaitosib sqajqa deqa e ni pailmonum. Soqnibqa mandam endeqa tamo uŋgasari naŋgi na unjrsibqa naŋgi dego e qa naŋgo areqalo siŋgilatqab. Osib qalieqab, ni na e qariŋbonam bem. 22 Aqo aiyel are qujaitosim unum. Ijo segi tamo uŋgasari kalil naŋgi dego aqo aiyel koba na are qujaitosim sqajqa deqa ñam koba ti siŋgila ti ni na ebem qaji di e na kamba olo naŋgi enjrem. 23 E ijo segi tamo uŋgasari naŋgoq di unum. Ni ijoq di unum. Kumbra dena naŋgi kalil dego aqo aiyel koba na are qujaitosib sqab. Soqnibqa mandam endeqa tamo uŋgasari naŋgi na unjrsibqa qalieqab, ni na e qariŋbonam bem. Osib qalieqab, ni na e tulaŋ qalaqalaibeqnum dego kere ijo segi tamo uŋgasari naŋgi dego ni na tulaŋ qalaqalainjreqnum.

24 “O Abu, tamo uŋgasari ni na e ebem qaji qure e sqai qaji di naŋgi dego e ombla sqajqa deqa e ni pailmonum. Naŋgi e ombla sosibqa riaŋ ti ñam koba ti ni na nami ebem qaji di unqajqa deqa ti e ni pailmonum. Nami ni mandam atosaisosimqa agi riaŋ ti ñam ti di ni na e ebem. Di kiyaqa? Ni na e tulaŋ qalaqalaiboqnem deqa. 25 O Abu, ino kumbra kalil tulaŋ tiŋtiŋo. Mandam endeqa tamo uŋgasari naŋgi ni qa qaliesai. Ariya e ni qa qalie. Ijo segi tamo uŋgasari naŋgi dego ni qa qalie. Deqa naŋgi qalieonub, ni na e qariŋbonam bem. 26 E na ino ñam naŋgi osornjroqnem. Naŋgi olo osornjrqai. Yimqa ni na e tulaŋ qalaqalaibeqnum dego kere naŋgi dego ino qalaqalaiyo kumbra ti sqab. Amqa e segi naŋgi ti sqai.”

Copyright information for `BOJ